ᐃᓕᓐᓂᐊᑕᐅᔪᐃᑦ ᖃᐅᔨᒍᑎᕕᓃᑦ
ᐃᓕᓵᑦ ᖃᓄᐃᑦᑐᑐᐃᓐᓇᓂᒃ ᐆᒪᔪᓂᒃ ᐱᑦᓯᐊᕆᐊᖃᓐᓂᒥᒃ ᑐᑭᓯᒪᓂᕐᑖᑎᓗᒋᑦ. ᐆᒪᔪᕐᓂᓗ ᖃᓄᑐᐃᓐᓇᖅ ᐱᐅᓯᖃᕝᕕᖃᕆᐊᖃᖕᖏᒋᐊᒥᒃ. ᑐᑭᓯᑎᓪᓗᒋᑦ ᒪᑯᓂᖓ ᐅᐃᕖᕐᕆᓯᓂᕐᒥᒃ, ᑐᖁᕃᑐᐃᓐᓇᓂᕐᒥᒃ, ᐱᓯᑎᐅᔪᕆᐅᑎᖃᓐᓂᒥᓪᓗ. ᑖᒃᑯᐊ ᐃᓄᐃᑦ ᒪᓕᑦᓯᐊᑕᕕᓂᖏᑦ, ᓱᓕ ᐅᓪᓗᒥ ᒪᓕᑦᑕᐅᒋᐊᓖᑦ.
ᐃᓅᓯᖃᑦᓯᐊᓂᕐᒧᑦ ᓯᓚᑦᑐᓭᒍᑏᑦ
ᑖᓐᓇ ᐃᓕᓐᓂᐊᑎᑦᓯᒍᑎ ᐃᓅᓯᖃᑦᓯᐊᓂᕐᒧᑦ ᓯᓚᑦᑐᓭᒍᑎ, ᐊᓯᖏᓐᓂᒃ ᒪᑯᓂᖓ ᐃᓕᓐᓂᐊᑎᑦᓯᒍᑎᖃᕐᒥᓱᓂ:
- ᐃᓅᖃᑎᒌᑦᓯᐊᓂᖅ
- ᐃᓅᖃᑎᒥᓂᒃ ᐃᑲᔪᕐᓂᖅ
- ᓈᓚᓐᓂᖅ
- ᐃᓂᕐᑎᕆᐅᑏᑦ
- ᓂᕿᒥᒃ ᐊᕕᖃᑎᒌᓐᓂᖅ
- ᐆᒪᔪᓂᒃ ᐱᑦᓯᐊᕆᐊᖃᓐᓂᖅ
ᐊᑦᔨᓕᐊᕕᓂᖅ ᑲᕆᓐ ᔅᒥᔅᒧᑦ
ᐃᓕᓐᓂᐊᑎᑦᓯᓗᓂ ᐊᑑᑎᔭᐅᒍᓐᓇᑐᑦ
- ᐃᓕᓵᑦ, ᐃᓄᒻᒪᕇᑦ ᐅᖄᔭᕕᓂᖏᓐᓂᒃ ᐊᑐᐊᕐᓯᒍᓐᓇᑐᑦ, ᐃᓕᓭᔨᖓᓘᓐᓃᑦ ᐊᑐᐊᕐᓯᒍᓐᓇᑐᖅ ᑐᑭᓯᓇᕐᑎᓯᒋᐊᖃᑦᑕᓗᓂ.
- ᐊᑐᐊᕐᑕᐅᒌᑐᐊᕐᐸᑕ ᐃᓕᓵᑦ ᐅᖄᖃᑎᒋᓗᒋᑦ ᐃᓕᓭᔨᖓ ᐱᒋᐊᕐᑎᓯᑎᓪᓗᒍ, ᐅᓪᓗᒥᐅᓕᕐᑐᖅ ᖃᓄᖅ ᐊᑦᔨᒋᔭᐅᖕᖏᓂᑦᓴᐅᓕᕐᒪᖔᑦ ᐅᖄᑎᓪᓗᒋᑦ.
