ᖃᓄᐃᑦᑐᒥ ᐃᑉᐱᓂᐊᕐᓃᑦ ᐱᓇᓱᐊᕋᑦᓴᐅᕗᖅ ᕿᑐᕐᖓᑎᓐᓂᒃ ᐃᑲᔪᕐᓯᓚᖓᑦᓱᓂ ᐃᓕᑦᓯᑎᑦᓯᓂᒃᑯᑦ ᐱᔪᓐᓇᐅᑎᑖᕐᑎᓯᓂᒃᑯᓗ ᐃᒻᒥᓂᒃ ᐃᑉᐱᓂᐊᕐᓂᒥᓂᒃ ᓇᓗᓀᕐᓯᒐᓱᐊᕐᓗᓂ. ᐃᒻᒥᓂᒃ ᐃᑉᐱᓂᐊᕐᓂᒥᓂᒃ ᑲᒪᐅᑎ ᐱᐅᔫᕗᖅ ᑲᒪᐅᑎᐅᑦᓱᓂ ᑎᒥᐅᓪᓗ ᐃᑉᐱᓂᐊᕐᓂᐅᓗ ᐱᐅᓯᖏᓐᓂᒃ ᓇᓗᓀᕐᓯᐅᑎᐅᑦᓱᓂ.
ᓂᕆᐅᓇᖕᖏᑐᒥ ᐃᓕᓐᓂᐊᕖᑦ ᐅᒃᑯᐊᑕᐅᓯᒪᓂᖏᓐᓄᑦ, ᑲᑎᕕᒃ ᐃᓕᓴᕐᓂᓕᕆᓂᖅ ᐊᑐᐃᓐᓇᕈᕐᑏᓯᒪᔪᖅ ᖃᓄᐃᑦᑐᒥ ᐃᑉᐱᓂᐊᕐᓃᑦ ᐃᓕᓐᓂᐊᕈᑎᑦᓴᐅᔪᓂ ᑕᒡᒎᓇ ᖃᕆᑕᐅᔭᒃᑯᑦ ᐃᑲᔪᕐᓯᔭᐅᖁᓪᓗᒋᑦ ᕿᑐᕐᖓᓯ ᖃᐅᔨᓴᕐᓂᑯᑦ ᖃᓄᐃᑦᑐᒥᒃ ᐃᑉᐱᓂᐊᕐᓂᖃᕐᒪᖔᒻᒥᓂ ᖃᐅᔨᓴᕈᓐᓇᓯᓗᑎᒃ.
ᖃᓄᐃᑦᑑᓂᖏᑦ
ᐱᒻᒪᕆᐅᔪᖅ ᐱᓇᓱᐊᕋᑦᓴᐅᑉ ᐃᓗᐊᓃᑦᑐᖅ ᐃᓕᑦᓯᒐᓱᐊᕐᓂᖅ ᖃᓄᐃᑦᑑᓂᖏᓐᓂᒃ, ᐃᑉᐱᓂᐊᕐᓃᑦ ᐊᒻᒪᓗ ᐃᓱᒪᒃᑯᑦ ᐃᑉᐱᓂᐊᕐᓃᑦ ᐊᑑᑎᔭᐅᖃᑦᑕᑐᑦ ᐊᑐᓂ, ᐃᓕᑕᕐᓯᒋᐅᕐᓴᓗᑎᓪᓗ ᑕᒪᒃᑯᓂᖓ ᐃᓅᑎᓪᓗᒋᑦ. ᑕᒪᒃᑯᐊ ᐱᒋᐅᕐᓴᐅᑏᑦ ᐃᑲᔪᕐᓯᓚᖓᔪᑦ ᑕᒪᒃᑯᓂᖓ.
