ᐃᓕᓐᓂᐊᑕᐅᔪᐃᑦ ᖃᐅᔨᒍᑎᕕᓃᑦ
ᐃᓕᓵᑦ ᓈᓚᑦᓯᐊᓂᕐᒥᒃ ᑐᑭᓯᒪᓂᕐᑖᑎᓪᓗᒋᑦ ᐃᓄᐃᑦ ᐱᐅᓯᕆᖃᑦᑕᓯᒪᔭᖏᓐᓂᒃ. ᓈᓚᑦᓯᐊᓂᖅ, ᐊᖕᒐᓯᐊᕐᓂᓗ ᐃᑲᔪᕐᓯᒪᓂᖃᕐᒪᓃᒃ ᐃᓅᑉ ᐃᓅᓰᖓᓂᒃ.
ᐃᓅᓯᖃᑦᓯᐊᓂᕐᒧᑦ ᓯᓚᑦᑐᓭᒍᑏᑦ
ᑖᓐᓇ ᐃᓕᓐᓂᐊᑎᑦᓯᒍᑎ ᐃᓅᓯᖃᑦᓯᐊᓂᕐᒧᑦ ᓯᓚᑦᑐᓭᒍᑎ, ᐊᓯᖏᓐᓂᒃ ᒪᑯᓂᖓ ᐃᓕᓐᓂᐊᑎᑦᓯᒍᑎᖃᕐᒥᓱᓂ:
ᐊᑦᔨᓕᐊᕕᓂᖅ ᓗᐃᒃ ᕙᐅᑕᐅ-ᑯᓓᒧᑦ
ᐃᓕᓐᓂᐊᑎᑦᓯᓗᓂ ᐊᑑᑎᔭᐅᒍᓐᓇᑐᑦ
- ᐃᓕᓵᑦ, ᐃᓄᒻᒪᕇᑦ ᐅᖄᔭᕕᓂᖏᓐᓂᒃ ᐊᑐᐊᕐᓯᒍᓐᓇᑐᑦ, ᐃᓕᓭᔨᖓᓘᓐᓃᑦ ᐊᑐᐊᕐᓯᒍᓐᓇᑐᖅ ᑐᑭᓯᓇᕐᑎᓯᒋᐊᖃᑦᑕᓗᓂ.
- ᐊᑐᐊᕐᑕᐅᒌᑐᐊᕐᐸᑕ ᐃᓕᓵᑦ ᐅᖄᖃᑎᒋᓗᒋᑦ ᐃᓕᓭᔨᖓ ᐱᒋᐊᕐᑎᓯᑎᓪᓗᒍ, ᐅᓪᓗᒥᐅᓕᕐᑐᖅ ᓈᓚᓐᓂᖅ ᖃᓄᖅ ᐊᑦᔨᒋᔭᐅᖕᖏᓂᑦᓴᐅᓕᕐᒪᖔᑦ ᐅᖄᑎᓪᓗᒋᑦ.
- ᐃᓄᐃᑦ ᑌᑦᓱᒪᓂ ᓈᓚᓐᓂᒥᒃ ᐱᒻᒪᕆᐅᔪᖁᑎᖃᕐᓂᕕᓂᖏᓐᓂᒃ ᐅᓂᒃᑲᐅᔨᒋᐊᓪᓚᓗᒋᑦ. ᑌᑦᓱᒪᓂ ᓈᓚᑦᓯᐊᐸᓐᓂᒪᑕ ᐃᓚᕋᓱᑦᓱᑎᓪᓗ ᐅᖃᐅᑎᔭᐅᒍᑎᒥᓂᒃ ᐊᖏᖕᖏᑑᒋᐊᒥᒃ. ᖃᐅᔨᒪᔭᕐᓃᕕᑦ, ᐊᑑᑎᓯᒪᔭᕐᓃᕕᓪᓗ ᑐᑭᓯᑎᑦᓯᒋᐊᕈᑎᖃᕈᓐᓇᑐᑎᑦ.
