‹ ᕿᓂᕈᑎᒧᑦ ᐅᑎᕈᑎᒃ
ᐃᓕᓐᓂᐊᑎᑦᓯᒍᑎᑦᓭᑦᐸᕐᓇᓯᒪᔪᑦ

ᐃᓪᓗᕕᒐᓕᐅᕐᓂᖅ – ᐆᑦᑐᕋᐅᑏᑦ

ᓇᓗᓀᕐᓯᐅᑎ

ᑌᑦᓱᒪᓂ ᐅᓪᓗᓂ, ᐃᓄᐃᑦ ᐃᓪᓗᕕᒐᕐᓂᒃ ᖃᐅᑕᒫᑦ ᐊᑐᖃᑦᑕᓯᒪᔪᐃᑦ, ᐊᖑᑏᑦ ᐊᕐᓀᓗ ᐃᓕᓐᓂᐊᑲᐱᖃᑦᑕᓯᒪᔪᑦ ᐊᕕᑦᑐᐃᓂᕐᒥᒃ ᐋᕐᕿᓱᐃᓂᕐᒥᓗ ᐊᐳᑎᓂᒃ ᑕᑯᓐᓇᓱᑎᒃ ᐊᖑᓇᓱᑦᑎᓂᒃ. ᐅᓪᓗᒥ, ᐃᑭᑦᑐᐊᐲᑦ ᐊᖑᓇᓱᑦᑏᑦ ᐃᓪᓗᕕᒐᓕᐅᓲᖑᒻᒪᑕ, ᐱᐊᕃᑦ ᑕᑯᓐᓇᓲᖑᖕᖏᑐᑦ ᐃᓪᓗᕕᒐᓕᐅᕐᑐᓂᒃ. ᑌᒣᑦᓱᒍ ᐱᒻᒪᕆᐅᕗᖅ ᐃᓕᓐᓂᐊᑎᑦᓯᓂᖅ ᖃᓄᖅ ᐃᓕᑕᕐᓯᒋᐅᕐᓴᑎᑦᓯᓂᕐᒥᒃ ᐊᐳᑏᑦ ᖃᓄᐃᑦᑑᓂᖏᓐᓂᒃ ᐊᒻᒪᓗ ᐊᕕᑦᑐᐃᓂᕐᒥᒃ ᓴᓇᒻᒪᓂᒃ ᐃᓕᓐᓂᐊᕕᒻᒥ.

ᐃᓪᓗᕕᒐᓕᐅᕐᓃᑦ ᐃᓗᓕᖏᑦ

ᑕᒡᒐᓂ ᐱᒋᐅᕐᓴᐅᑎᒥ ᐃᓪᓗᕕᒐᓂᐅᕐᓃᑦ ᐃᓗᓕᖏᑦ 6-ᓂᒃ ᒪᓕᑦᑕᐅᒋᐊᓕᓐᓂᒃ ᐱᒋᐅᕐᓴᐅᑎᓕᒃ.