ᐱᓪᓚᕆᐅᕗᖅ ᖃᐅᔨᒪᔭᐅᒋᐊᖃᕐᓂᖓ ᑭᓇᓕᒫᒃᑯᑦ ᖃᓄᐃᑦᑐᒦᓐᓂᑕᖃᓲᖑᒻᒪᑕ – ᐊᐅᐸᓗᑦᑕᒦᑦᑐᑦ ᖁᕐᓱᑕᒥᓪᓗ ᐱᐅᖕᖏᑑᖕᖏᑐᑦ ᐅᐃᕖᑦᑐᒦᓐᓂᐅᒐᑎᓗ. ᖃᓄᐃᑦᑐᒦᓐᓂᐅᔪᓕᒫᑦ ᓂᕆᐅᕐᓂᖃᕈᑎᐅᓲᑦ ᖃᖓᑐᐃᓐᓇᓕᒫᒃᑯᑦ. ᖃᓄᐃᑦᑐᒦᓐᓂᓂᒃ ᐊᐅᓚᑦᓯᓃᑦ ᓇᐅᒥᓪᓘᓃᑦ ᐱᔭᖃᕐᓂᓴᐅᒐᓱᐊᕈᑎᑦᓴᐅᖏᑦᑐᑦ ᐃᕐᖃᑐᐃᒐᓱᐊᕈᑎᐅᒐᑎᓗ.
ᐱᒋᐅᕐᓴᐅᑏᑦ
ᐱᐅᓂᕐᓴᐅᕗᖅ ᐱᒋᐅᕐᓴᐅᑎᓂᒃ ᓯᕗᓪᓕᐹᖓᓂ ᐱᒋᐊᕐᕕᖃᕐᓗᓂ. ᐱᒋᐅᕐᓴᐅᑏᑦ ᐃᓕᔭᐅᑦᓴᐅᑎᒋᓛᕐᒥᔪᑦ ᐊᑯᓂᐅᖕᖏᑐᖅ!
ᐅᓐᓂᑑᑏᑦ
ᐱᒋᐅᕐᓴᐅᑎ ᐊᓂᒎᑎᑦᓯᐊᖁᓪᓗᒍ, ᐱᐅᓂᕐᓴᐅᕗᖅ ᕿᑐᕐᖓᓯ ᖃᓄᐃᑦᑐᒥ ᐱᐅᓯᐅᔪᓂᒃ ᑐᑭᓯᑎᑦᓯᐊᓗᒋᑦ. ᒪᑯᐊ ᐆᑦᑑᑏᑦ ᐃᑲᔪᕐᓯᒍᓐᓇᑐᑦ:
- ᖃᓄᐃᑦᑐᒦᓐᓂᖃᕐᓂᓂᒃ ᐊᐅᓚᑦᓯᒍᑏᑦ ᐊᑭᓐᓇᒥᐅᑕᖓ ᓄᐃᑕᑎᓗᒍ ᓂᓪᓕᒪᔪᖃᐅᑎᒥ ᑕᑯᒋᐊᕐᑕᐅᖃᑦᑕᓂᐊᕐᒪᑦ.
- ᐅᖄᕈᑎᒋᖃᑦᑕᓗᒋᑦ ᖃᓄᐃᑦᑐᒦᓐᓃᑦ ᓇᓂᑐᐃᓐᓇᖅ (ᓂᕆᓂᑦᓯᓂ, ᓯᓂᒐᓱᐊᕙᓪᓕᐊᓂᑦᓯᓂ, ᐃᒍᓂᓯᓐᓂ, ᓯᓚᒥ ᐱᖕᖑᐊᓂᑦᓯᓂ, ᒪᙯᓐᓂᓯᓐᓂ). ᓂᓪᓕᕈᑎᒋᖃᑦᑕᓗᒋᑦ ᐅᖃᐅᓯᑦᓴᖃᕈᑎᑎᑦ ᐃᓕᓐᓂᐊᑎ ᑐᑭᓯᓂᐊᕐᒪᑦ ᐱᐅᓯᑐᐃᓐᓇᐅᕆᐊᖓ ᐊᑦᔨᒌᖕᖏᑐᓂᒃ ᖃᓄᐃᑦᑐᒦᓐᓂᖃᓲᖑᓂᑦᑎᓂᒃ ᖃᓄᐃᓘᕈᑎᑦᓴᓂᓗ ᐊᑐᕐᓗᑎᑦ ᐊᐅᓚᑦᓯᓂᕐᒧᑦ ᓇᒻᒥᓂᖅ. ᐆᑦᑑᑎᒋᓗᒍ “ᑖᑦᓱᒧᖓ ᑕᖃᓗᖂᒻᒥᑕᐅᓲᖑᕗᖓ, ᖁᕐᓱᑕᒨᑦᑎᑕᐅᒋᐊᕕᓚᕿᑦᓱᖓ. ᓄᓪᓚᕆᐊᕈᑎᒥᒃ ᐊᑐᕐᓗᖓ ᓄᓪᓚᕆᐊᖃᕐᑐᖓ. ᐊᓂᕐᓵᓯᐊᕆᐊᕐᓗᖓ.”