- ᓈᓚᓐᓂᒥᒃ ᓲᓱᑦᓴᓯᐊᖁᓪᓗᒋᑦ ᐃᓄᒻᒪᕇᑦ ᐅᖃᐅᓯᕆᓯᒪᔭᖏᑦ ᒪᓕᓪᓗᒋᑦ, ᐃᓄᒻᒪᕇᑦ ᐊᑑᑎᓯᒪᔭᒥᓂᒃ ᐅᖄᒻᒪᑕ ᐊᑯᓂ ᐃᓅᓕᕋᒥᒃ ᓱᓕᔪᓂᒃ ᐅᖄᒻᒪᑕ.
- ᐃᓕᓵᑦ ᐊᑐᐊᕐᓯᒌᕐᓯᒪᓕᑐᐊᕈᑎᒃ ᐊᑐᐊᕐᓯᕕᐅᒌᕐᓯᒪᓕᕈᑎᓪᓘᓃᑦ ᓇᒻᒥᓂᖅ ᐃᓱᒪᒋᔭᒥᓂᒃ, ᑐᑭᓯᔭᒥᓂᓪᓗ ᐊᓪᓚᑎᓪᓗᒋᑦ, ᑌᑦᓱᒪᓂ ᐃᓄᐃᑦ ᓈᓚᓐᓂᒥᒃ ᐱᒻᒪᕆᐅᔪᖁᑎᖃᓐᓂᒪᑕ.
- ᐃᓄᒻᒪᕆᒻᒧᑦ ᐳᓛᕆᐊᕈᓐᓇᒥᔪᑦ, ᐁᕕᐅᓗᑎᓪᓘᓃᑦ, ᖃᓄᖅ ᓈᓚᓐᓂᖅ ᐱᐅᓯᖃᕝᕕᐅᓂᕐᒪᖔᑦ ᐃᓄᓐᓄᑦ ᑌᑦᓱᒪᓂ ᐅᖄᕕᐅᒋᐊᕐᑐᓗᑎᒃ, ᐃᓕᓵᑦ ᐊᐱᕐᓲᔭᕈᓐᓇᑐᑦ, ᐊᓪᓚᓗᑎᓪᓗ ᑐᑭᓯᔭᒥᓂᒃ.
ᐅᖃᐅᓯᕐᑕᖏᑦ ᐃᓄᐃᑦ ᐱᕐᖁᓯᖏᑦᑎᒍᑦ
ᑖᒃᑯᐊ ᐃᓄᒻᒪᕇᑦ ᐅᖃᐅᑎᔭᐅᒍᑎᒋᖃᑦᑕᓯᒪᔭᖏᑦ ᓈᓚᓐᓂᒧᐊᖓᔪᑦ. ᓈᓚᑦᓯᐊᖁᔭᐅᖃᑦᑕᓯᒪᒻᒪᑕ ᐅᖃᐅᑎᔭᐅᒍᑎᒥᓂᒃ, ᑕᒉᓐᓇᖅ ᐱᒋᐊᑦᓴᐅᑎᒋᓗᑎᒃ, ᐊᖏᖕᖏᑑᒋᐊᒥᓪᓗ ᐃᓚᕋᓱᑦᓱᑎᒃ, ᑌᒫᒃ ᐱᐅᓯᖃᖃᑦᑕᓯᒪᔪᑦ ᐃᓄᒻᒪᕇᑦ.
ᓈᓚᓐᓂᖅ
- ᑌᑦᓱᒪᓂ ᐃᓄᐃᑦ ᕿᑐᕐᖓᖏᑦ, ᐅᕕᒐᕐᑐᖏᓪᓗ ᐅᖃᐅᑎᔭᐅᑐᐊᕋᒥᒃ, ᑎᓕᔭᐅᑐᐊᕋᒥᓪᓗ ᐊᖏᑦᓯᐊᑐᐃᓐᓇᐸᕐᑐᕕᓃᑦ ᓈᓚᑦᓯᐊᓱᑎᒃ.
