‹ ᕿᓂᕈᑎᒧᑦ ᐅᑎᕈᑎᒃ
ᑐᓴᐅᒪᔭᐅᒋᐊᓖᑦ

ᐃᓂᕐᑎᕆᐅᑏᑦ

ᐃᓕᓐᓂᐊᑕᐅᔪᐃᑦ ᖃᐅᔨᒍᑎᕕᓃᑦ

ᐃᓕᓵᑦ ᐃᓂᕐᑎᑕᐅᒍᑎᒥᒃ ᑐᑭᓯᒪᓂᕐᑖᑎᓪᓗᒋᑦ ᓱᐊᖓᓂᐅᑦᔭᖏᒻᒪᑦ. ᑌᒣᑦᑑᓂᕐᒪᑕ ᐃᓄᐃᑦ ᐃᓂᕐᑎᑕᐅᑦᓯᐊᓱᑎᒃ ᓈᒻᒪᖏᑦᑐᒥᒃ ᐊᑐᓕᑐᐊᕐᒪᑕ, ᑐᑭᓯᑎᑕᐅᑦᓯᐊᐸᓐᓂᒪᑕ ᐃᓅᓯᑦᓯᐊᒥ ᐃᓅᓯᖃᖁᔭᐅᑦᓱᑎᒃ.


ᐃᓅᓯᖃᑦᓯᐊᓂᕐᒧᑦᓯᓚᑦᑐᓭᒍᑏᑦ

ᑖᓐᓇ ᐃᓕᓐᓂᐊᑎᑦᓯᒍᑎ ᐃᓅᓯᖃᑦᓯᐊᓂᕐᒧᑦ ᓯᓚᑦᑐᓭᒍᑎ, ᐊᓯᖏᓐᓂᒃ ᒪᑯᓂᖓ ᐃᓕᓐᓂᐊᑎᑦᓯᒍᑎᖃᕐᒥᓱᓂ:

