ᐃᓕᓐᓂᐊᑕᐅᔪᐃᑦ ᖃᐅᔨᒍᑎᕕᓃᑦ
ᐃᓄᐃᑦ ᐃᑲᔪᕐᓂᒥᒍᑦ ᐱᒋᐅᕐᐸᓕᐊᒍᑎᓕᕕᓃᑦ, ᑎᓕᔭᐅᒍᑎᒥᓂᒃ ᐃᑲᔪᕐᓂᑯᑦ ᐊᑑᑎᑦᓱᑎᒃ. ᑕᒪᓐᓇ ᐃᑲᔪᕐᓂᖅ ᐃᓕᑦᓯᕙᓪᓕᐊᒍᑎᐅᒻᒪᑦ, ᐱᒋᐅᕐᐸᓕᐊᒍᑎᐅᑦᓱᓂᓗ ᐃᒻᒥᓂᕿᒋᐅᕋᑕᕐᓱᓂ. ᐃᓅᖃᑎᒥᓂᒃ ᐃᑲᔪᕐᓂᖅ ᐱᐅᔫᒻᒪᑦ ᑎᒥᒃᑯᑦ, ᐃᓱᒪᒃᑯᓗ.
ᐃᓅᓯᖃᑦᓯᐊᓂᕐᒧᑦ ᓯᓚᑦᑐᓭᒍᑏᑦ
ᑖᓐᓇ ᐃᓕᓐᓂᐊᑎᑦᓯᒍᑎ ᐃᓅᓯᖃᑦᓯᐊᓂᕐᒧᑦ ᓯᓚᑦᑐᓭᒍᑎ, ᐊᓯᖏᓐᓂᒃ ᒪᑯᓂᖓ ᐃᓕᓐᓂᐊᑎᑦᓯᒍᑎᖃᕐᒥᓱᓂ:
- ᐃᓅᖃᑎᒌᑦᓯᐊᓂᖅ
- ᐃᓅᖃᑎᒥᓂᒃ ᐃᑲᔪᕐᓂᖅ
- ᓈᓚᓐᓂᖅ
- ᐃᓂᕐᑎᕆᐅᑏᑦ
- ᓂᕿᒥᒃ ᐊᕕᖃᑎᒌᓐᓂᖅ
- ᐆᒪᔪᓂᒃ ᐱᑦᓯᐊᕆᐊᖃᓐᓂᖅ
ᐊᑦᔨᓕᐊᕕᓂᖅ ᓗᐃᒃ ᕙᐅᑕᐅ-ᑯᓓᒧᑦ
ᐃᓕᓐᓂᐊᑎᑦᓯᓗᓂ ᐊᑑᑎᔭᐅᒍᓐᓇᑐᑦ
- ᐃᓕᓵᑦ, ᐃᓄᒻᒪᕇᑦ ᐅᖄᔭᕕᓂᖏᓐᓂᒃ ᐊᑐᐊᕐᓯᒍᓐᓇᑐᑦ, ᐃᓕᓭᔨᖓᓘᓐᓃᑦ ᐊᑐᐊᕐᓯᒍᓐᓇᑐᖅ ᑐᑭᓯᓇᕐᑎᓯᒋᐊᖃᑦᑕᓗᓂ.
- ᐊᑐᐊᕐᑕᐅᒌᑐᐊᕐᐸᑕ ᐃᓕᓵᑦ ᐅᖄᖃᑎᒋᓗᒋᑦ ᐃᓕᓭᔨᖓ ᐱᒋᐊᕐᑎᓯᑎᓪᓗᒍ, ᐅᓪᓗᒥᐅᓕᕐᑐᖅ ᖃᓄᖅ ᐊᑦᔨᒋᔭᐅᖕᖏᓂᑦᓴᐅᓕᕐᒪᖔᑦ ᐃᑲᔫᑎᓂᖅ ᐅᖄᑎᓪᓗᒋᑦ.
