ᐃᓅᖃᑎᒌᑦᓯᐊᓂᖅ

ᐃᓅᓯᖃᑦᓯᐊᓂᕐᒧᑦ ᓯᓚᑦᑐᓭᒍᑏᑦ

ᑖᓐᓇ ᐃᓕᓐᓂᐊᑎᑦᓯᒍᑎ ᐃᓅᓯᖃᑦᓯᐊᓂᕐᒧᑦ ᓯᓚᑦᑐᓭᒍᑎ, ᐊᓯᖏᓐᓂᒃ ᒪᑯᓂᖓ ᐃᓕᓐᓂᐊᑎᑦᓯᒍᑎᖃᕐᒥᓱᓂ:

• ᐃᓅᖃᑎᒌᑦᓯᐊᓂᖅ
• ᐃᓅᖃᑎᒥᓂᒃ ᐃᑲᔪᕐᓂᖅ
• ᓈᓚᓐᓂᖅ
• ᐃᓂᕐᑎᕆᐅᑏᑦ
• ᓂᕿᒥᒃ ᐊᕕᖃᑎᒌᓐᓂᖅ
• ᐆᒪᔪᓂᒃ ᐱᑦᓯᐊᕆᐊᖃᓐᓂᖅ

ᐃᓚᒌᑦᓯᐊᓂᖅ

• ᑖᒃᑯᐊ ᐃᓄᐃᑦ ᑌᑦᓱᒪᓂ ᐱᐅᓯᕆᓯᒪᔭᖏᑦ ᐃᓅᖃᑎᒌᑦᓯᐊᓂᕐᒧᑦ, ᐃᓚᒌᓐᓂᒧᑦ, ᐃᓅᖃᑎᒥᓂᓪᓗ ᑲᒪᑦᓯᐊᓂᕐᒧᑦ, ᑌᒣᑦᓱᑎᒃ ᐃᓄᐃᑦ ᐃᓚᓕᐅᕐᑐᐊᓘᕙᓚᐅᕐᑐᑦ.

• “ᑌᑦᓱᒪᓂ ᐃᓅᖃᑎᒌᑦᓯᐊᕌᓗᑦᓴᐸᓚᐅᕋᑦᑕ, ᓚᐅᕐᒪᑕ ᐊᖓᔪᕐᖄᕗᑦ.”

• “ᓯᓚᕐᔪᐊᖅ ᒫᓐᓇ ᐃᓄᖃᕐᒪᑦ ᐃᓘᓐᓇᓕᒫᑦᓯᐊᕌᓗᖏᓐᓂᒃ, ᐃᓘᓐᓇᑎᒃ    ᐃᓚᓕᐅᕐᑐᐊᓘᕙᓚᐅᕐᒪᑕ”, ᐊᐅᓚᔨᑦᓯᐊᕋᒃᑭᑦ ᐃᓚᓕᐅᖃᑕᐅᑦᓯᐊᕆᐊᖃᕐᖁᒍᑦ.

• “ᐊᕐᓇᕉᖅ ᐊᕙᒻᒧᕋᕈᓂ ᐃᓚᒌᓐᓂᒃ ᓱᒃᑯᐃᒍᓐᓇᒪᑦ. ᓴᑭᑎᑦ, ᐊᓈᓇᒃᑯᑎᓪᓗ ᐊᑕᐅᓯᐅᑎᓪᓗᒋᑦ ᐃᓚᒋᒐᓱᐊᕈᕕᒃᑭᑦ ᐊᕙᒻᒧᕋᕐᕕᒋᑦᓴᕈᓐᓀᓗᒋᑦ, “ᖃᓂᕉᖅ”, ᐅᖃᐅᓯᖅ ᐊᑕᐅᓯᐅᒐᓗᐊᖅ ᓱᒃᑯᐃᒍᓐᓇᒪᑦ!”

• ᐆᒥᓱᐊᓗᑦᓴᑐᐃᓐᓇᕈᓐᓀᓗᑕ ᐅᖃᐅᑦᔩᕙᒋᐊᖃᕐᖁᒍᑦ ᐃᓚᑦᑎᓂᒃ ᐊᑦᔨᒌᑦᑎᓗᒋᑦ. “ᐱᐅᖕᖏᑐᐊᓘᒐᓗᐊᕐᐸᒎᖅ” ᓴᐱᕐᕆᐊᑌᓕᓪᓗᒍ ᓵᓚᒋᒐᓱᐊᑐᐃᓐᓇᓗᒍ ᐅᖃᐅᑎᑦᓯᐊᐸᓪᓗᒍ.