- ᐃᓄᐃᑦ ᑌᑦᓱᒪᓂ ᐱᑦᓯᐊᕆᐊᖃᕐᓂᒥᒃ ᐱᒻᒪᕆᐅᔪᖁᑎᖃᕐᓂᕕᓂᖏᓐᓂᒃ ᐅᓂᒃᑲᐅᔨᒋᐊᓪᓚᓗᒋᑦ, ᖃᐅᔨᒪᔭᕐᓃᕕᑦ, ᐊᑑᑎᓯᒪᔭᕐᓃᕕᓪᓗ ᑐᑭᓯᓇᕐᑎᓯᒋᐊᕈᑎᖃᕈᓐᓇᑐᑎᑦ.
- ᐆᒪᔪᓂᒃ ᖃᓄᑐᐃᓐᓇᖅ ᐱᐅᓯᖃᕝᕕᖃᕆᐊᖃᖕᖏᓂᕐᒥᒃ, ᓲᓱᑦᓴᓯᐊᖁᓪᓗᒋᑦ ᐃᓄᒻᒪᕇᑦ ᐅᖃᐅᓯᕆᓯᒪᔭᖏᑦ ᒪᓕᓪᓗᒋᑦ. ᐃᓄᒻᒪᕇᑦ ᐊᑑᑎᓯᒪᔭᒥᓂᒃ, ᑐᓴᕐᓯᒪᔭᒥᓂᓪᓗ ᐅᖄᒻᒪᑕ ᐊᑯᓂ ᐃᓅᓕᕋᒥᒃ ᓱᓕᔪᓂᒃ ᐅᖄᒻᒪᑕ.
- ᐃᓕᓵᑦ ᐊᑐᐊᕐᓯᒌᕐᓯᒪᓕᑐᐊᕈᑎᒃ, ᐊᑐᐊᕐᓯᕕᐅᒌᕐᓯᒪᓕᕈᑎᓪᓘᓃᑦ ᓇᒻᒥᓂᖅ ᐃᓱᒪᒋᔭᒥᓂᒃ, ᑐᑭᓯᔭᒥᓂᓪᓗ ᐊᓪᓚᑎᓪᓗᒋᑦ, ᑌᑦᓱᒪᓂ ᐃᓄᐃᑦ ᐱᐅᓯᕆᕙᑦᑕᕕᓂᖏᓐᓂᒃ ᐆᒪᔪᐃᑦ ᐱᑦᓯᐊᑕᐅᒋᐊᖃᓐᓂᖓᑕ ᒥᑦᓵᓄᑦ.
- ᐃᓄᒻᒪᕆᒻᒧᑦ ᐳᓛᕆᐊᕈᓐᓇᒥᔪᑦ, ᐁᕕᐅᓗᑎᓪᓘᓃᑦ ᐆᒪᔪᓂᒃ ᐱᑦᓯᐊᕆᐊᖃᓐᓂᒨᓕᖓᔪᓂᒃ ᐅᖄᕕᐅᒋᐊᕐᑐᓗᑎᒃ.
ᐅᖃᐅᓯᕐᑕᖏᑦ ᐃᓄᐃᑦ ᐱᕐᖁᓯᖏᑦᑎᒍᑦ:
ᑖᒃᑯᐊ ᐃᓄᒻᒪᕇᑦ ᐅᖃᐅᑎᔭᐅᒍᑎᒋᖃᑦᑕᓯᒪᔭᖏᑦ ᐆᒪᔪᓂᒃ ᐱᑦᓯᐊᕆᐊᖃᓐᓂᒧᑦ, ᐱᑦᓯᐊᖁᔭᐅᖃᑦᑕᓯᒪᒻᒪᑕ ᖃᓄᐃᑦᑐᑐᐃᓐᓇᓂᒃ ᐆᒪᔪᓂᒃ ᐅᐃᕖᕐᕆᓯᒋᐊᖃᕋᑎᒃ. ᑐᖁᕃᑐᐃᓐᓇᖁᔭᐅᒐᑎᓪᓗ ᐊᑐᕐᓂᐊᖏᑦᑐᓂᒃ.