  1. ᑐᑭᓯᑎᑦᓯᒍᑎ
  2. ᐆᑦᑐᕋᐅᑏᑦ
  3. ᐊᑑᑎᔭᐅᔪᑦᓴᖅ
  4. ᐱᒋᐅᕐᓴᓂᖅ
  5. ᐁᑦᑑᓯᐊᖅ
  6. ᐃᓪᓗᕕᒐᓕᐅᕐᓂᖅ

ᐃᓕᓐᓂᐊᑏᑦ ᐃᓪᓗᕕᒐᓕᐅᕐᑐᑦ ᒥᑭᔪᒥᒃ
ᐊᑦᔨᓕᐊᕕᓂᖅ ᓵᓕ ᓇᐅᒃᑲᕈᐊᒧᑦ

ᐃᓕᓐᓂᐊᑎᑕᐅᒍᑏᑦ ᓄᐃᒍᑎᖏᑦ

ᐱᒋᐅᕐᓴᐅᑎ ᓯᕗᓪᓕᐹᒥ ᐃᓕᓐᓂᐊᑎᑦᓯᔨ ᖃᐅᔨᓴᕈᓐᓇᓂᐊᕐᑐᖅ ᐃᓕᓐᓂᐊᑏᑦ ᐆᑦᑐᕋᐅᑎᖏᓐᓂ, ᐱᔪᓐᓇᓂᖏᓐᓂ, ᖃᐅᔨᒪᓂᖏᓐᓂ ᐊᒻᒪᓗ ᐱᐅᓯᖏᓐᓂ ᐃᓪᓗᕕᒐᓕᐅᕐᑎᓗᒋᑦ. ᑕᒪᑦᓱᒪ ᓱᖃᑦᓯᓂᐅᑉ ᑐᕌᒐᖓ ᐃᓕᓐᓂᐊᑎᓂᒃ ᑐᓂᓯᓐᓂᐊᑐᖅ ᑕᑯᓐᓇᑎᑦᓯᓂᒃᑯᑦ, ᐊᒥᓱᓂᒃ ᑐᓴᐅᒪᒋᐊᓕᖏᓐᓂᒃ ᓄᐃᑕᑎᑦᓯᕈᓐᓀᓗᓂ. ᑖᓐᓇ ᓀᑦᑐᖅ ᐱᒋᐅᕐᓴᐅᑎ ᐃᓕᓐᓂᐊᕈᒪᓕᕐᑎᓯᓕᐅᒥᓚᖓᔪᖅ. ᐃᓕᓐᓂᐊᑏᑦ ᓄᓇᒦᖃᑦᑕᓂᐊᕐᑐᑦ ᖃᐅᔨᓴᕐᓗᑎᒃ ᐊᐳᑎᓂᒃ ᓴᓇᕐᕈᑎᓐᓂᓗ. ᐃᓪᓗᕕᒐᓕᐅᕈᑎᓂᒃ ᑐᑭᓯᑎᑕᐅᓐᓂᐊᑐᑦ ᐊᐳᑏᑦ ᖃᓄᐃᑦᑑᓂᖏᓐᓂᓗ. ᐆᑦᑐᕋᖃᑦᑕᓗᑎᒃ ᑕᒻᒪᖃᑦᑕᓗᑎᓪᓗ ᐊᐳᑎᓂᒃ ᐊᕕᑦᑐᐃᓗᑎᒃ ᐱᔪᓐᓇᓯᕙᓪᓕᐊᓚᖓᔪᑦ ᐱᐅᓕᓂᐊᒐᕐᓂᒃ ᖃᓄᐃᑦᑐᓂᒃ ᐊᑐᕐᓗᓂ ᐱᐅᓂᕐᓴᐅᒪᖔᓪᓗ ᐃᓕᑦᓯᓗᓂ.

ᐱᒋᐅᕐᓴᑎᑦᓯᒍᑎᐅᑉ ᓈᓂᖓᓂ, ᐃᓕᓐᓂᐊᑏᑦ ᐱᔪᓐᓇᓯᓐᓂᐊᑐᑦ ᒪᑯᓂᖓ

  • ᐱᒋᐅᕐᓴᑎᑦᓯᒍᑎᐅᑉ ᓈᓂᖓᓂ, ᐃᓕᓐᓂᐊᑏᑦ ᐱᔪᓐᓇᓯᓐᓂᐊᑐᑦ ᒪᑯᓂᖓ
  • ᐃᓕᑕᕐᓯᓂᐊᕐᑐᑦ ᐃᓕᒍᓐᓇᑕᒥᓂᒃ ᐆᑦᑐᕋᓚᐅᕋᑎᒃ, ᖃᐅᔨᒪᓚᐅᕋᑎᒃ ᐊᒻᒪᓗ ᓴᓇᕈᓐᓇᓯᓚᐅᕋᑎᒃ ᐃᓪᓗᕕᒐᓕᐅᕐᓂᒥᒃ;
  • ᑕᑯᓯᒪᓐᓂᐊᑐᑦ ᐊᒻᒪᓗ ᐆᑦᑐᕋᕐᓯᒪᓗᑎᒃ ᐃᓪᓗᕕᒐᐅᑉ ᐊᐳᑎᖏᓐᓂᒃ ᐊᒻᒪᓗ ᐊᕕᑦᑐᐃᓂᕐᒥᒃ ᐊᐳᑎᒥᒃ;
  • ᑐᑭᓯᒪᓐᓂᐊᑐᑦ ᐱᒻᒪᕆᐅᓂᖓᓂᒃ ᐱᔭᕇᒐᓱᐊᕐᓂᖅ ᐊᒻᒪᓗ ᓴᐱᓕᕐᓂᐊᕋᑎᒃ ᐆᑦᑐᕋᐅᑎᕆᕐᖄᑕᒥᓂᒃ;
  • ᖃᐅᔨᒪᓕᕐᓂᐊᑐᑦ ᐃᓪᓗᕕᒐᓕᐅᕈᑏᑦ ᓴᓇᕐᕈᑎᖏᑦᑕ ᑌᔭᐅᒍᓯᖏᓐᓂᒃ.

