1940 ᓚᐅᕐᑎᓇᒍ ᓴᓇᐅᒐᕐᓂᖅ
ᐃᓄᐃᑦ ᓴᓇᐅᒐᖃᑦᑕᓯᒪᕗᑦ ᐊᕐᕌᒍᓂ ᑕᐅᓴᓐᑎᓂ. ᐊᕐᕌᒍᓂ ᓯᕗᓪᓕᖏᓐᓂ, ᓴᓇᐅᒐᓗᐊᖕᖑᐊᖃᑦᑕᓯᒪᕗᑦ ᓂᕆᒍᑎᓂᒃ ᐃᒐᒍᑎᓂᒃ, ᐆᒪᔪᕐᓯᐅᕈᑎᓂᒃ ᐃᖃᓗᑦᓯᐅᕈᑎᓂᓪᓗ (ᓇᐅᓚᖅ, ᖄᕐᔪᒃ, ᓴᕖᑦ) ᐃᓚᐅᑎᓪᓗᒋᑦ ᐱᖕᖑᐊᑦ ᐊᒻᒪᓗ ᓱᓇᒐᓚᖃᐅᑏᑦ. ᑖᒃᑯᐊ ᓴᓇᐅᒐᕐᑕᐅᒍᓐᓇᓯᒪᔪᑦ ᓴᐅᓂᕕᓂᕐᓂᑦ, ᓇᑦᔪᕕᓂᕐᓂᑦ, ᑑᒑᖅ ᐊᒻᒪᓗ ᑎᑦᔭᓗᕕᓃᑦ ᕿᔪᐃᑦ ᓇᓂᒥᐅᖑᓂᖏᑦ ᒪᓕᑦᓱᒋᑦ. ᐃᓘᓐᓇᑲᓴᑎᒃ ᓴᐅᓇᐅᒉᑦ ᒥᑭᔪᐊᐱᐅᖃᑦᑕᓯᒪᔪᑦ, ᐃᓅᓯᖃᕐᓯᒪᒻᒪᑕ ᓅᑲᑦᑕᑎᐅᑦᓱᑎᒃ.
ᐃᓄᐃᑦ ᐊᖕᑳᕙᒥᐅᑦ ᓴᓇᐅᒐᖃᑦᑕᓯᒪᒐᓗᐊᕐᒥᑎᓪᓗᒋᑦ, ᐃᑭᓐᓂᓴᓂᒃ ᓴᓇᐅᒐᓕᐅᖃᑦᑕᓯᒪᕗᑦ ᑕᓯᐅᔭᕐᔪᐊᒥᐅᓂᒃ, ᐃᒻᒪᖄ ᓴᓇᐅᒐᑦᓴᔦᓐᓂᐊᓂᑯᒧᑦ.
ᖁᓪᓕᖅ, ᓇᑦᓯᔭᒥᒃ ᐅᕐᓱᓕᒃ ᖁᓪᓕᖅ ᓴᓇᔭᐅᓯᒪ ᖁᓪᓕᓴᔭᕐᒥᒃ. ᖁᓪᓕᖅ ᐱᒻᒪᕆᐊᓘᓯᒪᕗᖅ ᐃᒐᒍᑎᐅᖃᑦᑕᓯᒪᒐᒥ, ᐃᑯᒪᕆᔭᐅᑦᓱᓂ, ᐅᕐᖂᓯᓴᐅᑎᐅᑦᓱᓂᓗ ᑐᐱᕐᒥ ᐃᒡᓗᕕᒐᕐᒥᓗ. ᐊᖑᑏᑦ ᒥᑭᓂᕐᓴᒥᒃ ᐊᑦᔭᓯᖃᑦᑕᓯᒪᔪᑦ ᖁᓪᓕᒥᒃ ᐆᒪᔪᕐᓂᐊᓱᑎᒃ ᒪᙯᓕᑐᐊᕋᒥᒃ ᐅᕿᓐᓂᓴᐅᒻᒪᑕ ᖁᓪᓕᑐᐃᓐᓇᓂᒃ ᐊᖏᕐᕋᒥ ᐊᑐᕐᑕᐅᓲᑦ.
ᐅᔭᕋᖅ ᓴᓇᖕᖑᐊᓯᒪᔪᖅ ᑕᑯᔭᐅᒍᓐᓇᖁᖅ ᑲᖏᕐᓱᔪᐊᑉ ᓴᓂᐊᓂ.