ᐆᒪᔪᓂᒃ ᐱᑦᓯᐊᕆᐊᖃᓐᓂᖅ
- ᐃᓄᐃᑦ ᐆᒪᔪᓂᒃ ᐱᑦᓯᐊᖁᔨᕙᓚᐅᕐᑐᑦ, ᐆᒪᔪᓂᒃ ᖃᓄᑐᐃᓐᓇᖅ ᐱᐅᓯᖃᕐᕕᐅᖁᔨᒐᑎᒃ, ᐃᓕᐊᕐᕈᖃᖁᔨᒐᑎᒃ ᐃᓅᒍᑎᑐᐊᕆᒐᒥᖏᑦ.
- ᐆᒪᔪᓂᓪᓗ ᐱᑦᓯᐊᕋᓱᐊᖁᔭᐅᑦᓱᑕ ᑌᒣᑦᑑᕙᓚᐅᕋᑦᑕ. ᐃᓄᑉᐸᖅ ᐅᖃᕐᐸᓚᐅᕐᒪᑦ, “ᑐᒃᑐᓕᐊᓘᓐᓂᒪᒎᖅ ᐃᓄᐃᑦ ᓄᓇᖓᑦ, ᐊᒪᕈᐃᓪᓗᒎᖅ. ᑐᒃᑐᐃᓗ ᒎᑎᐅᑉ ᑎᒍᓚᐅᕐᓂᒪᖏᑦ! ᐃᓄᐃᒎᖅ ᐃᓚᖏᑦ ᒪᒪᕐᓃᔦᑦᓱᑎᒃ, ᐅᙯᔦᑐᐃᓐᓇᓱᑎᒃ ᐱᐅᓯᖃᕐᐸᓂᕐᒪᑕ, ᑐᒃᑐᐃᕈᓚᐅᕐᓂᒪᑦ!” “ᑌᒫᒃ ᐱᑦᓯᐊᕋᓱᐊᖕᖏᑐᐃᓐᓇᑐᐊᕐᒥᐸᑕ ᐊᓯᐅᓂᐊᕐᒥᔪᑦ!”, ᓚᔭᐅᕙᓚᕐᒪᑕ. ᑐᒃᑐᖃᓕᕐᑑᒐᓗᐊᖅ ᐅᓪᓗᒥ ᑭᓯᐊᓂ ᑲᒪᑦᓯᐊᕆᐊᖃᕐᑐᒍᑦ. ᑌᒫᕌᓗᒃ ᑲᒪᑦᓯᐊᕆᐊᖃᕐᑐᒍᑦ ᑕᒪᒃᑯᓂᖓ ᐆᒪᔪᓂᒃ ᐱᑦᓯᐊᕋᓱᐊᕐᓗᒋᑦ. ᐃᓕᐊᕐᕈᖃᓚᑳᓐᓂᒥᒃ ᐆᒪᔪᒥᒃ ᐱᑕᖃᕆᐊᖃᕐᐸᓚᐅᖕᖏᑐᒍᑦ, ᕿᒻᒥᓂᓪᓘᓃᑦ.