- ᕿᑐᕐᖓᐅᔪᑦ ᑐᑭᓯᒪᑎᑕᐅᑦᓯᐊᐸᓚᐅᕐᑐᑦ ᓯᕘᕋᒋᔭᑦᓴᖃᕐᑐᒥᒃ ᐊᑖᑕᐅᑉ, ᐊᓈᓇᐅᓪᓗ ᐊᓯᐊᓂᒃ. ᒎᑎᐅᑉ ᐅᖃᐅᓯᖏᓐᓃᑐᓂᒃ, ᐃᒫᒃ ᐅᖃᕐᑐᓂᒃ, “ᐊᑖᑕᓐᓂᒃ, ᐊᓈᓇᓐᓂᓗ ᓈᓚᑦᑐᓴᐅᕗᑎᑦ ᐊᑯᓃᕐᑐᒥᒃ ᐃᓅᓂᐊᖁᓪᓗᑎᑦ ᓄᓇᒥ.”
- ᐱᐊᕋᓐᓂᒃ (ᑲᒃᑲᓛᓂᒃ) ᕿᐱᓗᑦᑐᓂᒃ ᐊᐅᓚᔨᖕᖏᑐᖓ, ᓴᐱᕆᒐᒥᐅᒃ ᑭᓯᐊᓂ ᕿᐱᓗᒐᓛᕐᐸᑐᕕᓃᑦ. ᕿᐱᓗᑦᑐᐊᓗᖃᕐᐸᓂᕋᓂᓗ.
- ᕿᑲᑐᐃᓐᓇᑎᑕᐅᓕᓂᐅᖕᖏᑐᑦ ᐊᖓᔪᕐᖄᒥᓂᒃ ᐊᖕᖔᓯᐊᑐᐃᓐᓇᓲᑦ, ᐱᒋᐅᕋᔭᑦᔭᒐᑎᒃ ᕿᑲᑐᐃᓐᓇᑎᑕᐅᓕᓂᐅᒍᑎᒃ. ᐱᒋᐅᑐᐃᓐᓇᕋᑕᓲᑦ ᑎᓕᐅᕐᑕᐅᒋᐊᖃᑦᔭᕈᓐᓀᓱᑎᓪᓘᓃᑦ ᐱᔭᕆᐊᓕᖏᓐᓂᒃ.
- ᓈᓚᑦᓯᐊᐸᓚᐅᕐᖁᑦ ᐃᓄᐃᑦ ᒥᓂᑦᓯᕙᑦᑐᕕᓂᐅᒐᓗᐊᕋᒥᒃ ᐃᓅᖃᑎᒥᓂᒃ ᐊᔪᕿᑦᑐᐃᔨᒧᑦ ᐅᖃᐅᑎᔭᐅᑐᐊᕋᒥᒃ ᐊᖏᑦᓯᐊᐸᑦᑐᕕᓃᑦ. ᒪᕐᕉᓂᓪᓗ ᐊᕐᓇᖃᕐᐸᑐᕕᓂᐅᑦᓱᑎᒃ, ᐅᖃᐅᑎᔭᐅᑦᓱᑎᒃ ᑌᒣᑦᑐᓴᐅᖕᖏᒋᐊᒥᑦ ᐊᖏᑦᓯᐊᑐᐃᓐᓇᐸᑦᑐᕕᓃᑦ.
- ᓵᒋᐊᕐᑎᑕᐅᓯᒪᓕᕋᒥᒃ ᐊᔪᕿᑦᑐᐃᔨᒧᑦ ᐱᖁᔭᒥᒃ ᓈᓚᑦᓯᐊᑐᕕᓃᑦ, ᐊᔪᒉᓪᓘᓱᑎᒃᑐᓴᕈᒪᓂᓪᓚᕆᒻᒥᒃ ᐱᑕᖃᕐᐸᓂᕐᒪᑕ.
