‹ ᕿᓂᕈᑎᒧᑦ ᐅᑎᕈᑎᒃ
ᑐᓴᐅᒪᔭᐅᒋᐊᓖᑦ

ᓂᕿᒥᒃ ᐊᕕᖃᑎᒌᓐᓂᖅ

ᐃᓕᓐᓂᐊᑕᐅᔪᐃᑦ ᖃᐅᔨᒍᑎᕕᓃᑦ

ᐃᓕᓵᑦ ᓂᕿᒥᒃ ᐊᕕᖃᑎᒌᑦᓯᐊᕆᐊᖃᕐᓂᒥᒃ ᑐᑭᓯᒪᓂᕐᑖᑎᓪᓗᒋᑦ. ᑌᒣᑦᑑᓂᕐᒪᑕ ᐃᓄᐃᑦ, ᐊᕕᖃᑎᖃᑦᓯᐊᕋᒥᒃ ᐃᓄᓐᓂᒃ ᐊᓐᓇᑎᑦᓯᕙᓐᓂᒪᑕ, ᑕᒪᐅᖓ ᑎᑭᓚᕿᓯᒪᒐᑦᑕ ᐅᓪᓗᒥᒧᑦ.  


ᐃᓅᓯᖃᑦᓯᐊᓂᕐᒧᑦᓯᓚᑦᑐᓭᒍᑏᑦ

ᑖᓐᓇ ᐃᓕᓐᓂᐊᑎᑦᓯᒍᑎ ᐃᓅᓯᖃᑦᓯᐊᓂᕐᒧᑦ ᓯᓚᑦᑐᓭᒍᑎ, ᐊᓯᖏᓐᓂᒃ ᒪᑯᓂᖓ ᐃᓕᓐᓂᐊᑎᑦᓯᒍᑎᖃᕐᒥᓱᓂ:

ᐃᓄᑦᔪᐊᒥ ᓂᕆᒻᒫᓂᖏᑦ
ᓵᓕ ᓇᐅᒃᑲᕈᐊᑉ ᐊᑦᔨᖁᑎᖓ

ᐃᓕᓐᓂᐊᑎᑦᓯᓗᓂ ᐊᑑᑎᔭᐅᒍᓐᓇᑐᑦ

  1. ᐃᓕᓵᑦ, ᐃᓄᒻᒪᕇᑦ ᐅᖄᔭᕕᓂᖏᓐᓂᒃ ᐊᑐᐊᕐᓯᒍᓐᓇᑐᑦ, ᐃᓕᓭᔨᖓᓘᓐᓃᑦ ᐊᑐᐊᕐᓯᒍᓐᓇᑐᖅ ᑐᑭᓯᓇᕐᑎᓯᒋᐊᖃᑦᑕᓗᓂ.
  2. ᐊᑐᐊᕐᑕᐅᒌᑐᐊᕐᐸᑕ ᐃᓕᓵᑦ ᐅᖄᖃᑎᒋᓗᒋᑦ ᐃᓕᓭᔨᖓ ᐱᒋᐊᕐᑎᓯᑎᓪᓗᒍ, ᐅᓪᓗᒥᐅᓕᕐᑐᖅ ᖃᓄᖅ ᐊᑦᔨᒋᔭᐅᖕᖏᓂᑦᓴᐅᓕᕐᒪᖔᑦ ᐊᕕᖃᑎᒌᓐᓂᖅ ᐅᖄᑎᓪᓗᒋᑦ.
  3. ᐃᓄᐃᑦ ᑌᑦᓱᒪᓂ ᓂᕿᒥᒃ ᐊᕕᖃᑎᒌᓐᓂᒥᒃ ᐱᒻᒪᕆᐅᔪᖁᑎᖃᕐᓂᕕᓂᖏᓐᓂᒃ    ᐅᓂᒃᑲᐅᔨᒋᐊᓪᓚᓗᒋᑦ ᖃᐅᔨᒪᔭᕐᓃᕕᑦ, ᐊᑑᑎᓯᒪᔭᕐᓃᕕᓪᓗ ᑐᑭᓯᓇᕐᑎᓯᒋᐊᕈᑎᖃᕈᓐᓇᑐᑎᑦ.
  4. ᓂᕿᒥᒃ ᐊᕕᖃᑎᒌᓐᓂᒥᒃ ᓲᓱᑦᓴᓯᐊᖁᓪᓗᒋᑦ ᐃᓄᒻᒪᕇᑦ ᐅᖃᐅᓯᕆᓯᒪᔭᖏᑦ ᒪᓕᓪᓗᒋᑦ. ᐃᓄᒻᒪᕇᑦ ᐊᑑᑎᓯᒪᔭᒥᓂᒃ ᐅᖄᒻᒪᑕ ᐊᑯᓂ ᐃᓅᓕᕋᒥᒃ ᓱᓕᔪᓂᒃ ᐅᖄᒻᒪᑕ.
  5. ᐃᓕᓵᑦ ᐊᑐᐊᕐᓯᒌᕐᓯᒪᓕᑐᐊᕈᑎᒃ, ᐊᑐᐊᕐᓯᕕᐅᒌᕐᓯᒪᓕᕈᑎᓪᓘᓃᑦ ᓇᒻᒥᓂᖅ ᐃᓱᒪᒋᔭᒥᓂᒃ,    ᑐᑭᓯᔭᒥᓂᓪᓗ ᐊᓪᓚᑎᓪᓗᒋᑦ, ᑌᑦᓱᒪᓂ ᐃᓄᐃᑦ ᓂᕿᒥᒃ ᐊᕕᖃᑎᒌᓐᓂᒨᓕᖓᔪᓂᒃ.  
  6. ᐃᓄᒻᒪᕆᒻᒧᑦ ᐳᓛᕆᐊᕈᓐᓇᒥᔪᑦ, ᐁᕕᐅᓗᑎᓪᓘᓃᑦ ᓂᕿᒥᒃ ᐊᕕᖃᑎᒌᑦᓯᐊᐸᓐᓂᕕᓂᖏᓐᓂᒃ ᐃᓄᐃᑦ, ᐅᖄᕕᐅᒋᐊᕐᑐᓗᑎᒃ.