ᓄᓇᒥ ᐊᓃᕐᑎᓯᓕᑐᐊᕋᒥ ᐃᓂᕐᑎᕆᓂᖅ ᐊᑑᑎᔭᐅᒋᐊᖃᓲᖅ.
ᐊᑦᔨᓕᐊᕕᓂᖅ ᕕᑭ ᐸᕋᐹᓐᑦᒧᑦ

ᐃᓕᓐᓂᐊᑎᑦᓯᓗᓂ ᐊᑑᑎᔭᐅᒍᓐᓇᑐᑦ

  1. ᐃᓕᓵᑦ, ᐃᓄᒻᒪᕇᑦ ᐅᖄᔭᕕᓂᖏᓐᓂᒃ ᐊᑐᐊᕐᓯᒍᓐᓇᑐᑦ, ᐃᓕᓭᔨᖓᓘᓐᓃᑦ ᐊᑐᐊᕐᓯᒍᓐᓇᑐᖅ ᑐᑭᓯᓇᕐᑎᓯᒋᐊᖃᑦᑕᓗᓂ.
  2. ᐊᑐᐊᕐᑕᐅᒌᑐᐊᕐᐸᑕ ᐃᓕᓵᑦ ᐅᖄᖃᑎᒋᓗᒋᑦ ᐃᓕᓭᔨᖓ ᐱᒋᐊᕐᑎᓯᑎᓪᓗᒍ, ᐅᓪᓗᒥᐅᓕᕐᑐᖅ ᐃᓂᕐᑎᕆᓃᑦ ᖃᓄᖅ ᐊᑦᔨᒋᔭᐅᖕᖏᓂᑦᓴᐅᓕᕐᒪᖔᑦ ᐅᖄᑎᓪᓗᒋᑦ.
  3. ᐃᓄᐃᑦ ᑌᑦᓱᒪᓂ ᐃᓂᕐᑎᕆᑦᓯᐊᐸᓐᓂᒪᑕ ᐃᓄᒃ ᓈᒻᒪᖏᑦᑐᒥᒃ ᐃᓅᓯᖃᖁᓇᒍ. ᐃᓄᒃ ᐃᓂᕐᑎᑕᐅᔪᐃᑦᑐᖅ ᓈᒻᒪᓈᕈᓐᓀᕋᑕᕐᓱᓂ ᐱᐅᓯᖃᓯᓲᒍᒻᒪᑦ, ᐃᓅᖃᑎᒥᓂᓪᓗ ᓈᒻᒪᖏᑦᑐᒥᒃ ᐱᐅᓯᖃᕝᕕᖃᓕᕐᓱᓂ. ᐅᓂᒃᑲᐅᔨᒋᐊᓪᓚᓗᒋᑦ ᖃᐅᔨᒪᔭᕐᓃᕕᑦ, ᐊᑑᑎᓯᒪᔭᕐᓃᕕᓪᓗ ᑐᑭᓯᓇᕐᑎᓯᒋᐊᕈᑎᖃᕈᓐᓇᑐᑎᑦ.
  4. ᐃᓂᕐᑎᑕᐅᒍᑎᒥᓂᒃ ᓲᓱᑦᓴᓯᐊᖁᓪᓗᒋᑦ ᐃᓄᒻᒪᕇᑦ ᐅᖃᐅᓯᕆᓯᒪᔭᖏᑦ ᒪᓕᓪᓗᒋᑦ. ᐃᓄᒻᒪᕇᑦ ᐊᑑᑎᓯᒪᔭᒥᓂᒃ ᐅᖄᒻᒪᑕ ᐊᑯᓂ ᐃᓅᓕᕋᒥᒃ ᓱᓕᔪᓂᒃ ᐅᖄᒻᒪᑕ.
  5. ᐃᓕᓵᑦ ᐊᑐᐊᕐᓯᒌᕐᓯᒪᓕᑐᐊᕈᑎᒃ, ᐊᑐᐊᕐᓯᕕᐅᒌᕐᓯᒪᓕᕈᑎᓪᓘᓃᑦ ᓇᒻᒥᓂᖅ ᐃᓱᒪᒋᔭᒥᓂᒃ, ᑐᑭᓯᔭᒥᓂᓪᓗ ᐊᓪᓚᑎᓪᓗᒋᑦ, ᑌᑦᓱᒪᓂ ᐃᓄᐃᑦ ᐃᓂᕐᑎᕆᐅᑎᒋᕙᑦᑕᕕᓂᖏᓐᓂᒃ.  
  6. ᐃᓄᒻᒪᕆᒻᒧᑦ ᐳᓛᕆᐊᕈᓐᓇᒥᔪᑦ, ᐁᕕᐅᓗᑎᓪᓘᓃᑦ ᐃᓂᕐᑎᑕᐅᒍᑎᒋᓯᒪᔭᒥᓂᒃ ᐅᖄᕕᖃᕆᐊᕐᑐᓗᑎᑦ, ᐅᖄᕕᐅᒋᐊᕐᑐᓗᑎᓪᓘᓃᑦ.

ᐅᖃᐅᓯᕐᑕᖏᑦ ᐃᓄᐃᑦ ᐱᕐᖁᓯᖏᑦᑎᒍᑦ

ᑖᒃᑯᐊ ᐃᓄᒻᒪᕇᑦ ᐃᓂᕐᑎᑕᐅᒍᑎᒋᖃᑦᑕᓯᒪᔭᖏᑦ ᐊᖓᔪᕐᖄᒥᓄᑦ, ᐃᓄᓐᓄᓗ. ᐃᓂᕐᑎᑕᐅᖃᑦᑕᓯᒪᒐᒥᒃ ᐃᓅᓯᖓ, ᐃᓅᖃᑎᒌᓐᓂᖓᓗ ᓲᖑᔫᓚᐅᕐᑐᖅ, ᓄᓪᓚᖓᑦᓯᐊᓱᑎᓪᓗ. ᑌᒫᒃ ᑭᓯᐊᓂ ᐱᑦᓯᐊᖃᑦᑕᐅᑎᓗᑎᒃ ᐃᓅᖃᑎᒌᑦᓯᐊᓂᐊᕋᒥᒃ.