- ᐅᓇ ᐊᑐᕐᓯᒪᓪᓚᕆᒻᒥᒪᑦ ᐅᓂᒃᑳᓕᕐᕿᑖᕐᑕᐅᕙᓚᐅᕐᒥᒪᑦ. ᑌᓐᓇ ᐊᓇᐅᓕᓲᕕᓈᓘᒻᒪᑦ ᕿᒻᒥᒥᓂᒃ, ᐊᑕᐅᓯᕕᑦᑕᒥᓂᒃ ᑕᖃᑦᑐᐊᓘᕋᑕᕐᑎᓗᒍ. ᑌᒪᖕᖓᑦ ᐅᐃᒪᑎᑦᓱᒍ, ᐊᕐᓱᕈᑦᑎᓱᒍ, ᐊᓇᐅᓕᐊᓗᑦᓴᑐᐃᓐᓇᓲᕆᑦᓱᒍ! ᕿᒻᒥᒥᓄᑦ ᓚᔭᐅᓚᐅᕐᑐᕕᓂᖅ, “ᐱᔪᒪᖕᖏᑕᕐᓂᒃ ᐅᓪᓗᒥ ᐱᓂᐊᓕᕐᖁᑎᑦ!” “ᑌᒫᒃ ᒎᑎ ᐆᒪᔪᒃᑰᕈᓐᓇᑐᖅ!”, ᓚᕙᓚᐅᕐᑐᖅ ᐃᓄᑉᐸᖅ.
- ᑕᒪᒃᑯᐊ ᐃᑲᔪᕐᑎᓴᓕᐊᖑᓐᓂᒪᑕ ᕿᒻᒦᑦ ᐱᑦᓯᐊᑕᐅᑐᐃᓐᓇᖁᔭᐅᕙᓚᐅᕐᒪᑕ. ᑌᒪᖕᖓᑦ ᐆᒥᓇᕐᑐᓂᒃ ᓄᐃᑦᓯᕙᓚᐅᕐᒥᔫᒐᓗᐊᑦ, ᐅᐃᕖᑦᑑᓂᑯᒥᓄᑦ ᑌᒣᑦᑐᖑᐊᒍᕙᓚᐅᕐᒥᔪᐃᑦ. ᐃᑲᔪᕐᑎᒋᑦᓯᐊᑕᐅᒐᒥᒃ ᐱᑦᓯᐊᑕᐅᖁᔭᐅᕙᓚᐅᕐᒪᑕ.
- ᕿᒻᒥᓂᒃ ᑕᑯᓐᓈᓲᒍᓕᕐᒥᒐᒪ ᕿᒻᒥᐊᕋᕆᔭᐅᑦᓱᑎᓗ, ᐃᓕᐊᕐᕈᐊᐱᐅᑦᓱᑎᓪᓗ, ᓂᕆᔪᐃᑦᑐᐊᐱᓐᓂᒃ, ᐃᐱᕐᓯᒣᓐᓇᑐᐊᐱᓐᓂᒃ. ᑕᒪᒃᑯᐊ ᑌᒣᒐᑦᓴᐅᔭᖏᒻᒪᑕ ᖃᓄᓕᒫᖅ ᐱᖃᕋᓱᐊᑐᐊᕈᓂ ᐃᓄᒃ ᐱᑦᓯᐊᑐᑦᓴᐅᕗᖅ. ᐱᖁᑎᒥᓂᒃ, ᐆᒪᔪᖁᑎᒥᓂᒃ, ᕿᒻᒥᖁᑎᒥᓂᓪᓘᓃᑦ ᑲᒪᑦᓯᐊᑐᑦᓴᐅᕗᑦ. ᑌᒫᒃ ᓱᒃᑯᐊᓘᓕᕐᓱᑎᒃ ᑐᖁᑐᐃᓐᓇᓯᒪᔪᑦ. ᑕᑯᖃᑦᑕᓯᒪᕗᖓ ᕿᒻᒥᓂᒃ ᐃᐱᕐᓯᒣᓐᓇᓱᑎᒃ ᐃᓄᒻᒥᓄᑦ ᑲᒪᒋᔭᐅᖕᖏᓗᐊᕐᓂᑯᒥᓄᑦ. ᑌᒣᒋᐊᖃᖕᖏᑐᒍᑦ ᐆᒪᔪᓂᒃ, ᐃᓕᐊᕐᕈᖃᕆᐊᖃᖕᖏᑐᒍᑦ. ᑕᒪᒃᑯᐊ ᒎᑎᒧᑦ ᓄᐃᑎᑕᐅᓐᓂᒪᑕ ᐃᓘᓐᓇᑕ ᐃᑲᔪᕐᑐᓴᓕᐊᒍᓐᓂᕋᑦᑕ. ᐃᓄᑉᐸᖅ ᐅᖃᕐᐸᓚᐅᕐᒪᑦ, ᐅᖃᐅᓯᕆᕙᓚᐅᕐᑕᖓᓂᒃ ᐅᖃᕐᐳᖓ.