- ᐃᓄᐃᑦ ᐃᑲᔪᕐᑎᒥᓂᒃ ᐱᒻᒪᕆᐅᔪᖁᑎᖃᕐᓂᕕᓂᖏᓐᓂᒃ ᐅᓂᒃᑲᐅᔨᒋᐊᓪᓚᓗᒋᑦ, ᖃᐅᔨᒪᔭᕐᓃᕕᑦ, ᐊᑑᑎᓯᒪᔭᕐᓃᕕᓪᓗ ᑐᑭᓯᓇᕐᑎᓯᒋᐊᕈᑎᖃᕈᓐᓇᑐᑎᑦ.
- ᐃᑲᔫᑎᓂᕐᒥᒃ ᓲᓱᑦᓴᓯᐊᖁᓪᓗᒋᑦ ᐃᓄᒻᒪᕇᑦ ᐅᖃᐅᓯᕆᓯᒪᔭᖏᑦ ᒪᓕᓪᓗᒋᑦ. ᐃᑲᔫᑎᓂᕕᓂᖓᓄᑦ ᑭᓯᐊᓂ ᑕᒪᐅᖓ ᑎᑭᐅᑎᑎᑕᐅᓯᒪᒐᑦᑕ, ᐊᑯᓂ ᐃᓅᓕᕋᒥᒃ ᓱᓕᔪᓂᒃ ᐅᖄᒻᒪᑕ.
- ᐃᓕᓵᑦ ᐊᑐᐊᕐᓯᒌᕐᓯᒪᓕᑐᐊᕈᑎᒃ, ᐊᑐᐊᕐᓯᕕᐅᒌᕐᓯᒪᓕᕈᑎᓪᓘᓃᑦ ᓇᒻᒥᓂᖅ ᐃᓱᒪᒋᔭᒥᓂᒃ, ᑐᑭᓯᔭᒥᓂᓪᓗ ᐊᓪᓚᑎᓪᓗᒋᑦ, ᑌᑦᓱᒪᓂ ᐃᓄᐃᑦ ᐃᓅᖃᑎᒌᑦᓱᑎᒃ ᐃᑲᔫᑎᓂᕕᓂᖏᓐᓂᒃ.
- ᐃᓄᒻᒪᕆᒻᒧᑦ ᐳᓛᕆᐊᕈᓐᓇᒥᔪᑦ, ᐁᕕᐅᓗᑎᓪᓘᓃᑦ ᐃᓅᖃᑎᒥᓂᒃ ᐃᑲᔪᕐᓂᖅ ᖃᓄᖅ ᐊᑐᕐᑕᐅᕙᓚᐅᕐᒪᖔᑦ ᐅᓂᒃᑳᑎᑦᓯᓗᑎᒃ. ᐃᓕᓵᑦ ᐅᖄᕕᐅᒋᐊᕐᑐᓗᑎᒃ ᐅᖄᔭᕕᓂᖏᓐᓂᒃ ᐊᓪᓚᑎᓪᓗᒋᑦ.
ᐅᖃᐅᓯᕐᑕᖏᑦ ᐃᓄᐃᑦ ᐱᕐᖁᓯᖏᑦᑎᒍᑦ
ᐃᓄᐃᑦ ᐱᓇᓱᐊᕐᐸᓚᐅᕐᑐᑦ ᑌᒪᖕᖓᑦ ᐃᑲᔫᑎᑦᓱᑎᒃ, ᐅᕕᒐᕐᑑᒐᓗᐊᕋᒥᒃ ᐃᑲᔪᕋᕐᓴᒥᒃ ᑕᑯᓐᓇᑐᐃᓐᓇᓯᒪᖕᖏᑐᑦ, ᐃᓚᒥᓂᓪᓗ ᑌᒪᖕᖓᑦ ᐃᑲᔪᖁᔭᐅᑦᓱᑎᒃ ᐃᑲᔪᕆᐊᓕᓐᓂᒃ, ᐃᓄᒻᒪᕆᓂᒃ ᐱᓗᐊᖕᖑᐊᓱᑎᒃ, ᑐᑭᓯᒪᒐᒥᒃ ᐃᑲᔪᕐᓂᖅ ᐊᑐᕐᓂᖃᒻᒪᑦ.