ᐅᖃᐅᓯᕐᑕᖏᑦ ᐃᓄᐃᑦ ᐱᕐᖁᓯᖏᑦᑎᒍᑦ:

ᑖᒃᑯᐊ ᐃᓄᒻᒪᕇᑦ ᐅᖃᐅᑎᔭᐅᒍᑎᒋᖃᑦᑕᓯᒪᔭᖏᑦ ᓂᕿᒥᒃ ᐊᕕᖃᑎᒌᑦᓯᐊᖃᔭᐅᖃᑦᑕᓯᒪᔪᑦ ᑌᒣᑦᑐᒥᒃ ᐱᐅᓯᖃᕐᑎᑕᐅᑦᓱᑎᒃ. ᑌᒣᑦᑑᓱᑎᒃ ᐊᓐᓇᐅᒪᒍᓐᓇᑐᕕᓃᑦ, ᐆᒪᔪᓄᑦ ᑭᓯᐊᓂ ᐊᓐᓇᒍᑎᖃᕐᓱᑎᒃ, ᐊᕕᖃᑎᒌᑦᓯᐊᕋᒥᓪᓗ ᐃᓅᖃᑎᒥᓂᒃ ᐊᓐᓇᑎᑦᓯᓱᑎᒃ. ᑌᒫᒃ ᐱᐅᓯᓕᕕᓃᑦ.