ᒥᑭᔪᐊᐱᒃ ᑮᓇᖕᖑᐊᖅ ᓴᓇᔭᐅᓯᒪᔪᖅ 400 ᐊᕐᕌᒍᐃᑦ ᔩᓱᓯᐅᑉ ᐃᓅᓕᕐᓯᒪᓂᖓᑕ ᓯᕗᓂᐊᓂ. ᓇᕝᕚᑕᐅᓯᒪᔪᖅ ᓴᓪᓗᐃᑦ ᓴᓂᐊᓂ ᕿᑭᕐᑕᒥ ᑐᓂᕐᑕᓂᐊᕐᕕᐅᔪᒥ ᑕᔭᕋᖅ ᓚᔭᐅᔪᒥᒃ.
“ᓄᐃᑕᑎᓲᕗᑦ ᓴᓇᐅᒐᕗᓐᓂ ᐃᓅᓯᕆᓯᒪᔭᕗᑦ ᑭᖑᓂᕐᒥ ᐅᓪᓗᒥᒧᑦ ᑎᑭᑦᓱᒍ. ᓱᓕᔪᒥ”
ᐸᐅᓗᓯ ᖃᓴᓪᓗᐊ, ᐃᓄᑦᔪᐊᖅ
ᓴᓇᖕᖑᐊᓂᖅ 1940 ᓚᐅᕐᑎᓇᒍ
1948-ᖑᑎᓪᓗᒍ ᔦᒥᔅ ᕿᐅᔅᑕᓐ ᐅᕕᒐᕐᑑᓱᓂ ᑕᑯᒥᓇᕐᑐᓕᐅᕐᑎ ᐊᓐᑎᐊᔨᐅᒥᒃ ᐱᓯᒪᔪᖅ ᐃᓄᑦᔪᐊᓕᐊᕐᓂᖁᖅ ᐊᓪᓚᖑᐊᕆᐊᕐᑐᓱᓂ ᐅᑭᐅᕐᑕᑑᑉ ᓄᓇᖓᓂᒃ. ᑖᕙᓃᑦᓱᓂ, ᑕᐅᕐᓰᖃᑎᓕᕕᓂᖅ ᓴᓇᖕᖑᑕᒥᓂᒃ ᓴᓇᐅᒐᕐᓯᒪᔪᒧᑦ ᓇᔪᒻᒥᐊᓗᒻᒧᑦ ᓴᓇᔭᕕᓂᕐᒥᒃ. ᐅᑎᐅᑦᔨᔪᕕᓂᖅ ᒪᓐᑐᔨᐊᒧᑦ ᐊᒥᓱᒐᓚᓐᓂᒃ ᓄᓇᕕᒻᒥ ᐱᓯᒪᔪᓂᒃ. ᑌᒃᑯᐊ ᓴᓇᐅᒉᑦ ᓂᐅᕕᐊᖑᑦᓴᐅᑎᒋᐊᐱᑦᑐᕕᓃᑦ ᐊᒻᒪᓗ ᐅᓐᓂᑑᑦᔨᔪᕕᓂᖅ ᐃᓄᓐᓂᒃ ᓴᓇᖕᖑᐊᖃᑦᑕᖁᔨᑦᓱᓂ ᐃᑲᔪᕐᓯᖁᔨᑦᓱᓂ ᒪᑭᑕᒐᓱᐊᕐᓂᒨᓕᖓᑎᓪᓗᒋᑦ.
1940 ᓚᐅᕐᑎᓇᒍ ᐃᓄᐃᑦ ᓄᓇᕕᒻᒥᐅᑦ ᑕᐅᕐᓯᐅᑎᖃᑎᖃᖃᑦᑕᓯᒪᕗ ᓴᓇᐅᒐᕐᑕᕕᓂᕐᒥᓂᒃ ᐊᕐᕕᓂᐊᕐᑎᓄᑦ, ᖃᐅᔨᓴᕐᑎᓄᑦ ᐊᒻᒪᓗ ᐊᓯᖏᓐᓄᑦ ᐅᑭᐅᕐᑕᑐᒥ ᐳᓚᕋᑦᑎᓄᑦ.