ᐃᓅᖃᑎᒥᓂᒃ ᐃᑲᔪᕐᓂᖅ
- ᐃᓄᐃᑦ ᓯᕗᓂᑦᓴᓕᐅᕐᑕᐅᕙᓚᐅᕐᑐᑦ ᐃᓄᑦᓯᐊᒍᖁᔭᐅᑦᓱᑎᒃ ᐃᓅᖃᑎᒥᓂᒃ ᐃᑲᔪᐸᖁᔭᐅᑦᓱᑎᒃ
- ᕿᑐᕐᙰᑦ ᐃᑲᔪᕐᓂᒥᑎᒍᑦ ᐱᒋᐅᕐᐸᓕᐊᓲᒍᒻᒪᑕ ᐃᒻᒥᓂᕿᒋᐅᑐᐃᓐᓇᕋᑕᕐᓱᑎᒃ. ᐱᒋᐅᕐᓵᕆᔭᐅᓐᓂᖏᑦᑐᑦ ᐊᖓᔪᕐᙯᕈᑐᐊᕋᒥᒃ, ᐃᓪᓗᓕᑑᓕᑐᐊᕋᒥᓪᓘᓃᑦ ᐱᓇᓱᐊᓕᓂᐅᖕᖏᒧᑦ ᓱᒃᑯᕈᒐᓱᐊᑐᐃᓐᓇᑐᔮᓯᓲᑦ.
- ᐊᑖᑕᓗ, ᐊᓈᓇᓗ ᓄᐃᑌᓐᓇᓂᐊᑦᔭᖏᓐᓇᒥᒃ ᕿᑐᕐᖓᒥ ᐱᓇᓱᒐᑦᓴᓂᒃ ᐊᓇᕐᕋᒥ ᐃᑲᔪᕐᓯᒪᑎᑦᓯᒋᐊᖃᓲᒃ. ᑌᒪᖕᖓᓗ ᐃᑲᔪᕆᐊᖃᓐᓂᖓᓂᒃ ᐃᓚᓚᑳᓂᒥᓂᒃ, ᐃᓅᖃᑎᒥᓂᓪᓗ ᖃᐅᔨᒪᑎᑦᓯᒐᓱᐊᕐᓱᑎᒃ.
- ᑌᒪᖕᖓᑦ ᐱᒋᐅᕐᐸᓕᐊᓂᐊᐱᓕᒫᖓᓂ ᐃᑲᔪᕐᑎᓱᒍ ᐱᔪᓐᓇᑕᖏᓐᓄᑦ ᐊᓇᕐᕋᒥ, ᐊᓇᕐᕋᒥᓪᓗ ᐱᔭᑦᓭᕈᓯᒪᒐᓗᐊᕐᒪᑦ ᐱᕐᖃᔭᖕᖏᑐᓂᒃ, ᐱᔨᖃᖕᖏᑐᓂᓪᓗ ᐃᑲᔪᕐᓯᒪᑎᑦᓱᒋᑦ. ᑌᒪᖕᖓᓂᑦ ᐅᖃᐅᑦᔭᐅᖃᑦᑕᓯᒪᒐᑦᑕ ᐱᔪᓐᓇᓂᕐᓴᐅᔪᑦ ᐊᓯᒥᓂᒃ ᐱᔪᓐᓇᖏᓐᓇᓴᒥᒃ, ᐃᑲᔪᕋᑦᓴᐅᔮᓕᕐᑐᒥᓪᓘᓃᑦ ᑕᑯᓐᓇᑐᐃᓐᓇᕆᐊᖃᑦᔭᖏᒻᒪᑕ ᐱᔪᓐᓇᑐᐊᕈᓂ.
- ᑐᕈᓯᐊᐲᑦ ᐱᒋᐅᕋᑕᑦᔭᖏᑦᑐᑦ, ᐃᓱᒪᒋᑐᐃᓐᓇᔭᕈᓐᓀᓗᒋᑦ ᒪᓕᒍᒪᒋᐅᕐᓂᐅᓕᑐᐊᕐᐸᑕ ᒪᙯᑦᑐᓂᒃ ᒪᓕᑦᑎᑕᐅᖃᑦᑕᕆᐊᓖᑦ, ᒪᓕᖃᑦᑕᓂᕐᒥᑎᒍ ᑭᓯᐊᓂ ᐱᒋᐅᕐᐸᓕᐊᒍᓐᓇᒥᔪᑦ.