- ᐃᒫᒃ ᐊᑖᑕᑦᓯᐊᑰᒃᑲ ᐅᖄᕙᓚᐅᕐᒥᒪᓃᒃ, “ᑌᑦᓱᒪᓂᐊᓗᒎᖅ ᑐᒃᑐᐃᑦ ᐊᒥᓱᕕᓃᑦ. ᑌᒃᑯᐊ ᓴᐅᓪᓗᒉᑦ ᐃᓐᓂᐸᓪᓚᐅᑎᖃᓐᓂᔭᖏᑦᑐᑦ, ᖁᑭᐅᑏᑦ ᓯᕗᓪᓕᐹᓪᓗᑐᕕᓃᑦ. ᐃᒃᑭᑎᒎᖅ ᐃᑭᓕᕋᒥ ᓱᐴᓲᒍᒻᒪᑦ. ᑌᒣᓘᕐᑐᕉᔮᕐᖄᓱᓂ ᑭᓯᐊᓂ ᓯᒃᑭᐸᑦᑐᕕᓂᕐᒥᒃ ᐅᖄᕙᓚᐅᕐᑑᒃ. ᑌᒃᑯᐊ ᐃᓐᓂᐸᓪᓚᐅᑎᓖᑦ ᑕᑯᓐᓈᐸᓕᓚᐅᕐᑕᑲ ᓱᒋᐊᓚᐅᕐᓯᒪᖕᖏᑲᓗᐊᕐᓱᖓ ᑌᒣᑦᑐᒧᑦ. ᑌᒃᑯᐊ ᖁᑭᐅᑎᐅᓚᐅᕐᓯᒪᓕᕐᑎᓗᒋᑦ, ᖁᑭᐅᑎᑖᓕᕐᑐᕕᓃᑦ ᐅᖓᓯᑦᑐᓂᐅᑎᓂᒃ. ᖁᑭᐅᑎᖃᓕᕋᒥᒃ ᐅᖓᓯᑦᑐᓕᒐᕈᓐᓇᑐᓂᒃ ᐅᖄᕙᓚᐅᕐᑑᒃ ᑐᒃᑐᐃᑦ ᐊᒥᓱᕕᓃᑦ ᑌᑦᓱᒪᓂ. ᑌᒣᑦᑐᓂᒃ ᖁᑭᐅᑎᖃᓕᕋᒥᒃ, ᖁᓖᖓ ᕿᕐᓂᑕᑦᓯᐊᒍᖕᖏᑐᐊᕐᒪᑦ, ᐳᑭᖓᓗ ᖃᑯᕐᑕᓯᐊᒍᖕᖏᑐᐊᕐᒪᑦ, ᐃᓛᓐᓂ ᐅᙯᑦᓱᒍ, ᐃᓛᓐᓂ ᐅᓕᐅᑌᕐᓱᒍ, ᐃᓚᖕᖓᔭᓇᒍ ᐃᓛᓐᓂ, ᕿᒣᕙᓕᕐᑐᕕᓃᑦ, ᐊᓐᓄᕌᑦᓴᓯᐅᓕᕋᒥᒃ ᒥᕐᖁᖏᑦ ᓈᒪᓕᕐᒪᑕ. ᑌᒣᑉᐸᓕᕋᒥᒃ ᑐᒃᑐᐃᒎᖅ ᐊᒥᓱᕕᓂᐅᒐᓗᐊᕐᓱᑎᒃ ᑭᑦᑐᕆᐊᓄᑦ ᑐᖁᕋᕐᑖᓗᕐᕉᔮᕐᓱᑎᒃ ᓄᖑᐊᓗᑦᓴᓚᐅᕐᑐᕕᓂᕐᓂᒃ ᐅᖄᕙᓚᐅᕐᑑᒃ! ᑌᒣᑉᐸᓕᕋᒥᑦ ᑳᕌᓗᑦᓴᐸᓕᕋᒥᒃ, ᓄᖑᒻᒪᑕ ᑐᒃᑐᐃᑦ. ᑕᒪᒃᑯᐊ ᓂᕿᖏᑦ ᐊᓯᐸᑐᐃᓐᓇᑕᐅᕙᓕᕋᒥᒃ, ᐃᒫᒃ ᐅᖄᕙᓕᓚᐅᕐᑑᒃ ᐱᕕᒐᓂ ᐅᓯᒍᓐᓇᓗᒍ, ᐁᒍᓐᓇᓗᒍᓘᓐᓃᑦ, ᓂᕿᒥᒃ ᐃᑦᑕᑯᑦᓴᐅᖏᑦᑐᒥᒃ ᐅᖄᕙᓕᓚᐅᕐᑑᒃ.
