‹ ᕿᓂᕈᑎᒧᑦ ᐅᑎᕈᑎᒃ
ᐃᓕᓐᓂᐊᑎᑦᓯᒍᑎᑦᓭᑦᐸᕐᓇᓯᒪᔪᑦ

ᐃᓪᓗᕕᒐᓕᐅᕐᓂᖅ – ᐱᒋᐊᖕᖓᐅᑎ

ᓇᓗᓀᕐᓯᐅᑎ

ᐃᓪᓗᕕᒉᑦ ᐱᒻᒪᕆᐅᓂᕐᐸᐅᕗᑦ ᐃᓪᓘᓱᑎᒃ ᐃᓄᐃᑦ ᓄᐃᓚᐅᕐᓯᒪᔭᖓ ᐊᒻᒪᓗ ᐊᑐᕐᑕᐅᓲᑐᖃᐅᑦᓱᑎᒃ ᑕᐅᓴᓐᑏᑦ ᐊᕐᕌᒍᐃᑦ ᐅᖓᑖᓄᑦ. ᐅᓪᓗᒥᐅᔪᖅ, ᓄᑖᓂᒃ ᐊᑐᕋᑦᓴᖃᓕᕐᓱᓂ ᐊᒻᒪᓗ ᐃᓪᓗᖃᓲᖑᓕᕐᓱᓂ ᑐᐱᑦᓴᔭᓐᓂᒃ, ᖃᕐᒪᓂᒃ, ᖃᓪᓗᓈᓕᕐᑕᓂᒃ ᑐᐱᑦᓴᔭᓂᒃ, ᐅᓕᐊᓗᓐᓂᒃ, ᐊᓯᖏᓐᓂᓗ. ᐃᑭᑦᑐᐊᐲᑦ ᒫᓐᓇᐅᔪᖅ ᐊᖑᓇᓱᑦᑏᑦ ᐃᓪᓗᕕᒐᕐᓂᒃ ᐃᓪᓗᖃᓲᑦ. ᐃᓄᒻᒪᕇᑦ ᐅᖃᕐᓯᒪᔪᑦ ᐊᖑᓇᓱᑦᑏᑦ ᐃᓪᓗᕕᒐᓕᐅᒍᓐᓇᐸᑕ, ᑖᓐᓇ ᐃᒻᒥᓂᕿᒍᓐᓇᓯᓲᖅ, ᐱᔪᓐᓇᓂᕐᒥᓂᒃ ᓇᑯᕐᓴᓱᓂ ᓇᓗᕐᖁᑎᖕᖏᓱᓂᓗ. ᑌᒫᑕᒃᑲ ᐃᓚᖏᑦ ᐃᓱᒫᓗᓐᓂᖃᖕᖏᑑᓲᑦ, ᑎᑭᓐᓇᓵᕋᓗᐊᕐᒪᑕ ᐅᕝᕙᓘᓐᓃᑦ ᓯᓚᕐᓂᓗᕈᑦᔭᐅᒐᓗᐊᕐᒪᑕ.

ᐃᓪᓗᕕᒐᓕᐅᕐᓃᑦ ᐃᓗᓕᖏᑦ

ᑕᒡᒐᓂ ᐱᒋᐅᕐᓴᐅᑎᒥ ᐃᓪᓗᕕᒐᓂᐅᕐᓃᑦ ᐃᓗᓕᖏᑦ 6-ᓂᒃ ᒪᓕᑦᑕᐅᒋᐊᓕᓐᓂᒃ ᐱᒋᐅᕐᓴᐅᑎᓕᒃ.