- ᑌᑦᓱᒪᓂ ᐃᓄᐃᑦ ᕿᑐᕐᖓᖏᑦ, ᐅᕕᒐᕐᑐᖏᓪᓗ ᐅᖃᐅᑎᔭᐅᑐᐊᕋᒥᒃ, ᑎᓕᔭᐅᑐᐊᕋᒥᓪᓗ ᐊᖏᑦᓯᐊᑐᐃᓐᓇᐸᕐᑐᕕᓃᑦ ᓈᓚᑦᓯᐊᓚᐅᕋᒥᒃ.
- ᒥᑭᔪᐊᐱᐅᖏᓐᓇᕋᓗᐊᕋᒥᒃ ᑎᓕᔭᐅᖃᑦᑕᑐᕕᓃᑦ. ᑎᑭᑦᑐᓂᒃ ᓴᒻᒧᐊᑎᑕᐅᑦᓱᑎᒃ, ᓇᑦᓴᕈᓐᓇᑖᐱᖏᓐᓂᓗ ᓇᑦᓴᓯᑎᑕᐅᑦᓱᑎᒃ.
- ᑌᒪᖕᖓᓂᑦ ᐊᖓᔪᕐᕐᑳᒥᓂᒃ ᐱᓇᓱᑦᑎᓗᒋᑦ ᑕᑯᓐᓇᓕᓂᐅᑐᐊᕋᒥᒃ, ᐃᑲᔪᕐᑎᑕᐅᓕᓂᐅᑐᐊᕋᒥᓗ, ᑎᓕᐅᕐᑕᐅᓕᓂᐅᑐᐊᕋᒥᓗ. ᐃᓱᒣᓐᓇᕿᑎᑐᐃᓐᓇᔭᓇᒋᑦ ᐱᒋᐅᓲᒍᒻᒪᑕ ᐃᓕᓴᕐᑐᕆᑦᔭᒐᑎᒃ, ᐃᓕᓴᕋᒥᒃ ᑕᑯᓐᓇᓂᑐᐃᓐᓇᒥᑎᒍᑦ.
- ᕿᑐᕐᖓᖅ ᓇᓪᓕᒋᒧᑦ ᐱᓇᓱᐊᕆᐊᓕᖏᓐᓂᒃ ᐱᓇᓱᐊᕐᑎᑕᐅᓕᓂᐅᖕᖏᑐᖅ ᐱᒋᐅᓲᒍᖕᖏᒪᑦ, ᐱᒋᐅᖁᔭᐅᒧᑦ -ᒍᒪᖕᖏᖃᓗᐊᕐᒪᑕ ᑎᓕᔭᐅᑐᐃᓐᓇᖃᑦᑕᑐᕕᓃᑦ ᐱᓇᓱᐊᕐᑎᑐᐃᓐᓇᓱᒋᑦ.
- ᐱᒋᐅᑦᓯᐊᑐᖃᕋᒥ ᕿᑐᕐᙰᑦ ᓇᓪᓕᓇᕋᒥᒃ ᑎᓕᐅᕈᒥᓇᓲᒍᖕᖏᒥᔪᑦ ᑭᓯᐊᓂ ᐊᖏᓕᑐᐃᓐᓇᕋᑕᕐᑎᓗᒋᑦ ᑎᓕᐅᕐᑕᐅᓕᓂᐅᖕᖏᑐᑦ, ᐃᓱᒣᓐᓇᕿᑐᐃᓐᓇᕈᒪᓂᕐᒥᒃ ᐱᐅᓯᑖᕐᐸᓕᐊᑐᐃᓐᓇᓲᑦ.