- ᑰᑦᔪᐊᕌᐱᒻᒧᑦ ᑐᒃᓯᐊᕆᐊᕐᐸᑲᒥᒃ ᐊᔪᕿᑦᑐᐃᔨᒧᑦ ᓵᒋᐊᕐᑎᑕᐅᓯᒪᓕᕐᓱᑎᒃ ᐃᒫᒃ ᐅᖃᐅᑎᔭᐅᕙᓕᕐᑐᕕᓃᑦ, “ᐃᓄᑐᙯᑦ ᑭᓯᐊᓂ ᓄᖑᑉᐸᑕ ᑐᒃᑐᐃᑦ ᐅᑎᕈᒫᓕᕆᕗᑦ!” ᓚᔭᐅᕙᓕᕐᑐᕕᓃᑦ. ᓱᓕᔪᖅ, ᓱᓕᓪᓚᕆᑦᑐᖅ ᑐᒃᑐᐃᑦ ᐅᑎᕐᓯᒪᓕᕆᕗᑦ !
- ᑕᒪᒃᑯᐊᓗ ᐊᔪᕿᑦᑐᐃᔨᐅᑉ ᐅᖄᕙᓐᓂᒪᖏᑦ ᖁᐸᓄᐊᑦ ᐃᓕᐊᕐᕈᒋᓚᑳᒍᓐᓀᓗᒋᑦ. ᑌᒫᒃ ᓱᓇᖃᕋᓂ ᓯᓚᕐᔪᐊᖅ ᖁᕕᐊᓇᕐᑐᖃᓚᖓᖕᖏᒪᑦ, ᖁᕕᐊᓇᕐᑐᒥᒃ ᓄᐃᑕᒃᑫᓂᕐᓴᐅᖁᑦᓱᒋᑦ ᑕᒪᒃᑯᐊ ᐆᒪᔪᐃᑦ ᓂᕿᒧᑦ ᐊᑐᕐᑐᓴᐅᔮᖕᖏᑲᓗᐊᕐᑎᓗᒋᑦ ᓄᐃᑎᑕᐅᓲᒍᒻᒪᑕ ᓂᐱᐊᐱᖏᓪᓗ, ᐃᓱᒪᒋᓗᒋᑦ ᒎᑎᐅᑉ ᓄᐃᑎᓯᒪᒻᒪᖏᑦ. ᐆᒥᓇᕐᑐᒥᒃ ᓄᐃᑎᑦᓯᒐᓱᐊᕆᐊᖃᑦᔭᖏᓐᓇᑕ ᑌᒣᓕᐅᕐᑕᐅᓲᒍᒐᑦᑕ.