ᓂᕿᒥᒃ ᐊᕕᖃᑎᒌᓐᓂᖅ

  • ᐃᓄᐃᑦ ᓯᕗᓪᓕᕗᑦ ᓂᕿᒥᒃ ᐊᕕᖃᑎᒌᓐᓂᒥᒃ ᐱᐅᓯᖃᕐᑐᓴᔭᑐᙯᑦ, ᓂᕿᒥᒃ ᑭᓯᐊᓂ ᐃᓅᒍᑎᖃᕈᓐᓇᓚᐅᕋᒥᒃ.
  • ᐃᓅᔪᒍᑦ ᐊᕕᖃᑎᖃᓐᓂᒥᒃ ᐱᐅᓯᖃᕐᑐᓴᔭᑐᖃᐅᔪᒍᑦ. ᓯᕗᓕᕗᑦ ᐊᕕᖃᑎᒌᓐᓂᒥᒃ ᐱᐅᓯᖃᕐᑐᑐᖃᐅᓯᒪᔪᑦ ᐃᓅᖃᑎᒥᓂᒃ ᐱᑎᑦᓯᓂᕐᒥᒃ, ᓱᓇᐅᒐᓗᐊᕐᐸᑦ, ᓂᕿᐅᑉᐸᓗ. ᐁᑦᑑᑎᖃᑐᐃᓐᓇᓂᕐᒥᒃ ᐊᑭᖃᕐᑎᓇᒍ ᐱᐅᓯᓕᑐᖃᐅᔪᑦ. ᐱᐅᓯᕆᔭᐅᑦᓱᓂ   ᐃᑲᔪᖃᑎᒌᒍᑎᒋᑦᓱᓂᐅᓪᓗ, ᐊᓕᐊᒋᑦᓱᒍᓗ, ᐃᓅᓯᑦᓯᐊᒍᑦᓱᓂᓗ. ᐃᓅᑉ ᐃᓱᕐᕆᓯᕈᓐᓇᓂᖓᓄᑦ ᐃᓕᖓᔪᖅ.
  • ᓯᕗᓪᓕᕗᑦ ᐊᕐᓱᕈᓐᓇᑐᒦᑦᑐᐊᓘᒐᓗᐊᕋᒥᒃ, ᓂᕿᓗ ᒥᑭᔪᐊᐱᐅᒐᓗᐊᕐᒪᑦ ᐊᕕᑦᓯᐊᑕᐅᕙᑦᑐᕕᓂᖅ, ᐱᔪᑑᔪᖃᕆᐊᖃᕐᑎᓇᒍ ᐃᓅᓯᖃᕐᑐᕕᓃᑦ. ᐆᒪᔪᕆᐅᕐᑐᖅ   ᐱᓪᓚᕆᐅᑎᑕᐅᓐᓂᒪᑦ ᐱᔭᕆᐅᕈᑎᖓ ᐊᕕᖃᑎᒌᑦᓯᐊᕆᐊᖃᕐᓂᒧᑦ ᑐᑭᖃᕐᑎᑕᐅᔪᕕᓂᖅ. ᐊᔪᕐᓴᓕᑐᐊᕋᒥᑦ ᓱᒐᓗᑦᓱᑎᒃ ᓱᓇᑐᐃᓐᓇᒥᒃ ᐊᕕᖃᑎᖃᑦᓯᐊᐸᑦᑐᕕᓃᑦ, ᐃᒻᒥᓂᑐᐃᓐᓇᖅ ᐱᒍᒪᓂᑐᐃᓐᓇᒥᓂᒃ ᐃᓱᒪᒐᑎᒃ. ᑌᒪᖕᖓᑦ ᐱᐊᕋᐅᓂᖓᓂ ᐊᕕᖃᑎᖃᕆᐊᖃᓐᓂᒥᒃ ᖃᐅᔨᒪᑎᑕᐅᕙᑦᓱᑎᒃ ᐊᕕᖃᑎᖃᑉᐸᓱᑎᒃ. ᐊᓕᐊᑦᓱᑎᓪᓗ ᐊᕕᖃᑎᖃᕆᐊᒥᒃ ᐃᓄᐃᑦ ᐱᐅᓯᓕᑦᓴᔦᑦ.
  • ᐃᓄᐃᑦ ᐃᑲᔪᕐᑎᒌᑉᐸᓚᐅᕐᑐᑦ ᐅᓪᓗᑕᒫᑦ ᓂᕿᑎᒍᑦ. ᐊᖑᑏᑦ ᐆᒪᔪᑐᐊᕋᒥᒃ ᐊᕕᐅᕐᖃᓯᐊᕐᓱᒋᑦ ᓂᖏᕐᑎᓯᕙᓚᐅᕐᑐᑦ ᐱᔪᑑᓂᐅᔭᕋᑎᒃ. ᓄᓇᕐᖃᑎᒋᖕᖏᑕᕋᓗᐊᒥᓂᒃ ᓂᕿᑎᒍᑦ ᐸᔪᑉᐸᓚᐅᕐᑐᑦ, ᖃᓪᓗᓂᑦᔨᐊᑐᕕᓂᒐᓭᑦ ᓂᐅᕕᕐᕕᑕᓕᒧᑦ ᐊᕕᖃᑎᖃᑉᐸᓚᐅᕐᑐᑦ, ᓴᓇᐅᒐᕐᒥᓘᓐᓃᑦ (ᓂᕿᑦᓴᔭᒥᓪᓘᓃᑦ), ᐳᓐᓂᒥᓪᓘᓃᑦ, ᐳᑦᔪᓯᐅᑎᒥᓪᓘᓃᑦ (ᐳᑦᔪᓴᐅᑎᒥᓪᓘᓃᑦ), ᓱᓇᑐᐃᓐᓇᓂᓪᓘᓃᑦ ᐁᑦᑐᐃᓱᑎᒃ ᐊᑭᖃᖕᖏᑐᓂᒃ.