ᐃᓂᕐᑎᕆᐅᑏᑦ

  • ᐃᓄᐃᑦ ᐃᓂᕐᑎᕆᐅᑎᖏᑦ ᐃᓄᓐᓂᒃ ᐃᓅᖃᑎᒌᑦᓯᐊᖁᔨᑦᓱᑎᒃ. ᐱᐅᓯᐅᑦᓯᐊᖏᑦᑐᑦ    ᐊᑐᕐᑕᐅᓕᕋᒥᒃ ᐃᑐᒥᑦᓯᓲᒍᒻᒪᑕ ᐃᓅᖃᑎᒌᓂᒃ.
  • ᕿᑐᕐᖓᖅ ᑐᑭᓯᒪᑎᑕᐅᒍᑎᒥᓂᒃ ᐊᑐᕐᓂᓗᒋᐊᑐᐃᓐᓇᖃᑦᑕᐸᑦ ᐃᓂᕐᑎᑕᐅᒋᐊᓕᒃ   ᐊᖏᕐᑎᑕᐅᒋᐊᓕᒃ, ᐊᖏᕐᑎᕆᐊᓪᓚᕆᓪᓗᒍ ᓱᓇᐅᑦᓴᖏᓕᑉᐸᓕᐊᑐᐃᓐᓇᓲᒍᒻᒪᑕ ᐊᖓᔪᕐᖄᒥᓂᒃ, ᐃᓅᖃᑎᒥᓂᓪᓗ.
  • ᐃᓅᖃᑎᒥᓂᒃ ᒪᖓᑦᓯᖁᔭᐅᕙᓐᓂᖏᑦᑐᑦ. “ᐅᖃᐅᓯᑦᓴᖃᕈᓂᒎᖅ” ᐃᓄᒻᒥᒃ ᑌᑦᓱᒥᖓ ᐅᐯᕙᑦᑐᕕᓃᑦ, ᐅᖄᖃᑎᒋᓯᑦᓱᒍ.
  • ᐃᓂᕐᑎᕆᕙᒋᐊᖃᕐᖁᒍᑦ ᑎᓪᓕᑐᑦᓴᐅᖏᓐᓂᒥᒃ, ᓴᓪᓗᑐᑦᓴᐅᖏᓐᓂᒥᒃ, ᐊᕐᓇᑖᕆᓂᐊᖕᖏᑕᒥᓂᒃ, ᐊᖑᑎᑖᕆᓂᐊᖕᖏᑕᒥᓂᓪᓗ ᑲᒪᒋᐊᖃᖕᖏᓂᖏᓐᓂᒃ, ᐅᖃᐅᓯᕐᓗᒥᓪᓘᓃᑦ ᒥᓇᕆᐊᖃᖕᖏᓂᖏᓐᓂᒃ.
  • ᐃᓅᖃᑎᓐᓃᕕᓯ ᐊᑭᕋᕐᑐᕋᓱᐊᕐᑐᕕᓂᐅᒐᓗᐊᕈᑦᓯ ᑭᖑᓂᖓᓂ ᐃᓱᕐᕆᓛᑦᔭᖏᓪᓚᓯ.
  • ᐱᐅᖕᖏᑐᒥᒃ ᖃᐅᔨᒪᑦᓱᓂ ᐃᓛᓃᑦᑐᖅ ᑖᓐᓇ ᐸᓯᔭᐅᒍᑎᑦᓴᓕᒃ, ᐃᓄᓐᓄᑦ ᑌᒣᖏᓐᓇᑐᕆᔭᐅᑦᓱᓂ ᐅᓇᒻᒥᒋᔭᐅᒋᐊᖃᖕᖏᑐᖅ, ᐃᓱᒪᖓᓂᒃ ᐃᓅᑉ ᖃᐅᔨᒪᔪᖃᑦᔭᖏᒻᒪᑦ. “ᐃᓅᖃᑎᑦᓯᓂᒃ ᐅᓇᒻᒥᓱᑉᐸᓂᐊᑦᔭᖏᓪᓚᓯ”-ᓚᔭᐅᕙᓚᐅᕋᑦᑕ ᐊᔪᕿᑦᑐᐃᔨᐅᕙᓚᐅᕐᑐᓄᑦ, ᑌᒣᑦᑑᒋᐊᖃᕐᐳᒍᑦ.
  • ᐃᓚᒥᓄᑦ ᐃᓂᕐᑎᑕᕕᓂᖅ ᓇᕐᖓᓂᕐᒥᒃ, “ᐃᓅᓯᕗᒎᖅ ᐱᒋᖕᖏᓇᑦᑎᒍ.” ᓇᖕᖓᖁᔭᐅᓯᒪᖕᖏᑐᒍᑦ, ᓇᕐᖓᕈᑎᐅᔪᑦ ᑌᒣᓕᑐᐃᓐᓇᕆᐊᖃᕐᒪᑕ.