- ᐅᓇ ᐊᑯᓂᓂᑕᑐᐃᓐᓇᖅ ᐅᓂᒃᑳᓚᖓᒻᒥᔭᕋ ᒥᑭᒋᐊᕐᓂᐊᓲᒍᓕᕐᑎᓗᒋᑦ. ᑌᓐᓇᒎᖅ ᐊᓪᓚᒃ ᖃᐅᔨᒪᔭᐅᓲᒍᒻᒪᑦ ᑐᓗᒑᓗᐊᓗᒻᒥᒃ ᕿᕐᓂᑕᕐᑐᕆᓚᐅᕐᑐᕕᓂᖅ. ᐊᑭᑐᔪᐊᓘᕙᓐᓂᒪᑕ ᕿᕐᓂᑌᑦ ᑎᕆᒐᓐᓂᐊᑦ. ᐃᓕᐊᕐᕈᖃᓯᓚᐅᕐᑐᕕᓂᖅ ᑐᓗᒑᓗᑦᓯᒪᔭᒥᓂᒃ ᑲᒡᒐᑐᕕᓂᐅᒐᒥ ᕿᕐᓂᑕᕋᑦᓴᒥᓂᒃ. ᒥᕐᖁᐃᔭᕐᓱᒍ ᓱᓇᓕᒫᑦᓯᐊᖏᑦ ᒥᕐᖁᓕᒫᑦᓯᐊᖏᑦ ᓄᖑᑦᓱᒋᑦ, ᑕᒪᒃᑯᐊ ᐃᓴᕈᖏᑦ ᑭᓯᐊᓂ, ᐸᐱᖏᓪᓗ ᐊᒥᐊᒃᑯᒋᑦᓱᒋᑦ ᑎᖏᑎᑦᓯᓚᐅᕐᑐᕕᓂᖅ! ᐅᐃᕖᑦᑑᖁᔭᐅᖕᖏᑑᒐᓗᐊᖅ, ᐁᑉᐸᒥᓄᑦ ᐃᓂᕐᑎᑕᐅᓚᐅᕐᑐᕕᓂᖅ, ᑌᒣᖁᓇᒍ. ᑌᓐᓇᒎᖅ ᑐᓗᒑᓗᒃ ᒥᕐᖁᖃᑦᔭᒍᓐᓀᓱᓂ ᑎᖏᓚᐅᕐᑐᕕᓂᖅ ᖁᒻᒧᑦ ᓂᐸᖏᕐᓱᓂ ᐅᑭᐅᕌᓗᒻᒥ.
ᑌᒫᒎᖅ ᑌᒃᑯᐊ ᐊᓪᓛᒃ ᐊᓂᕐᕋᓯᕘᒃ. ᐱᕐᓯᑐᐊᓘᓕᓚᐅᕐᓯᒪᔪᕉᖅ. ᐊᓂᕐᕌᓂᓚᐅᕐᓯᒪᖕᖏᓚᖅ ᐁᑉᐸᖓ! ᑌᓐᓇ ᐃᕆᑕᕐᑐᕕᓂᖅ ᐊᓂᕐᕌᓂᓚᐅᕐᓯᒪᖕᖏᓚᖅ ᐱᕐᑐᒧᑦ ᓱᒃᑯᑕᐅᑦᓱᓂ! ᐁᑉᐸᖓ ᐃᓅᔪᕕᓂᐅᒐᓗᐊᖅ! ᑌᒣᑦᑐᖃᓚᐅᕐᑐᕕᓂᐅᓂᑯᖓᓄᑦ, ᑕᒪᒃᑯᐊ ᐆᒪᔪᐃᑦ ᐃᓕᐊᕐᕈᓚᑳᒍᒋᐊᖃᖕᖏᓂᖏᑦ ᐅᖃᕐᑕᐅᕙᓚᐅᕐᒪᑕ, ᐅᓪᓗᒥᒧᑦ ᑌᒣᑦᑑᒪᑦ. ᓱᓇᒋᓂᐊᕐᓇᒍ ᐆᒪᔪᖅ ᑐᖁᑕᐅᖁᔭᐅᖕᖏᑐᖅ, ᐃᓄᒻᒧᑦ ᐅᑐᕐᑐᓴᓕᐊᖑᓯᒪᒻᒪᑦ ᐆᒪᔪᖅ!