• ᐃᓚᒌᑦᓯᐊᓚᐅᕐᖁᑦ ᐃᓄᐃᑦ ᓂᓪᓕᐅᔨᖃᑦᑕᐅᑎᒃᓯᐊᓱᑎᒃ, ᐃᓚᓐᓈᕇᑦᓯᐊᓱᑎᒃ,   ᐃᓚᒌᑦᓯᐊᒪᕆᐊᓗᑦᓴᓕᕐᓱᑎᒃ ᐃᓅᕙᓚᐅᕐᑐᑦ.

ᑲᒪᑦᓯᐊᓂᖅ

• ᐃᓄᐃᑦ ᓯᕗᓪᓕᕗᑦ ᑲᒪᑦᓯᐊᐸᓚᐅᕐᑐᑦ ᐃᓚᒥᓂᒃ, ᐃᓅᖃᑎᒥᓂᓪᓗ. ᑲᒪᒋᐅᑎᑦᓯᐊᓱᑎᒃ ᐃᓄᐃᑦ ᐃᓅᕙᓚᐅᕐᑐᑦ.

• ᕿᑐᕐᖓᖅ ᐃᒻᒥᓂᕿᒋᐅᕐᓂᐅᒐᓗᐊᕈᓂ ᐊᖓᔪᕐᖄᒥᓂᒃ ᑐᓄᑦᓯᑐᐃᓐᓇᕆᐊᖃᑦᔭᖏᑦᑐᖅ, ᐱᕐᖃᔭᕐᑎᓇᒍ ᐱᕈᐃᔭᐅᓚᐅᔪᒐᒥ ᑲᒪᑦᓯᐊᕆᐊᓕᒃ, ᕿᓄᕕᐅᖕᖏᑲᓗᐊᕈᓂ ᐊᖓᔪᕐᖄᒥᓄᑦ.

• ᐊᑖᑕᒻᒪ ᐅᖃᐅᓯᕆᕙᓚᐅᕐᑕᖓ ᐃᓅᖃᑎᒌᑦᓯᐊᖁᔨᑐᐃᓐᓇᐸᓚᐅᔪᒻᒪᑦ, ᑭᖑᓂᖓᓂ ᑲᑉᐱᐊᓱᑦᔭᖏᑦᑐᖓ. ᐃᓱᒪᒋᒐᓚᓚᐅᕐᓯᒪᖕᖏᑕᕋ ᓇᒧᑐᐃᓐᓇᖅ ᐊᐅᓪᓛᓕᑐᐊᕐᒪᓘᓐᓃᑦ ᒪᓕᑲᑦᑕᐸᓚᐅᕋᒃᑯ. ᐃᓱᒫᓗᒋᖕᖏᓚᕿᔭᕋ ᑲᒪᒋᑦᓯᐊᓚᐅᔪᒐᒃᑯ, ᑭᐅᕌᓗᒋᐊᒥᓪᓗ ᐊᐅᓚᔨᑦᔭᓇᒍ.

• ᐃᓅᖃᑎᑦᑎᓂᒃ ᐃᓕᐊᕐᕈᐊᐱᐅᓕᕋᓗᐊᕐᒪᑕ ᑲᒪᑦᓯᐊᓕᐅᒥᑦᔭᖏᑦᑐᒍᑦ. ᐃᓅᖃᑎᑦᑎᓄᑦ ᖃᓂᒪᔨᐊᓕᐊᐱᓐᓄᑦ ᑕᑯᔭᕐᑐᖁᔭᐅᕐᓱᑕ, ᖃᓄᐃᔨᐊᖃᖕᖏᓂᕐᓴᓄᑦ ᐁᓲᖑᔪᒍᑦ. ᖃᓂᒪᔨᐊᓕᐊᐲᑦ ᖄᖏᕐᓱᒋᑦ. ᓯᓚᑐᒍᑎᒋᒋᐊᖃᓕᕐᑕᕗᑦ, ᑌᒣᓂᐊᕐᒥᒐᑦᑕ ᐃᓅᓯᑦᑕ ᐃᓱᐊ ᖃᐅᔨᒪᑦᔭᖏᓐᓇᑎᒍ!