ᑲᔪᓯᓂᖓ

1. ᓄᓇᒦᓐᓂᖅ

ᐃᓕᓐᓂᐊᑏᑦ ᓄᓇᒦᑦᑎᓗᒋᑦ ᐃᓪᓗᕕᒐᓕᐅᕐᕕᓴᑦᓯᐊᒥᒃ ᕿᓂᕐᓗᓯ. ᓴᓇᕐᕈᑎᓂᒃ ᐊᑐᐃᓐᓇᖃᕐᑎᓯᐊᕐᓗᒋᑦ ᐃᓕᓐᓂᐊᑏᑦ ᐊᑎᓕᐅᕐᓗᒋᓪᓗ.

ᐸᓇᒃ

ᐸᓇᒃ ᐊᑐᕐᑕᐅᓲᖅ ᐊᐳᑎᓂᒃ ᐋᕐᕿᓱᐃᒍᑎᑦᓯᐊᖑᑦᓱᓂ ᐊᖏᓂᖏᓐᓂᒃ ᓯᓈᖏᓐᓂᓗ.

ᑭᓪᓘᑎᒃ

ᑭᓪᓘᑎᒃ ᐊᑐᕐᑕᐅᓲᖅ ᓯᑎᓪᓗᖃᓂᒃ ᐊᕕᑦᑐᐃᒍᑎᐅᑦᓱᓂ.

ᐅᓇᒃ

ᐅᓇᒃ ᐊᑐᕐᑕᐅᓲᖅ ᕿᓂᕈᑎᐅᑦᓱᓂ ᐊᑦᔨᒌᖕᖏᑐᓂᒃ ᐊᐳᑎᓂᒃ.

ᐃᓕᓐᓂᐊᑏᑦ ᐆᑦᑐᕋᕐᑎᓗᒋᑦ, ᐅᖃᐅᑎᓪᓗᐊᖏᒻᒪᕆᓪᓗᒋᑦ ᑐᓴᐅᒪᒋᐊᓕᖏᓐᓂᒃ. ᑲᒪᒋᓗᒋᑦ ᖃᐅᔨᓴᕐᓗᒋᓪᓗ ᐃᓕᓐᓂᐊᑏᑦ ᐊᑐᓂ ᐆᑦᑐᕋᓪᓚᕆᓚᐅᕐᑎᓇᒋᑦ, ᐃᓕᓐᓂᐊᑎᓪᓚᕆᓚᐅᕐᓇᒋᑦ ᐊᒻᒪᓗ ᐱᒍᓐᓇᓯᓚᐅᕐᑎᓇᒋᑦ. ᑕᒪᓐᓇ ᐃᑲᔪᕐᓯᓚᖓᔪᖅ ᐱᒋᐅᕐᓴᐅᑎᑦᓴᖏᓐᓂ ᑭᖑᓂᐊᒍᑦ.

ᐃᓕᓐᓂᐊᑏᑦ ᐆᑦᑐᕋᕐᑐᐃᑦ ᐊᕕᐅᕐᙯᒋᐊᒥᒃ ᐋᕐᕿᓱᐃᒋᐊᒥᓪᓗ
ᐊᐳᑎᓂᒃ ᐃᓪᓗᕕᒐᑦᓴᒧᑦ.

ᐱᐅᓕᓂᐊᒉᑦ

  • ᐊᐳᑎ
  • ᓴᓇᕐᕈᑏᑦ (ᐸᓇᒃ, ᐅᓇᒃ, ᑭᓪᓘᑎᒃ)

ᐊᐱᕐᓲᑎᑦᓴᖃᕈᕕᑦ ᐅᖃᐅᓯᑦᓴᖃᕈᕕᓪᓘᓃᑦ, ᖃᐅᔨᓴᕐᕕᒋᑎᒍ.

ᖃᐅᔨᓴᕐᕕᒋᑎᒍ