  • ᐃᓄᐃᑦ ᓂᕿᒥᒃ ᐊᕕᑦᓯᐊᓲᒍᓕᕐᓱᑎᒃ ᐃᑲᔪᕐᑎᒌᓪᓗᑐᕈᑕᐅᒻᒪᑦ ᐃᑲᔪᕐᑕᐅᒍᑎᒋᓲᕆᓕᕋᒃᑯ    ᐃᓄᓐᓄᑦ, ᐃᒫᒃ ᐃᓚᖃᕐᓱᓂ ᐊᒥᓱᓂᒃ ᐃᑲᔪᖁᑎᓪᓚᕆᐅᒻᒪᑦ ᖃᐅᔨᒪᔪᖓ.
  • ᑖᕙᓂ ᓄᓇᖏᕐᓂᕋᕐᒦᑐᐊᓘᕙᓚᐅᕋᑦᑕ ᐊᒥᓱᐃᕌᓘᑦᓱᑕ, ᐊᒥᓲᑦᔮᓘᕙᓚᐅᕐᒪᑦ ᓇᑦᓯᖅ ᐊᑕᐅᓯᖅ ᑳᑦᑐᓄᑦ. ᓇᑦᓯᒧᑦ ᑭᓯᐊᓂ ᐆᒪᒐᓱᐊᕐᐸᓚᐅᕋᑦᑕ ᑕᕆᐅᕐᒥᐅᒍᑦᓱᑕ, ᑕᓴᒪᓂ ᕿᑭᑦᑕᓚᑳᓂᒃ ᐴᑲᕐᑕᖏᑦᑐᒦᒐᓱᐊᕐᐸᓚᐅᕐᒥᒐᑦᑕᓘᓐᓃᑦ. ᐊᐅᓚᔨᒐᒪ ᓇᑦᓯᑕᐅᔪᐊᐱᒃ   ᒥᑭᔪᐊᐱᐅᒐᓗᐊᕐᒪᑦ ᓈᒍᑕᐅᕙᓚᐅᕐᒪᑦ. ᐊᓕᐊᑉᐳᖓ ᑌᒪᖕᖓᑦ ᐊᔪᕐᓴᓇᖕᖏᑐᒧᑦ ᑎᑭᑎᑕᐅᓯᒪᓕᕋᑕᕐᒥᒐᑦᑕ ᑌᒣᑦᑐᑰᕐᐸᓚᐅᕋᓗᐊᕐᓱᑕ. ᑌᒫᒃ ᐊᓕᐊᑦᑐᓴᐅᕗᒍᑦ ᐃᓄᒻᒪᕆᐅᓂᕐᓴᐅᔪᒍᑦ. ᑕᒪᒃᑯᐊᓕ ᓄᑖᒍᓕᕐᑐᐃᑦ ᑲᑉᐱᐊᓇᕐᑐᒥᒃ ᖃᐅᔨᓯᒪᖕᖏᑐᑦ. ᐃᓄᑐᖃᐅᓂᕐᓴᑎᒍᓪᓕ ᐃᓱᒪᔪᒍᑦ ᐊᔪᕐᓇᓂᕆᕙᓚᐅᕐᑕᖓᓂᒃ ᐆᒪᔪᐃᑦ.
  • ᒥᑭᔪᐊᐱᐅᒐᓗᐊᕐᒪᑦ ᓂᕿ ᐁᑦᑑᑎᓯᕙᓚᐅᕐᑐᑦ. ᐃᖃᓗᒃ ᐊᑕᐅᓯᐅᒐᓗᐊᕐᒪᑦ ᐃᒐᑦᓱᒍ ᐸᔫᑎᐅᕙᓚᐅᕐᑐᖅ, ᐊᒡᒍᑕᐅᓯᕙᓚᐅᕐᑐᖅ. ᐃᓪᓘᑉ ᐃᓗᐊᓃᑦᑐᓕᒫᑦ ᐊᕕᑦᑎᑕᐅᒻᒥᓱᑎᒃ ᓂᕿᒥᒃ, ᐊᖏᔫᖕᖏᑲᓗᐊᕐᒪᑦ ᓂᕿ.
  • ᒥᑭᔪᐊᐱᐅᒐᓗᐊᕐᒪᑦ ᓂᕿ ᐁᑦᑑᑎᓯᕙᓚᐅᕐᑐᑦ. ᐃᖃᓗᒃ ᐊᑕᐅᓯᐅᒐᓗᐊᕐᒪᑦ ᐃᒐᑦᓱᒍ ᐸᔫᑎᐅᕙᓚᐅᕐᑐᖅ, ᐊᒡᒍᑕᐅᓯᕙᓚᐅᕐᑐᖅ. ᐃᓪᓘᑉ ᐃᓗᐊᓃᑦᑐᓕᒫᑦ ᐊᕕᑦᑎᑕᐅᒻᒥᓱᑎᒃ ᓂᕿᒥᒃ, ᐊᖏᔫᖕᖏᑲᓗᐊᕐᒪᑦ ᓂᕿ.
