ᓇᓗᓀᕐᓯᐅᑎ
ᐃᓪᓗᕕᒐᖅ ᐱᒻᒪᕆᐊᓘᕗᖅ ᐃᓄᓐᓄᑦ ᐊᓂᕐᕋᑐᐊᕆᓯᒪᒻᒪᒍ ᐅᑭᐅᖑᓕᑐᐊᕐᒪᑦ. ᓱᓇᓕᒫᑦ ᐃᓅᓯᕐᒥ ᐊᑑᑎᓯᒪᒻᒪᑕ ᐃᓪᓗᕕᒐᐅᑉ ᐃᓗᐊᓂ, ᐱᒻᒪᕆᐊᓘᕗᖅ ᐃᓗᕐᖁᓯᒧᑦ.
ᐃᓕᓐᓂᐊᑏᑦ ᐃᓪᓗᕕᒐᓕᐅᕆᐅᒍᓐᓇᓕᕐᑐᑦ. ᐃᓪᓗᕕᒐᓕᐅᕆᐅᕐᓗᑎᒃ ᑕᑯᓐᓇᑎᑦᓯᕆᐊᓖᑦ ᐊᒥᓱᓂᒃ ᐱᔪᓐᓇᐅᑎᒥᓂᒃ ᖃᐅᔨᒪᔭᒻᒥᓂᓪᓗ. ᑕᒪᓐᓇ ᐱᓂᐊᕐᓂᐅᔪᖅ ᐃᓄᓐᓂᒃ ᐱᑐᑦᓯᒪᖃᑎᒌᑦᑎᓯᒍᑎᐅᕈᓐᓇᒥᔪᖅ ᐱᒻᒪᕆᐊᓗᓐᓂᒃ ᐃᓪᓗᕕᒐᕐᒨᓕᖓᔪᒥᒃ ᑐᖕᖓᕕᖃᕐᓂᑯᑦ.
ᐊᑦᔨᓕᐊᕕᓂᖅ ᔅᑎᐊᕙᓂ ᓇᕚᕉᒧᑦ
ᐃᓕᓐᓂᐊᑎᑕᐅᒍᑏᑦ ᓄᐃᒍᑎᖏᑦ
ᑕᒡᒐᓂ ᐱᒋᐅᕐᓴᐅᑎᒥ, ᐃᓕᓐᓂᐊᑏᑦ ᓄᓇᒦᖃᑦᑕᓂᐊᕐᑐᑦ ᐃᓪᓗᕕᒐᓕᐅᕆᐅᕐᓗᑎᒃ. ᐊᓪᓚᓯᒪᔪᓂᒃ ᐃᓕᓐᓂᐊᕈᑎᒋᖃᑦᑕᑕᒥᓂᒃ ᒪᓕᓪᓗᑎᒃ ᐱᕙᓪᓕᐊᓚᖓᔪᑦ, ᓂᕈᐊᕐᓂᑯᑦ ᓇᓂ ᐃᓪᓗᕕᒐᓕᐅᕆᐊᖃᕐᒪᖔᒻᒥ ᐊᒻᒪᓗ ᐱᔭᕇᒐᓱᐊᕐᓂᒥᒃ.
ᐱᒋᐅᕐᓴᐅᑎᐅᑉ ᓈᓂᖓᓂ, ᐃᓕᓐᓂᐊᑏᑦ ᐱᔪᓐᓇᓯᓐᓂᐊᑐᑦ ᒪᑯᓂᖓ
- ᑕᑯᓐᓇᑎᑦᓯᓯᒪᓗᑎᒃ ᖃᐅᔨᒪᔭᒥᓂᒃ, ᐱᔪᓐᓇᐅᑎᒥᓂᒃ ᐊᒻᒪᓗ ᐱᐅᓯᕆᒋᐊᓕᒻᒥᓂᒃ ᐃᓪᓗᕕᒐᓕᐅᕐᓂᒧᑦ.