- ᐆᒪᔪᐃᑦ ᐃᓕᐊᕐᕈᒋᓚᑳᒐᑦᓴᐅᖏᑦᑐᑦ, ᑐᖁᕋᑐᐃᓐᓇᕋᑦᓴᐅᖏᑦᑐᑦ ᐊᑐᕐᓂᐊᓇᒋᑦ. ᒪᓕᒐᖅ ᑕᒪᓐᓇ ᐃᓄᐃᑦ ᐱᐅᓯᑐᖃᖓ ᑌᒣᓕᖓᔪᖅ.
ᖃᕝᕙᑎᑦᓯᒍᑏᑦ
ᓇᑯᕐᒦᒪᕆᑉᐳᒍᑦ ᐃᓄᐃᑦ ᐱᐅᓯᕆᓯᒪᔭᖏᓐᓂᒃ ᐅᖄᖃᑦᑕᓯᒪᔪᓂᒃ ᐅᑯᓂᖓ:
ᔮᓂ ᒪᓄᒥ ᐃᓄᑉᐸᒃ
ᐋᑦᑕᒥ ᓂᕕᐊᕐᓯ
ᑖᒧᓯ ᖁᒪᖅ
ᐄᕙ ᐃᓕᒪᓴᐅᑦ
ᐃᔨᑦᓯᐊᖅ ᓯᒥᒐᖅ
ᑑᒪᓯ ᑲᓪᓚᒃ
ᒨᓱᓯ ᐱᐅᕖ
ᒥᑎᐊᕐᔪᒃ ᓇᑉᐹᓗᒃ
ᕃᑭ ᓇᔪᒻᒥ ᐊᐅᒋᐊᖅ
ᐋᓂ ᐊᓚᑯ (ᑲᖏᕐᓱᔪᐊᖅ)
ᐹᓴ ᓯᒥᒐᖅ
ᕿᐱᑕᖅ ᐊᕐᓀᑐᖅ
ᐁᓴ ᐆᒪᔪᐊᓗᒃ
ᓈᓚ ᓇᑉᐹᓗᒃ
ᐋᓂ ᑯᕇ
ᕕᓕᓯ ᐋᓇᖃᑕᒃ
ᑯᓱᒐᓕᓂᖅ ᐃᓕᒪᓴᐅᑦ
ᑏᕕ ᐃᑦᑐᖅ
ᓇᑯᕐᒦᐳᒍᑦ ᐊᑦᔨᖑᐊᓂᒃ ᐊᑦᔨᓕᐅᕐᑕᐅᓯᒪᔪᓂᒃ ᓄᐃᑎᑦᓯᓯᒪᔪᑦ ᐃᓂᓪᓚᑎᕆᓯᒪᔪᓂᓪᓗ ᐅᑯᓂᖓ: ᐊᕙᑕᒃᑯᓂᒃ, ᑲᑎᕕᒃᑯᑦ ᐃᓕᓭᒍᑎᓕᐅᕐᑎᖏᓐᓂᒃ.
ᓇᑯᕐᒦᐳᒍᑦ ᐃᓄᒻᒪᕆᓂᒃ ᓂᐱᓕᐅᖃᑦᑕᓯᒪᔪᓂᒃ ᐊᕙᑕᒃᑯᓄᑦ ᑎᓕᔭᐅᒪᑦᓱᑎᒃ.
ᓇᑯᕐᒦᐳᒍᑦ ᑖᒃᑯᓂᖓ ᑲᑎᕐᓱᐃᖃᑦᑕᓚᐅᕐᑐᓂᒃ ᐃᓂᓪᓚᑎᕆᑦᓱᑎᓪᓗ:
ᐱᐊᑦᓯ ᐋᓇᖃᑕᒃ
ᒥᐊᔨ ᐃᓓᔭᓯᐊᐱᒃ
ᓴᓚ ᐹᓪᓚᔮᑦ
ᔨᐊᓯᑲ ᐋᕐᖓᖅ