- ᐃᓄᐃᑦ ᓯᕗᓂᑦᓴᓕᐅᕐᑕᐅᕙᓚᐅᕐᑐᑦ ᐃᓄᑦᓯᐊᒍᖁᔭᐅᑦᓱᑎᒃ ᐃᓅᖃᑎᒥᓂᒃ ᐃᑲᔪᐸᖁᔭᐅᑦᓱᑎᒃ.
- ᐃᓄᐃᑦ ᓯᕗᓂᑦᓴᓕᐅᕐᑕᐅᕙᓚᐅᕐᑐᑦ ᐃᓄᑦᓯᐊᒍᖁᔭᐅᑦᓱᑎᒃ ᐃᓅᖃᑎᒥᓂᒃ ᐃᑲᔪᐸᖁᔭᐅᑦᓱᑎᒃ .
- ᓯᕗᓪᓕᕆᕙᓚᐅᕐᑕᕗᑦ ᐊᕐᓱᕈᕐᓯᒪᑦᓴᒪᑕ. ᑕᒪᒃᑯᐊ ᐊᑖᑌᕐᑐᕕᓃᑦ, ᐊᖑᑎᖃᕈᓐᓀᑐᐃᓪᓗ (ᐅᐃᒡᒐᓃᑦ) ᕿᑐᕐᖓᓚᑳᒥᓂᒃ ᐁᑦᓯᑫᓲᒍᒻᒪᑕ, ᑕᒪᓐᓇ ᐱᐅᓯᐅᒻᒪᑦ ᑌᒣᑦᑐᑰᑦᓱ ᓈᔨᑎᑕᐅᓯᒪᒐᓗᐊᕋᑦᑕ ᐃᑲᔪᖃᑦᑕᐅᑎᓂᒃᑯᑦ, ᐃᑲᔪᖃᑦᑕᐅᑎᓂᒃ ᐱᓪᓚᕆᐊᓘᒻᒪᑦ.
- ᓯᓚᕐᖃᑎᒥᓂᒃ ᐱᔨᖃᖕᖏᑐᓂᒃ ᐃᓱᒫᓗᑉᐸᖁᔭᐅᕙᓚᐅᕐᑐᑦ, ᑌᒣᑦᓱᓂ ᐃᓅᓯᖅ ᐃᓱᕐᕆᓇᕐᑐᖅ.
- “ᐃᓄᒃ ᐃᑲᔪᕆᐊᕆᐊᖃᓕᕋᕕᐅᒃ”,-ᓚᔭᐅᕙᑦᓱᑕᓗ. ᐃᒥᕐᑕᓂᖏᓐᓇᓕᒫᕐᓱᑕᓗ ᓱᓇᒐᓚᖏᑦ, ᖁᕐᕕᖏᑦ ᐊᓂᑉᐸᓱᒋᑦ, ᐱᔭᕇᑦᓯᐊᓚᐅᑲᑦᓱᑕ, ᐳᓛᕋᓗᐊᕋᑦᑕ ᐃᑲᔪᕋᑦᓴᐅᑐᐊᕐᒪᑦ ᐃᑲᔪᕐᐸᓱᑕ.
ᑌᑦᓱᒪᓂ ᑭᓇᑐᐃᓐᓇᖅ ᑭᑦᓴᓕᕐᒪᑦ, ᐃᓱᒪᒥᒍᓪᓘᓃᑦ ᐃᓱᐃᓪᓕᐅᓕᕐᒪᑦ, ᐃᓄᐃᑦ ᐃᑲᔪᕐᑏᑦ ᑲᑎᕙᓚᐅᕐᑐᑦ ᐃᑲᔪᕐᓯᒐᓱᐊᓯᑦᓱᑎᒃ ᑌᒣᑦᓯᐊᖏᑦᑐᒥᒃ.
- ᐅᓪᓛᑯᑦ ᒪᑭᓐᓇᓵᕐᐸᓚᐅᖕᖏᑐᒍᑦ ᐃᓱᒫᓗᒋᔭᖃᕐᑎᑕᐅᑦᓱᑕ ᐱᓇᓱᒐᑦᓴᓚᑳᓂᒃ, ᐃᒪᕐᑕᓂᕐᓂᒃ, ᖁᕐᕕᓂᒃ ᐊᓂᑦᓯᓂᕐᒥᒃ, ᐊᓯᖏᓐᓂᓗ.