- ᐱᐊᕋᐅᕐᓱᑎᒃ ᐃᓂᕐᑎᑕᐅᑦᓯᐊᐸᓚᐅᕐᑐᑦ ᐊᖓᔪᕐᖄᒥᓄᑦ, ᐃᓄᓐᓂᓗ ᑲᒪᑦᓯᐊᖁᔭᐅᕙᓚᐅᕐᓱᑎᒃ ᓯᕗᓂᕐᓴᖃᑦᓯᐊᖁᔭᐅᑦᓱᑎᒃ. ᐊᔪᕿᕐᑐᐃᔨᖃᖕᖏᑲᓗᐊᕐᓱᑎᒃ ᐅᑉᐱᓂᕐᒥᒃ ᖃᐅᔨᒪᔪᕕᓃᑦ, ᐃᓅᑦᓯᐊᖁᔭᐅᓂᕐᒥᒃ ᓈᓚᑦᓯᐊᓱᑎᒃ.
ᖃᕝᕙᑎᑦᓯᒍᑏᑦ
ᓇᑯᕐᒦᒪᕆᑉᐳᒍᑦ ᐃᓄᐃᑦ ᐱᐅᓯᕆᓯᒪᔭᖏᓐᓂᒃ ᐅᖄᖃᑦᑕᓯᒪᔪᓂᒃ ᐅᑯᓂᖓ:
ᔮᓂ ᒪᓄᒥ ᐃᓄᑉᐸᒃ
ᐋᑦᑕᒥ ᓂᕕᐊᕐᓯ
ᑖᒧᓯ ᖁᒪᖅ
ᐄᕙ ᐃᓕᒪᓴᐅᑦ
ᐃᔨᑦᓯᐊᖅ ᓯᒥᒐᖅ
ᑑᒪᓯ ᑲᓪᓚᒃ
ᒨᓱᓯ ᐱᐅᕖ
ᒥᑎᐊᕐᔪᒃ ᓇᑉᐹᓗᒃ
ᕃᑭ ᓇᔪᒻᒥ ᐊᐅᒋᐊᖅ
ᐋᓂ ᐊᓚᑯ (ᑲᖏᕐᓱᔪᐊᖅ)
ᐹᓴ ᓯᒥᒐᖅ
ᕿᐱᑕᖅ ᐊᕐᓀᑐᖅ
ᐁᓴ ᐆᒪᔪᐊᓗᒃ
ᓈᓚ ᓇᑉᐹᓗᒃ
ᐋᓂ ᑯᕇ
ᕕᓕᓯ ᐋᓇᖃᑕᒃ
ᑯᓱᒐᓕᓂᖅ ᐃᓕᒪᓴᐅᑦ
ᑏᕕ ᐃᑦᑐᖅ
ᓇᑯᕐᒦᐳᒍᑦ ᐊᑦᔨᖑᐊᓂᒃ ᐊᑦᔨᓕᐅᕐᑕᐅᓯᒪᔪᓂᒃ ᓄᐃᑎᑦᓯᓯᒪᔪᑦ ᐃᓂᓪᓚᑎᕆᓯᒪᔪᓂᓪᓗ ᐅᑯᓂᖓ: ᐊᕙᑕᒃᑯᓂᒃ, ᑲᑎᕕᒃᑯᑦ ᐃᓕᓭᒍᑎᓕᐅᕐᑎᖏᓐᓂᒃ.
ᓇᑯᕐᒦᐳᒍᑦ ᐃᓄᒻᒪᕆᓂᒃ ᓂᐱᓕᐅᖃᑦᑕᓯᒪᔪᓂᒃ ᐊᕙᑕᒃᑯᓄᑦ ᑎᓕᔭᐅᒪᑦᓱᑎᒃ.
ᓇᑯᕐᒦᐳᒍᑦ ᑖᒃᑯᓂᖓ ᑲᑎᕐᓱᐃᖃᑦᑕᓚᐅᕐᑐᓂᒃ ᐃᓂᓪᓚᑎᕆᑦᓱᑎᓪᓗ:
ᐱᐊᑦᓯ ᐋᓇᖃᑕᒃ
ᒥᐊᔨ ᐃᓓᔭᓯᐊᐱᒃ
ᓴᓚ ᐹᓪᓚᔮᑦ
ᔨᐊᓯᑲ ᐋᕐᖓᖅ