  • ᓯᕗᓕᕗᑦ ᐊᕐᓱᕈᓐᓇᑐᒦᒐᓗᐊᕋᒥᒃ ᓂᕿᒐᓚᒻᒥᒃ ᐊᕕᑉᐸᓚᐅᕐᑐᑦ ᐱᔪᑑᔪᖃᕆᐊᖃᕐᑎᓇᒍ. ᐱᐊᕋᐅᖏᓐᓇᓱᑎᒃ ᐊᕕᖃᑎᖃᕆᐅᕐᓴᑎᑕᐅᕙᓚᐅᕐᑐᑦ ᐃᓅᑦᔪᓯᖓᑕ ᐃᓚᒋᒻᒪᐅᒃ.
  • ᐊᕿᒡᒋᖅ ᐊᑕᐅᓯᐅᒐᓗᐊᕐᒪᑦ ᐊᕕᑕᐅᒍᓐᓇᑐᕕᓂᖅ ᓄᓇᓕᓐᓄᑦ. ᑐᓴᐅᒪᓇᕐᒥᔪᖅ ᐊᕐᓇᖅ ᓂᕿᒥᒃ ᐊᒡᒍᐃᓱᓂ ᓂᕆᔭᑦᓴᓂᒃ. ᐅᓗᒻᒥᓂᒃ ᐊᐅᒥᑎᕐᓯᒪᔪᒥᒃ ᐊᓗᑦᑐᑐᐃᓐᓇᓱᓂ ᓈᒻᒪᓯᔪᕕᓂᕐᒥᒃ, ᓂᕿᑕᖓᓂᓪᓘᓃᑦ ᓂᕆᖕᖏᑲᓗᐊᕋᒥ. ᑌᒫᒃ ᐊᕕᖃᑎᒌᓐᓂᖅ ᐱᓪᓚᕆᐅᓂᖃᒻᒪᑦ ᐃᓄᑦᑎᒍᑦ.
  • ᐃᓄᒃ ᐃᓄᑦᓯᐊᒍᒐᓗᐊᕋᒥ ᓂᕿᒧᑦ ᐊᓕᐊᑦᓴᑫᖕᖏᑐᐊᕋᒥ ᐊᓕᐊᓇᖕᖏᓗᑐᕐᐳᖅ. ᓂᕿᒥᒃ ᑲᒪᑦᓯᐊᑐᐊᕋᒥ ᐃᓚᒋᔭᐅᓪᓚᕆᑦᑐᖅ, ᖃᐅᔨᒪᓪᓗᑐᕐᑕᕋ ᑕᒪᓐᓇ !
  • ᓂᕿᒥᒃ ᒥᓐᓂᖃᔭᖕᖏᑐᐃᑦ ᐱᒍᐊᕐᓂᓴᐅᕙᓚᐅᕐᑐᑦ, ᐊᖑᓱᕐᓂᓴᐅᕙᓚᐅᕐᑐᑦ, ᑭᖑᕝᕙᕈᑦᔭᐅᒍᐊᕐᓂᓭᑦ. ᓄᖑᒍᑦᔭᐅᒍᐊᕐᓂᓭᑦ ᒥᓐᓂᑑᑦ. ᐃᓅᓯᕐᒦᒪᑦ ᒥᓐᓂᓂᖅ ᐊᕕᖁᔭᐅᕙᓚᐅᕐᑐᑦ. ᒥᓐᓂᑐᐃᑦ ᓄᐃᑕᑎᑦᓯᖏᒃᑲᓗᐊᕋᒥᒃ ᑌᒣᖁᔭᐅᕙᓚᐅᖕᖏᑐᑦ,    ᑮᓇᐅᔭᒐᓚᒃ. ᓱᓇᑐᐃᓐᓇᓕᒫᖅ ᒥᓐᓂᒋᔭᐅᒋᐊᖃᖕᖏᑐᖅ. ᒥᓐᓂᒍᑎᔭᕕᓂᖅ ᐊᑭᐅᕆᐊᖃᖕᖏᑐᖅ, ᐃᕐᖃᐅᒪᒋᔭᐅᒋᐊᖃᖕᖏᑐᖅ. ᑌᒫᑦᓭᓇᖅ ᐱᑎᑐᐃᓐᓇᓗᒍ ᒥᓐᓂᖁᑦᔨᔭᕈᓐᓀᓗᒍ. ᐊᔪᕐᓴᓗᐊᖕᖑᐊᓂᒃᑯᑦ ᐱᓕᕋᒥ ᒥᓐᓂᓕᓲᑦ. 
  • ᓂᕿ ᒥᓐᓂᒋᔭᐅᕙᓚᐅᖕᖏᑐᖅ. ᐊᕕᑦᓯᐊᑕᐅᕙᓚᐅᕐᑐᖅ ᓂᕿ ᐊᒡᒍᑕᐅᑦᓱᓂ ᐸᔪᒍᑕᐅᒻᒪᑦ. ᐃᓛᓐᓂ ᐃᓱᒪᓇᕐᐸᓚᐅᕐᑐᖅ, “ᑕᒐᓕ ᓂᕿᒋᑐᐃᓐᓇᕈᑦᑎᒍ ᐊᑯᓂ ᑳᓂᐊᖏᓇᑦᑕ.” ᑭᓯᐊᓂ ᐅᖃᐅᑎᔭᐅᑦᓯᐊᐸᓚᐅᕐᑐᒍᑦ ᐁᑦᑑᑎᒋᓗᒍ, ᐊᕕᑦᓯᐊᓗᒍ ᐅᑎᓛᕐᒥᒪᑦ ᐁᑦᑑᑎᐅᒐᓗᐊᕈᓂ.   