- ᐱᐊᕃᑦ ᐃᑲᔪᕐᓯᒪᓗᒍ ᖃᐅᔨᒪᔭᖃᕐᓂᒥᒃ ᖃᓄᐃᑦᑐᒦᓐᓂᖃᕈᑎᖏᓐᓂᒃ ᐃᑉᐱᓂᐊᕈᑎᖏᓐᓂᓗ ᐅᖃᖃᑦᑕᓗᑎᑦ ᐃᑉᐱᒋᔭᖃᕈᑎᑎᓐᓂᒃ.
- ᐅᖄᖃᑦᑕᓗᒍ ᓱᓇ ᖃᓄᐃᑦᑐᒦᓐᓂᐅᒐᔭᕐᒪᖔᑦ ᖃᓄᐃᑦᑐᒦᓐᓂᕆᔭᐅᔪᒥ ᐅᕝᕙᓘᓐᓃᑦ ᓂᕆᐅᕐᓇᖏᑦᑑᓱᓂᓘᓐᓂᑦ ᖃᓄᐃᑦᑐᒦᓐᓂᖅ.
- ᐱᐊᕃᑦ ᐅᖃᐅᑎᖃᑦᑕᓗᒍ ᐱᐅᓯᕐᓲᑎᖓ ᖃᓄᑎᒋᒃ ᓱᕐᕃᒪᖔᑦ ᖃᓄᐃᑦᑐᒦᓐᓂᓂ ᖃᓄᕐᓗ ᐃᑉᐱᓂᐊᒻᒪᖔᕐᐱᑦ. ᐃᓕᓐᓂᐊᑎ ᐃᑲᔪᕐᓗᒍ ᐃᓱᕐᕿᒋᔭᖃᓕᕐᓂᒧᑦ ᐅᖄᕕᒋᓗᒍ ᐃᑉᐱᓂᐊᕈᑎᖏᓐᓂᒃ ᑭᖕᖒᒪᒋᔭᖏᓐᓂᓗ ᐅᖄᕈᒪᓕᕐᑎᒐᓱᐊᕐᓗᒍ ᐃᓕᓐᓄᑦ ᖃᓄᐃᑦᑐᒦᓐᓂᖓᓂᒃ. ᐃᓕᓐᓂᐊᑎ ᖁᕝᕙᑎᒋᐊᖃᑦᑕᓗᒍ ᓂᕆᐅᕐᓂᖃᕈᑕᐅᔪᓂᒃ ᖃᓄᐃᑦᑐᒦᓐᓂᖃᑐᐊᕐᐸᑦ ᓈᒻᒪᓈᖕᖏᕈᑎᖏᑦ ᖃᐅᔨᕙᓪᓚᑕᑐᐊᕆᖃᑦᑕᕈᓐᓀᓗᒋᑦ.
ᐅᖃᕐᑕᐅᒍᓰᑦ
ᖃᓄᐃᑦᑐᒥ ᐃᑉᐱᓂᐊᕐᓃᑦ ᓇᓗᓀᕐᓯᐅᑎᖏᑦ ᐃᑲᔪᕐᓯᒍᓐᓇᑐᑦ ᑕᒪᒃᑯᓄᖓᓅᓕᖓᔪᓂᒃ ᐃᓗᓕᖃᕐᓱᑎᒃ.