- ᐃᓄᐃᑦ ᓯᕗᓂᑦᓴᓕᐅᕐᑕᐅᕙᓚᐅᕐᑐᑦ ᐃᓄᑦᓯᐊᒍᖁᔭᐅᑦᓱᑎᒃ ᐃᓅᖃᑎᒥᓂᒃ ᐃᑲᔪᐸᖁᔭᐅᑦᓱᑎᒃ.
- ᐃᓄᒻᒪᕆᓐᓂᒃ ᐃᑲᔪᕆᐊᖁᔭᐅᕙᓚᐅᕐᑐᒍᑦ ᐃᒥᕐᑕᐅᔨᑦᓱᒋᑦ, ᖁᕐᕕᖏᑦ ᐊᓂᑦᓱᒋᑦ, ᑭᓇᒃᑯᑐᐃᓐᓇᓂᓪᓘᓃᑦ ᐳᓛᕋᓗᐊᕋᑦᑕ ᑕᑯᓐᓇᑐᐃᓐᓇᖁᔭᐅᕙᓚᐅᖕᖏᑐᒍᑦ, ᐱᔭᕇᑦᓯᐊᕈᑦᑕ ᐃᓱᒪᒥᓐᓂᐊᕋᑦᑕ.
- ᐃᓄᒻᒪᕇᑦ ᐃᑲᔪᕐᑕᐅᕙᑐᐊᕋᒥᒃ ᐱᐅᓂᕐᓴᖅ, ᐃᓱᕐᕆᓯᐊᕐᓇᓂᕐᓴᖅ. ᑌᑦᓱᒪᓂᒋᐊᖅ ᕿᒣᑐᐃᓐᓇᓲᒍᓐᓂᒪᑕ ᐃᓄᒻᒪᕆᐅᓕᑐᐊᕐᒪᑕ. ᐃᓄᒻᒪᕆᓐᓂᒃ ᑲᒪᑦᓯᐊᑐᖃᖕᖏᑐᐊᕋᒥ ᓱᒃᑯᔫᒥᒍᑕᐅᓂᕐᓴᖅ. ᐃᓱᒪᒐᓱᐊᑦᓯᐊᐸᓐᓂᐊᖁᒍᑦ. ᐊᓈᓇᒃᑯᕗᑦ, ᐊᑖᑕᒃᑯᕗᓪᓗ ᑕᒪᒃᑯᓂᖓ ᐃᓄᒻᒪᕆᓐᓂᒃ ᐱᕐᖃᔭᕈᓐᓀᑐᓂᒃ ᐃᑲᔪᖁᔨᓲᒍᒻᒪᑕ.
- ᓯᕗᓪᓕᕆᕙᓚᐅᕐᑕᕗᑦ ᐊᑖᑕᖃᕈᓐᓀᕋᒥᒃ ᐊᕐᓱᕈᑦᑐᐊᓘᕙᓚᐅᕐᒪᑕ ᑲᒪᔨᑦᓴᖃᕈᓐᓀᕋᒥᒃ, ᐊᕐᓱᕈᑦᓯᒪᓂᖏᑦ ᓄᐃᑕᕙᒻᒪᑕ, ᐃᑲᔪᕐᑕᐅᓂᕐᒧᑦ ᑭᓯᐊᓂ ᑕᒪᒃᑯᐊ ᑌᒣᑦᑑᕙᓚᐅᕐᑐᑦ ᐊᖏᔪᒥᒃ ᐃᑲᔪᕐᑕᐅᓯᒪᓂᖃᑦᓴᕋᑦᑕ ᐃᓄᓐᓄᑦ, ᐃᓅᖃᑎᒌᓐᓂᑯᑦ ᐃᑲᔫᑎᓂᒃᑯᑦ. ᓯᕗᓪᓕᕕᓂᕗᑦ ᑌᒣᑦᑑᕙᓚᐅᕐᒪᑕ ᑕᒪᒃᑯᓂᖓ ᐃᓱᒪᑦᓯᐊᕆᐊᖃᕋᓗᐊᕋᑦᑕ, ᑕᒪᓐᓇᑕᐅᖅ ᐱᓪᓚᕆᐅᓂᕐᐹᕌᓗᒃ. ᑌᒃᑯᐊ ᓯᕗᓪᓕᕆᕙᓚᐅᕐᑕᕗᑦ ᐊᕐᓱᕈᕐᓯᒪᑦᓴᒪᑕ.