ᓴᓇᐅᒐᑦᓴᔭᖅ ᐊᑐᕐᑕᐅᓲᖅ ᓴᓇᐅᒐᓕᐅᕐᑐᓄᑦ ᓄᓇᕕᒻᒥ ᓴᓇᐅᒐᑦᓴᔭᐅᑦᓱᓂ ᑐᖑᔪᕐᑕᖅ ᐊᑐᕐᑕᐅᕙᓪᓗᓲᕕᓂᖅ ᑕᑯᔭᐅᒍᓐᓇᑐᖅ ᑰᖓᑕ ᓯᓈᓂ ᐊᒻᒪᓗ ᓴᓇᐅᒐᑦᓴᔭᖅ ᕿᕐᓂᓂᕐᓴᖅ, ᓇᕝᕚᑕᐅᓲᖅ ᐊᑦᔨᒌᖕᖏᑐᓂ ᓄᓇᓕᓐᓂ (ᐳᕕᕐᓂᑐᖅ, ᐊᑯᓕᕕᒃ, ᐃᕗᔨᕕᒃ ᐊᒻᒪᓗ ᓴᓪᓗᓂ). ᐃᓄᐃᑦ ᐅᔭᕋᕐᑕᕕᒻᒧᑦ ᐁᓲᕕᓃᑦ ᐅᑭᐅᒃᑯᑦ ᐱᔭᕆᐊᑭᓐᓂᓴᐅᓲᖑᓐᓂᒪᑦ ᐅᓯᒋᐊᒥᒃ ᖃᒧᑏᓐᓄᑦ ᓴᓇᖕᖑᐊᒐᑦᓴᒥᒃ ᐅᔭᕋᕐᒥᒃ. ᓯᓪᓕᑎᓂᒃ ᐊᑐᓲᕕᓃᑦ ᐊᒻᒪᓗ ᐴᑦᑕᔫᓂᒃ ᐅᔭᕋᓐᓂᐊᓱᑎᒃ ᐊᒻᒪᓗ ᐱᓇᓱᐊᕐᓱᑎᒃ ᐅᔭᕋᕐᓂᒃ. ᐊᒥᓱᐃᑦ ᓴᓇᖕᖑᐊᑏᑦ ᓇᑦᓯᐅᑉ ᐅᕐᓱᖓᓂᒃ ᐊᑐᓲᑦ ᕿᕐᓂᓯᓕᑎᕈᑎᒋᑦᓱᒍ ᓴᓇᖕᖑᐊᑕᒥᓂᒃ.
ᓴᓇᐅᒐᕐᓂᖅ ᐅᓪᓗᒥᐅᓕᕐᑐᖅ ᐊᑑᑎᔭᕐᑎᓂᑦ
2000 ᐊᕐᕌᒍᖏᓐᓃᓕᕐᓱᑕ, ᐃᓄᐃᑦ ᓴᓇᐅᒐᓕᐅᓲᖑᖏᓐᓇᖁᑦ. ᓴᓇᖕᖑᐊᑏᑦ ᐊᐅᓚᔪᒨᕐᑐᓂᒃ ᐊᑐᕐᓱᑎᒃ ᓴᓇᖕᖑᐊᓲᖑᕗᑦ ᐊᒻᒪᓗ ᐃᑯᒪᐅᑎᒨᕐᑐᐃᓂᒃ ᒪᓂᕐᖃᓴᐅᑎᓂᒃ ᑭᓯᐊᓂ ᓴᓇᖕᖑᐊᕈᓰᑦ ᐱᕙᓪᓕᐊᔭᐅᓂᖓ ᐊᑦᔨᓭᓐᓇᕆᖏᓐᓇᑕᖓ. ᑕᑯᒍᓐᓇᑐᑦ ᓴᓇᐅᒐᑦᓴᓂᒃ ᓴᓇᐅᒐᓐᓂᐊᕕᓐᓂ ᐊᒻᒪᓗ ᐲᔦᒍᓐᓇᓱᑎᒃ ᐅᓕᒪᐅᑎᒧᑦ. ᑌᒪ ᐲᔦᓯᓲᑦ ᐊᑐᕐᑐᓴᐅᖕᖏᓂᖓᓂᒃ ᓴᓇᐅᒐᑦᓴᒥᑦ. ᑌᒪ, ᐊᑐᕐᓱᑎᒃ ᓴᕕᓐᓂᒃ ᐊᒻᒪᓗ ᖃᐅᔨᓴᕈᑎᒥᒃ ᐊᖏᓂᖓᓂᒃ, ᖃᓄᐃᓕᖓᓂᑦᓴᖓᑕ ᐋᕐᕿᓯᒪᐅᑎᑦᓴᖓᓂᒃ ᐋᕐᕿᓯᐊᕐᓂᓴᐅᓲᑦ. ᑭᖑᓂᐊᓂ ᐊᑐᕐᑕᐅᓲᖅ ᓯᓪᓕᓭᑦᓱᑎᒃ ᐊᒻᒪᓗ ᒪᓂᕋᓪᓕᑎᕐᓱᒍ ᖃᐅᒻᒪᓭᓯᑦᓱᑎᒃ ᓴᓇᐅᒐᕐᑕᒥᓂᒃ. ᓴᓇᐅᒐᕐᑎ ᑌᒪ ᕿᓪᓛᓭᓯᓲᖅ ᐱᔭᕇᕐᑕᒥᓂᒃ, ᐃᒻᒪᖄ ᑕᐅᑦᑐᖃᖕᖏᑐᒧᑦ ᑲᒥᓐᓂᒃ ᕿᓪᓕᓭᒍᑎᒧᑦ.