  • ᕿᑐᕐᖔᐱᓯᓐᓂᒃ ᑕᑯᓐᓈᓂᕐᓗᑫᕙᓐᓂᐊᔭᖏᓪᓚᓯ -ᒋᐊᖃᑦᔭᖏᓐᓇᑕ. ᑕᒪᒃᑯᐊ ᓯᓚᑐᒍᑎᒋᒋᐊᖃᓕᕐᑕᕗᑦ ᐃᓄᒻᒪᕆᑎᒍᑦ ᐅᐃᕖᓐᓇᑐᐃᑦ, ᐃᑦᓯᒎᓐᓃᑦ, ᐃᒥᐊᓗᐃᑦ, ᓰᑲᔨᐊᕐᓗᐃᓗ.
  • ᑕᒪᒃᑯᐊ ᐃᓄᐃᑦ ᐱᐅᓯᕆᕙᑦᑕᕕᓂᖏᑦ ᐊᓯᐅᑐᐃᓐᓇᓚᖓᓕᕐᒪᑕ ᐅᓂᒃᑳᕋᓱᐊᕐᖁᖓ, ᖃᖓ ᑐᖁᕕᑦᓴᕗᑦ ᖃᐅᔨᒪᑦᔭᖏᓐᓇᑎᒍᑦ, ᐅᐸᓗᙰᕐᓯᒪᑦᓯᐊᕆᐊᖃᕐᓂᕋᕐᑕᐅᒐᑦᑕ ᓱᓕᔪᖅ. ᐃᓚᕗᓪᓗ ᐅᐸᓗᕈᑎᒋᓂᐊᕐᑐᓴᕆᖕᖏᓚᕗᑦ -ᓚᔭᐅᓲᒍᒐᑦᑕ ᑕᒪᓐᓇ ᓱᓪᓕᑕᐅᒻᒪᑦ ᐃᓱᒪᖃᑦᓯᐊᓂᐊᕐᖁᒍᑦ. ᑖᕙᖕᖓᓂᑦ ᔩᓱᓯ ᑎᑭᒍᒫᕐᓂᕋᕐᑕᐅᒪᑦ ᓂᕆᐅᕝᕕᒋᖕᖏᑕᑦᑎᒍᑦ, ᓄᕗᔦᒎᖅ ᐅᖓᑖᒍᑦ ᑎᑭᓛᕐᓂᐊᓂᕋᕐᑕᐅᓯᒪᒻᒪᑦ, ᖃᖓᐅᔪᒫᕐᒪᖔᑦ ᖃᐅᔨᒪᑦᔭᖏᓐᓇᑕ. ᐊᕐᓱᕈᓐᓇᓲᕌᓘᒻᒪᑦ, ᐃᓚᖓᒍᓪᓗ ᐊᓕᐊᓇᕐᑑᒐᓗᐊᕐᓱᓂ ᑌᒣᑦᑑᒪᑦ ᐃᓅᓯᕗᑦ.
  • “ᐋᓐᓂᐊᓴᓕᐅᕐᓱᑕᒎᖅ ᐊᑭᕋᕐᑐᓲᒍᒐᑦᑕ.” ᐊᑭᕋᕐᑐᐸᓐᓂᐊᔭᖏᓪᓚᓯ ᐊᓈᓇᒃᑯᓯᓐᓂᒃ, ᐊᑖᑕᒃᑯᓯᓐᓂᒃ, ᐁᑉᐸᑯᑦᓯᓂᒃ, ᐋᓐᓂᐊᓗᐊᕈᒫᖕᖏᓇᑦᓯ. ᐃᓅᖃᑎᑦᓯᓃᕕᓯ ᓱᓇᐅᑦᓴᖏᑦᑐᐊᓘᕙᓐᓂᐊᔭᖏᓪᓚᓯ, ᐃᓱᕐᕆᓂᕐᓴᐅᓛᕋᑦᓯ, ᐃᓱᒫᓗᖕᖏᓂᕐᓴᐅᓛᕋᑦᓯᓗ, ᒫᓂ ᓄᓇᒥ ᐃᓅᖏᓐᓇᓂᐊᑦᔭᖏᓐᓇᓯ.
  • ᐱᔭᑦᓴᖃᕐᑎᓗᒍ ᑲᒃᑲᓛᖅ ᐱᒋᐅᕐᓂᐅᓕᑐᐊᕋᒥᒃ ᓯᓂᑐᐃᓐᓇᑎᑕᐅᓲᒍᓐᓂᔭᖏᑦᑐᑦ ᓯᓂᒐᓗᐊᕐᒪᑕ ᑐᐹᕐᑕᐅᓲᕕᓃᑦ.