  1. ᑐᑭᓯᑎᑦᓯᒍᑎ
  2. ᐆᑦᑐᕋᐅᑏᑦ
  3. ᐊᑑᑎᔭᐅᔪᑦᓴᖅ
  4. ᐱᒋᐅᕐᓴᓂᖅ
  5. ᐁᑦᑑᓯᐊᖅ
  6. ᐃᓪᓗᕕᒐᓕᐅᕐᓂᖅ

ᐃᓄᑦᔪᐊᒥᐅᑦ ᐃᓪᓗᕕᒐᕐᓛᓘᑉ ᐃᓗᐊᓃᑦᑐᑦ
ᐊᑦᔨᓕᐊᕕᓂᖅ ᓵᓕ ᓇᐅᒃᑲᕈᐊᒧᑦ

ᐱᒋᐅᕐᓴᑎᑕᐅᓃᑦ ᓄᐃᒍᑎᒋᓚᖓᔭᖏᑦ

ᐊᑕᐅᓯᕕᓪᓗᓂ ᐃᓕᓐᓂᐊᑎᑕᐅᓯᒪᓗᓂ ᓈᒻᒪᖏᑦᑐᖅ, ᐃᓕᓐᓂᐊᑏᑦ ᑐᑭᓯᖁᓪᓗᒋᑦ ᐱᒻᒪᕆᐅᓂᖓᓂᒃ ᐃᓄᐃᑦ ᐃᓪᓗᕕᒐᓕᐅᕈᓯᖓᓂᒃ. ᑕᒡᒐᓂ ᐱᒋᐅᕐᓴᐅᑎᒥ, ᐃᓕᓐᓂᐊᑎᑦᓯᔩᑦ ᐱᕈᕐᑐᓴᓂᒃ ᐱᕈᕐᓰᔪᑦᓭᑦ, ᑭᓯᐊᓂ ᐱᒻᒪᕆᐅᕗᖅ ᐱᕈᕐᓰᕈᒪᓂᖃᕐᑎᓯᒐᓱᐊᕐᓗᓂ ᐊᒻᒪᓗ ᐱᕙᓪᓕᐊᑎᑦᓯᒐᓱᐊᕆᐊᓕᒃ ᑕᒪᑦᓱᒥᖓ ᐊᕕᑦᑐᓯᒪᐅᑎᒥᒃ. ᑕᒪᓐᓇ ᐱᓇᓱᐊᕐᑕᐅᒍᓐᓇᑐᖅ ᐃᓕᓐᓂᐊᓇᐅᑉ ᐱᒋᐊᕐᓂᖏᓐᓂ, ᙯᖁᔨᓯᒪᓗᓯ ᐅᓂᒃᑳᑐᑦᓴᓂᒃ, ᑕᕐᕋᓕᔮᕐᑎᓯᓂᒃᑯᑦ, ᐊᓯᖏᓐᓂᓗ.

ᐱᒋᐅᕐᓴᑎᑦᓯᒍᑎᐅᑉ ᓈᓂᖓᓂ, ᐃᓕᓐᓂᐊᑏᑦ ᐱᔪᓐᓇᓯᓐᓂᐊᑐᑦ ᒪᑯᓂᖓ

  • ᑐᑭᓯᒪᓕᕐᓂᐊᑐᑦ ᐃᓪᓗᕕᒐᖅ ᐱᒻᒪᕆᐅᓂᖓᓂᒃ ᐃᓪᓗᕆᔭᐅᑦᓱᓂ ᐃᓗᕐᖁᓯᕆᑦᓱᓂᐅᒃ;
  • ᐃᓕᓐᓂᐊᕈᒪᓂᖃᓕᕐᓂᐊᑐᖅ ᐃᓪᓗᕕᒐᓕᐅᕐᓂᒥᒃ.

ᐋᕐᕿᓯᒪᒍᓯᖓ

1. ᓄᐃᑕᑎᑦᓯᓂᖅ

ᐱᐅᒃᑯᑎᓂᒃ ᓂᕈᐊᕐᓗᑎᑦ ᐊᑐᕋᑦᓴᑎᓐᓂᒃ ᐊᒻᒪᓗ ᐸᕐᓀᓗᑎᑦ 15-ᒥᓇᓂᒃ ᖃᓄᖅ ᐃᓪᓗᕕᒐᓕᐅᕐᓂᒥᒃ ᓄᐃᑕᑎᑦᓯᓂᒃᑯᑦ. ᓄᐃᑕᑎᕋᑦᓴᑎᓐᓂᒃ ᑕᑯᑦᓴᐅᒍᓐᓇᑐᓂᒃ ᐊᑐᐃᓐᓇᐅᑎᑦᓯᓗᑎᑦ (ᐊᑦᔨᖑᐊᑦ, ᐊᓪᓚᖑᐊᕐᓯᒪᔪᐃᑦ, ᑕᕐᕋᓕᔮᓕᐊᕕᓃᑦ, ᐊᓯᖏᓪᓗ).

ᐱᐅᒃᑯᑏᑦ

  • ᖃᕆᑕᐅᔭᒃ
  • ᐊᑭᓐᓇᒥᐅᑕᒥᒃ ᒪᓕᑦᑕᐅᔪᑦᓴᒥᒃ
  • ᓂᐱᖁᑦᑑᑏᒃ
ᐊᐱᕐᓲᑎᑦᓴᖃᕈᕕᑦ ᐅᖃᐅᓯᑦᓴᖃᕈᕕᓪᓘᓃᑦ, ᖃᐅᔨᓴᕐᕕᒋᑎᒍ.

ᖃᐅᔨᓴᕐᕕᒋᑎᒍ