- ᐅᖃᐅᑦᔪᑕᐅᕙᓚᐅᕐᒥᔪᑦ, “ᐃᓄᒎᖅ ᐃᓅᓯᕐᒥᓂᒃ ᐱᑦᓯᐊᑐᕕᓂᐅᒍᓂ ᑐᖁᑦᓯᐊᓲᖅ.”
ᖃᕝᕙᑎᑦᓯᒍᑏᑦ
ᓇᑯᕐᒦᒪᕆᑉᐳᒍᑦ ᐃᓄᐃᑦ ᐱᐅᓯᕆᓯᒪᔭᖏᓐᓂᒃ ᐅᖄᖃᑦᑕᓯᒪᔪᓂᒃ ᐅᑯᓂᖓ:
ᔮᓂ ᒪᓄᒥ ᐃᓄᑉᐸᒃ
ᐋᑦᑕᒥ ᓂᕕᐊᕐᓯ
ᑖᒧᓯ ᖁᒪᖅ
ᐄᕙ ᐃᓕᒪᓴᐅᑦ
ᐃᔨᑦᓯᐊᖅ ᓯᒥᒐᖅ
ᑑᒪᓯ ᑲᓪᓚᒃ
ᒨᓱᓯ ᐱᐅᕖ
ᒥᑎᐊᕐᔪᒃ ᓇᑉᐹᓗᒃ
ᕃᑭ ᓇᔪᒻᒥ ᐊᐅᒋᐊᖅ
ᐋᓂ ᐊᓚᑯ (ᑲᖏᕐᓱᔪᐊᖅ)
ᐹᓴ ᓯᒥᒐᖅ
ᕿᐱᑕᖅ ᐊᕐᓀᑐᖅ
ᐁᓴ ᐆᒪᔪᐊᓗᒃ
ᓈᓚ ᓇᑉᐹᓗᒃ
ᐋᓂ ᑯᕇ
ᕕᓕᓯ ᐋᓇᖃᑕᒃ
ᑯᓱᒐᓕᓂᖅ ᐃᓕᒪᓴᐅᑦ
ᑏᕕ ᐃᑦᑐᖅ
ᓇᑯᕐᒦᐳᒍᑦ ᐊᑦᔨᖑᐊᓂᒃ ᐊᑦᔨᓕᐅᕐᑕᐅᓯᒪᔪᓂᒃ ᓄᐃᑎᑦᓯᓯᒪᔪᑦ ᐃᓂᓪᓚᑎᕆᓯᒪᔪᓂᓪᓗ ᐅᑯᓂᖓ: ᐊᕙᑕᒃᑯᓂᒃ, ᑲᑎᕕᒃᑯᑦ ᐃᓕᓭᒍᑎᓕᐅᕐᑎᖏᓐᓂᒃ.
ᓇᑯᕐᒦᐳᒍᑦ ᐃᓄᒻᒪᕆᓂᒃ ᓂᐱᓕᐅᖃᑦᑕᓯᒪᔪᓂᒃ ᐊᕙᑕᒃᑯᓄᑦ ᑎᓕᔭᐅᒪᑦᓱᑎᒃ.
ᓇᑯᕐᒦᐳᒍᑦ ᑖᒃᑯᓂᖓ ᑲᑎᕐᓱᐃᖃᑦᑕᓚᐅᕐᑐᓂᒃ ᐃᓂᓪᓚᑎᕆᑦᓱᑎᓪᓗ:
ᐱᐊᑦᓯ ᐋᓇᖃᑕᒃ
ᒥᐊᔨ ᐃᓓᔭᓯᐊᐱᒃ
ᓴᓚ ᐹᓪᓚᔮᑦ
ᔨᐊᓯᑲ ᐋᕐᖓᖅ