ᓂᕿᒥᒃ ᐃᒃᑯᓄᖓ ᐸᔪᑦᑕᐅᓂᖕᖏᑲᓗᐊᕈᕕᑦ ! ᐸᔪᑉᐸᑐᓂᒃ ᑌᒫᑦᓭᓇᖅ ᐊᑦᔨᖓᓂᒃ ᐸᔪᒻᒥᓗᑎᑦ. ᐊᓈᓇᑦᓯᐊᑯᑦ, ᐊᑖᑕᑦᓯᐊᑯᑦ ᓂᕿᒥ ᑐᓂᓯᕙᓐᓂᒪᑕ, ᑖᒃᑯᐊ ᑭᖑᕚᖏᑦ ᑐᓂᔭᐅᒍᓐᓇᒥᔪᑦ ᓂᕿᒥᒃ.
  • ᐃᒻᒥᓂᕿᓗᑕ ᐆᒪᔪᕐᓯᐅᕆᐊᕋᓱᖁᔭᐅᕙᓚᐅᕐᑐᒍᑦ, “ᓂᕿᒎᖅ ᓄᖑᒍᐊᕐᑑᒪᑦ”, ᒥᓐᓂᐸᖁᔭᐅᒐᑕᓗ. “ᐅᖓᑖᓄᒎᖅ ᐱᑎᑕᐅᑐᐃᓐᓇᐸᓐᓂᐊᕋᑦᑕ!”
  • ᓄᓇᓕᓕᒫᑦ ᐊᕕᑉᐸᓚᐅᕐᒥᔪᑦ ᐸᔪᑦᑕᐅᓱᑎᒃ ᐆᒪᔪᕐᑐᕕᓂᕐᒧᑦ. ᐃᓄᐃᑦ ᓄᓇᕐᖃᑎᒌᑉᐸᓚᐅᑦᔭᖏᒻᒪᑕ ᒥᓇᕐᑕᐅᕙᓚᐅᕐᒥᔪᑦ ᐆᒪᔪᓗᑭᑦᑕᐅᖏᑦᑐᒥᒃ ᐆᑦᑑᑎᒋᑦᓱᒋᒍ; ᑐᒃᑐᑐᖃᒻᒪᑦ, ᐅᑦᔪᑐᖃᒻᒪᑦ, ᑐᔪᖃᑦᑕᐅᑎᕙᓚᐅᕐᑐᑦ. ᑐᒃᑐᑐᖃᒻᒪᑦ ᑐᒃᑐᕕᓂᖅ ᐊᒡᒍᑕᐅᓕᕐᒪᑦ ᓄᓇᓕᐅᑉ ᐃᓄᓕᒫᖏᑦ ᓂᕿᓯᑎᑕᐅᕙᓚᐅᕐᑐᑦ. ᐃᓪᓘᑉ ᐃᓗᐊᓃᑦᑐᑦ ᒥᑭᔫᒐᓗᐊᕐᒪᑕ ᓂᕿᓯᑎᑕᐅᑦᓱᑎᒃ.
  • ᓂᖏᕐᑎᓯᔪᕕᓂᐅᒐᓗᐊᒥᒃ, ᐊᓯᐊᓂᒃ ᓇᑦᓯᑐᖃᓕᕐᒪᑦ ᓂᖏᕐᑎᑕᐅᕙᓚᐅᕐᑐᑦ “ᐱᒌᑫᓐᓇᑐᓪᓕᐅᓇ.”-ᓚᒐᑎᒃ. ᕿᓚᓗᒐᖅ ᐊᕕᑦᑕᐅᓴᖕᖏᔦᒻᒥᔪᖅ ᓱᑯᑦᓯᓕᒫᕌᐱᖓ, ᐃᕙᓗᓕᒫᒐᓴᖓ. ᓇᑦᓯᑐᕕᓂᐅᒐᓗᐊᕋᒥᓗ ᓂᖏᕐᑎᓯᔪᕕᓂᐅᒐᓗᐊᕋᒥᒃ ᐊᓯᐊᓂᒃ    ᓇᑦᓯᑐᖃᓕᕐᒥᒪᑦ ᓂᖏᓯᓲᕕᓂᐅᒻᒥᔪᑦ. ᓂᖀᑦ ᐅᐊᑎᒦᑉᐸᓚᐅᕐᑐᑦ, ᐁᔭᑦᓭᑦ ᐊᒡᒍᑕᐅᒌᕐᓯᒪᔪᑦ   ᐊᕕᖃᑎᒌᑦᓯᐊᓱᑎᒃ.
  • ᕿᑐᕐᙰᑦ ᓂᖓᖃᑦᑕᖁᔭᐅᕙᓚᐅᑦᔭᖏᓐᓂᕗᑦ ᓂᕿᒥᒃ ᓂᖓᕈᑎᖃᖁᔭᐅᕙᓚᐅᑦᔭᖏᑦᑐᑦ ᓂᖓᕈᑎᖃᕐᑐᖅ ᐊᕐᓵᑕᐅᑦᓯᐊᑐᐃᓐᓇᐸᑦᓱᓂ, ᓱᒥᔪᕐᓗ ᒥᓂᑕᐅᑐᐃᓐᓇᓱᓂ.