ᖃᕝᕙᑎᑦᓯᒍᑏᑦ

ᓇᑯᕐᒦᒪᕆᑉᐳᒍᑦ ᐃᓄᐃᑦ ᐱᐅᓯᕆᓯᒪᔭᖏᓐᓂᒃ ᐅᖄᖃᑦᑕᓯᒪᔪᓂᒃ ᐅᑯᓂᖓ:

ᔮᓂ ᒪᓄᒥ ᐃᓄᑉᐸᒃ
ᐋᑦᑕᒥ ᓂᕕᐊᕐᓯ
ᑖᒧᓯ ᖁᒪᖅ
ᐄᕙ ᐃᓕᒪᓴᐅᑦ
ᐃᔨᑦᓯᐊᖅ ᓯᒥᒐᖅ
ᑑᒪᓯ ᑲᓪᓚᒃ

ᒨᓱᓯ ᐱᐅᕖ
ᒥᑎᐊᕐᔪᒃ ᓇᑉᐹᓗᒃ
ᕃᑭ ᓇᔪᒻᒥ ᐊᐅᒋᐊᖅ
ᐋᓂ ᐊᓚᑯ (ᑲᖏᕐᓱᔪᐊᖅ)
ᐹᓴ ᓯᒥᒐᖅ
ᕿᐱᑕᖅ ᐊᕐᓀᑐᖅ

ᐁᓴ ᐆᒪᔪᐊᓗᒃ
ᓈᓚ ᓇᑉᐹᓗᒃ
ᐋᓂ ᑯᕇ
ᕕᓕᓯ ᐋᓇᖃᑕᒃ
ᑯᓱᒐᓕᓂᖅ ᐃᓕᒪᓴᐅᑦ
ᑏᕕ ᐃᑦᑐᖅ

ᓇᑯᕐᒦᐳᒍᑦ ᐊᑦᔨᖑᐊᓂᒃ ᐊᑦᔨᓕᐅᕐᑕᐅᓯᒪᔪᓂᒃ ᓄᐃᑎᑦᓯᓯᒪᔪᑦ ᐃᓂᓪᓚᑎᕆᓯᒪᔪᓂᓪᓗ ᐅᑯᓂᖓ: ᐊᕙᑕᒃᑯᓂᒃ, ᑲᑎᕕᒃᑯᑦ ᐃᓕᓭᒍᑎᓕᐅᕐᑎᖏᓐᓂᒃ.

ᓇᑯᕐᒦᐳᒍᑦ ᐃᓄᒻᒪᕆᓂᒃ ᓂᐱᓕᐅᖃᑦᑕᓯᒪᔪᓂᒃ ᐊᕙᑕᒃᑯᓄᑦ ᑎᓕᔭᐅᒪᑦᓱᑎᒃ.

ᓇᑯᕐᒦᐳᒍᑦ ᑖᒃᑯᓂᖓ ᑲᑎᕐᓱᐃᖃᑦᑕᓚᐅᕐᑐᓂᒃ ᐃᓂᓪᓚᑎᕆᑦᓱᑎᓪᓗ:

ᐱᐊᑦᓯ ᐋᓇᖃᑕᒃ
ᒥᐊᔨ ᐃᓓᔭᓯᐊᐱᒃ

ᓴᓚ ᐹᓪᓚᔮᑦ

ᔨᐊᓯᑲ ᐋᕐᖓᖅ

ᐊᐱᕐᓲᑎᑦᓴᖃᕈᕕᑦ ᐅᖃᐅᓯᑦᓴᖃᕈᕕᓪᓘᓃᑦ, ᖃᐅᔨᓴᕐᕕᒋᑎᒍ.

ᖃᐅᔨᓴᕐᕕᒋᑎᒍ