ᑲᔪᓯᓂᖓ
1. ᐃᓂᓪᓚᑎᕐᓯᒪᓂᖅ
ᐃᓪᓗᕕᒐᓕᐅᕆᐅᕐᓂᖅ ᐊᑯᓃᒍᓐᓇᑐᖅ. ᐃᓂᓪᓚᑎᕐᓯᒪᑦᓯᐊᕋᓱᐊᕐᓗᓯ ᐃᓕᓐᓂᐊᑏᑦ ᐅᕐᖂᓯᓴᕐᕕᒋᕋᔭᕐᑕᖏᓐᓂᒃ. ᑐᑉᐱᑎᕐᓯᒪᓗᓯ ᕈᓐᓇᕈᑦᓯ, ᐃᓪᓗᕕᒐᓕᐅᕐᕕᒋᔭᓯᑦᑕ ᓴᓂᐊᓂ. ᐅᕐᖂᓯᓴᐅᑎᖃᑦᓯᐊᓗᓯ, ᑏᑐᖃᑦᑕᓗᓯ ᐸᓂᕐᑎᑕᕐᑐᓗᓯᓗ. ᐊᓪᓚᕈᑎᒃᑭᓯᒪᓗᓯ.
ᐅᖂᑕᓕᐅᕐᓯᒪᓗᓯ, ᐊᓄᕆᑕᐅᕇᒃᑯᑎᑦᓴᒥᒃ ᐃᓕᓐᓂᐊᑏᑦ ᑕᑯᓐᓇᑎᑦᓯᑎᓪᓗᒋᑦ ᐊᐳᑎᒥᒃ ᐊᕕᐅᕐᙯᑎᓪᓗᒋᑦ ᓴᓇᒻᒪᓕᐅᕐᓂᑯᑦ.
ᐊᑦᔨᓕᐊᕕᓂᒃ ᓗᐃᒃ ᕙᐅᑕᐅ-ᑯᓓᒧᑦ
2. ᕿᒥᕐᕈᓂᒃ
ᐃᓕᓐᓂᐊᑏᑦ ᑲᑎᑦᑎᓗᒋᑦ ᐊᒻᒪᓗ ᑐᐱᕐᒥ ᓄᓇᑐᐃᓐᓇᒥᓪᓘᓃᑦ ᐅᑎᕐᕕᖃᕐᑎᓗᒋᑦ ᒪᓕᑦᑕᐅᕆᐊᓕᓐᓂᒃ ᐊᒻᒪᓗ ᐃᓪᓗᕕᒐᓕᐅᕈᓯᕐᓂᒃ ᐃᓕᓐᓂᐊᓯᒪᔭᖏᓐᓂᒃ ᐱᒋᐅᕐᓴᐅᑎᒥ. ᐅᖃᐅᑎᓗᒋᑦ ᐅᖃᐅᓯᕐᑕᖏᓐᓂ ᐊᐳᑏᓪᓗ ᖃᓄᐃᑦᑑᓂᖏᓐᓂᒃ. ᐃᓕᓐᓂᐊᑏᑦ ᐃᐱᓪᓗᐊᑌᓕᖁᓪᓗᒋᑦ ᐅᖃᐅᑎᔭᐅᔪᑦᓴᐅᒥᔪᑦ, ᐅᕐᖂᓯᐅᕐᓂᑯᒥᓄᑦ ᖃᐅᓯᓕᓗᐊᖁᓇᒋᑦ ᕿᐅᑦᓴᕈᐊᕐᒪᑕ.
3. ᓴᓇᓂᖅ
ᐃᓕᓐᓂᐊᑏᑦ ᐃᓪᓗᕕᒐᓕᐅᕆᐅᕐᓴᑎᓗᒋᑦ. ᐊᑦᔨᓕᐅᕆᖃᑦᑕᓗᑎᑦ ᐃᓪᓗᕕᒐᓕᐅᖏᓐᓇᑎᓪᓗᒋᑦ ᓈᓂᖓᓄᑦ ᑎᑭᓪᓗᒍ ᖃᓄᖅ ᐱᐅᓯᖃᕐᒪᖔᑦ ᓈᓂᖓᓂ ᐅᖃᐅᑦᔪᑐᕐᑕᐅᓂᐊᕐᒪᑦ ᐊᒻᒪᓗ ᖃᐅᔨᓴᕐᑕᐅᓗᓂ ᑭᖑᓂᐊᒍᑦ.
ᐱᐅᓕᓂᐊᒉᑦ
- ᐊᐳᑎᖅ
- ᑐᐱᒃ
- ᓱᐴᔫᒃ
- ᑏ, ᐸᓂᕐᑎᑕᖅ, ᐊᓯᖏᓪᓗ.
- ᐃᒡᒍᑏᑦ
- ᓴᓇᕐᕈᑏᑦ (ᐸᓇᒃ, ᐅᓇᒃ, ᑭᓪᓘᑎᒃ, ᐊᑦᓱᓈᒃ)