  • ᖁᒥᐅᕙᑦᓱᑎᒃ, ᐸᔪᑦᓱᑎᓪᓗ, ᐊᕕᑦᓱᑎᓪᓗ ᑌᒪᖕᖓᑦ ᐱᑕᖃᓪᓚᕆᓕᕐᑐᑐᐃᓐᓀᑦ, ᐊᕕᑦᓯᐊᓱᑎᒃ ᐱᑎᑦᓯᖏᑦᑐᐊᓘᕐᖂᐸᓐᓂᖏᑦᑐᖅ.
  • ᓂᕆᓕᕈᑦᑕ ᐳᓛᕐᑕᐅᒍᑦᑕ ᓂᕆᑎᑦᓯᒋᐊᖃᒻᒥᔪᒍᑦ. ᑲᒃᑲᓛᒍᑉᐸᑦ (ᐱᐊᕋᐅᑉᐸᑦ) ᓂᕆᖃᑎᒋᑦᓯᐊᓗᒍ, ᑕᑯᓐᓀᓇᕐᑎᒍᓐᓀᓗᒍ, ᐅᖁᒻᒥᓗᐊᑐᐃᓐᓇᐅᒐᓗᐊᕐᐸᑦ ᐁᑦᑐᓗᒍ. ᓂᕆᔪᕕᓂᐅᒍᓂ ᐅᓐᓂᓯᐅᕆᐊᓕᒃ ᐃᑎᑐᐊᕈᓂ. ᓂᕿ ᒥᑭᔪᐊᐱᐅᒐᓗᐊᕈᓂ   ᐱᕙᓪᓕᖁᑕᐅᒍᓐᓇᑐᖅ, ᑕᒪᓐᓇ ᓱᓕᔪᖅ!
  • ᐃᓚᒌᑦ ᓂᕆᑐᐊᕈᑎᒃ ᐳᓛᕐᑕᐅᓗᑎᒃ, ᓂᕆᑎᓪᓗᒋᓪᓘᓃᑦ ᐃᑎᕐᑕᐅᑐᐊᕈᑎᒃ ᐃᓄᒻᒪᕆᒧᑦ, ᑲᒃᑲᓛᒧᓪᓘᓃᑦ ᑕᑯᓐᓀᓇᕐᑎᓯᖁᔭᖁᐅᕙᓚᐅᑦᔭᖏᑦᑐᑦ, ᓂᕿ ᐊᒥᒐᕋᓗᐊᕐᐸᑦ. ᓂᕆᖕᖏᑲᓗᐊᕈᑎᓪᓗ, ᓂᕿᖃᑐᐊᕈᑎᒃ ᑯᒻᒪᓲᑎᒋᒋᐊᖃᕐᓱᒍ ᑌᒪᖕᖓᑦ ᐃᓅᖃᑎᒥᓄᑦ.    ᐁᑦᑑᑎᒋᒐᓗᐊᕈᓂᐅᒃ ᐃᓱᒫᓗᒋᑦᔭᕈᓐᓀᓗᒍ.
  • ᖃᓪᓗᓂᐊᕕᐅᓂᐅᓕᕐᒪᑕᓗ (ᖃᓪᓗᓂᑦᔨᐊᕕᓂᐅᓕᕐᒪᑕᓗ) ᑌᒃᑯᐊ ᖃᓪᓗᓂᑦᔨᐊᖃᖕᖏᑐᑦ   (ᖃᓪᓗᓂᑦᔨᐊᔨᖃᖕᖏᑐᑦ) ᑌᒪᖕᖓᑦ ᐊᕕᖃᑕᐅᑦᓱᑎᒃ. ᑌᑦᓱᒪᓂ ᖃᔫᕐᑌᑦ (ᖃᓪᓗᑏᑦ)     ᐊᖏᔪᖕᖑᐊᕌᓘᕙᓚᐅᕐᒪᑕ ᓴᓇᐅᒐᕐᑕᓯᔭᐅᕙᓚᐅᕐᑐᑦ (ᓂᕿᑦᓴᔭᕐᑕᓯᔭᐅᕙᓚᐅᕐᑐᑦ), ᑏᑕᕇᓂᒃ, ᑐᐹᑎᑕᕇᓂᒃ. ᐊᓱᐃᓛ ᐊᖏᓂᕐᐹᖑᓂᐊᓕᕐᒪᑦ ᐃᑎᕐᑕᖅ, ᑕᒪᐅᙰᓐᓈᓂᐅᔭᖕᖏᑐᖅ!
  • ᐸᓂᕐᑎᑕᒥᒃ ᐊᕕᑦᓯᐊᓱᑕ. ᐳᓛᕐᑕᐅᑐᐊᕋᑦᑕᓗ ᒥᑭᓂᕐᓴᑐᕐᓱᑕ ᐱᔭᐅᓯᒻᒥᒪᑦ ᐃᓚᖓ ᐳᓛᕐᑐᒧᑦ.
  • ᐱᑕᖃᖕᖏᑐᓂᒃ ᐸᔪᑦᑎᐅᕙᓚᐅᕐᒥᔪᑦ ᑲᒃᑲᓛᑦ (ᐱᐊᕃᑦ) ᓂᕿᒥᒃ. ᑌᒪᖕᖓᑦ ᐸᔪᒋᐊᒥᒃ   ᐊᓕᐊᑦᓱᑎᒃ. ᐃᕿᐊᓱᑦᑐᖅ (ᑎᓇᑦᑐᖅ) ᐊᓕᖏᑎᑕᐅᒋᐊᑦᓴᐅᑎᒋᕙᓚᐅᕐᑐᖅ.

ᖃᕝᕙᑎᑦᓯᒍᑏᑦ

ᓇᑯᕐᒦᒪᕆᑉᐳᒍᑦ ᐃᓄᐃᑦ ᐱᐅᓯᕆᓯᒪᔭᖏᓐᓂᒃ ᐅᖄᖃᑦᑕᓯᒪᔪᓂᒃ ᐅᑯᓂᖓ:

ᔮᓂ ᒪᓄᒥ ᐃᓄᑉᐸᒃ
ᐋᑦᑕᒥ ᓂᕕᐊᕐᓯ
ᑖᒧᓯ ᖁᒪᖅ
ᐄᕙ ᐃᓕᒪᓴᐅᑦ
ᐃᔨᑦᓯᐊᖅ ᓯᒥᒐᖅ
ᑑᒪᓯ ᑲᓪᓚᒃ

ᒨᓱᓯ ᐱᐅᕖ
ᒥᑎᐊᕐᔪᒃ ᓇᑉᐹᓗᒃ
ᕃᑭ ᓇᔪᒻᒥ ᐊᐅᒋᐊᖅ
ᐋᓂ ᐊᓚᑯ (ᑲᖏᕐᓱᔪᐊᖅ)
ᐹᓴ ᓯᒥᒐᖅ
ᕿᐱᑕᖅ ᐊᕐᓀᑐᖅ

ᐁᓴ ᐆᒪᔪᐊᓗᒃ
ᓈᓚ ᓇᑉᐹᓗᒃ
ᐋᓂ ᑯᕇ
ᕕᓕᓯ ᐋᓇᖃᑕᒃ
ᑯᓱᒐᓕᓂᖅ ᐃᓕᒪᓴᐅᑦ
ᑏᕕ ᐃᑦᑐᖅ

ᓇᑯᕐᒦᐳᒍᑦ ᐊᑦᔨᖑᐊᓂᒃ ᐊᑦᔨᓕᐅᕐᑕᐅᓯᒪᔪᓂᒃ ᓄᐃᑎᑦᓯᓯᒪᔪᑦ ᐃᓂᓪᓚᑎᕆᓯᒪᔪᓂᓪᓗ ᐅᑯᓂᖓ: ᐊᕙᑕᒃᑯᓂᒃ, ᑲᑎᕕᒃᑯᑦ ᐃᓕᓭᒍᑎᓕᐅᕐᑎᖏᓐᓂᒃ.

ᓇᑯᕐᒦᐳᒍᑦ ᐃᓄᒻᒪᕆᓂᒃ ᓂᐱᓕᐅᖃᑦᑕᓯᒪᔪᓂᒃ ᐊᕙᑕᒃᑯᓄᑦ ᑎᓕᔭᐅᒪᑦᓱᑎᒃ.

ᓇᑯᕐᒦᐳᒍᑦ ᑖᒃᑯᓂᖓ ᑲᑎᕐᓱᐃᖃᑦᑕᓚᐅᕐᑐᓂᒃ ᐃᓂᓪᓚᑎᕆᑦᓱᑎᓪᓗ:

ᐱᐊᑦᓯ ᐋᓇᖃᑕᒃ
ᒥᐊᔨ ᐃᓓᔭᓯᐊᐱᒃ

ᓴᓚ ᐹᓪᓚᔮᑦ

ᔨᐊᓯᑲ ᐋᕐᖓᖅ

ᐊᐱᕐᓲᑎᑦᓴᖃᕈᕕᑦ ᐅᖃᐅᓯᑦᓴᖃᕈᕕᓪᓘᓃᑦ, ᖃᐅᔨᓴᕐᕕᒋᑎᒍ.

ᖃᐅᔨᓴᕐᕕᒋᑎᒍ