ᐃᓄᐃᑦ ᕿᓚᐅᑦᔭᖃᑦᑕᓯᒪᓕᕐᖁᑦ ᐊᑯᓂᐅᓕᕐᑐᖅ. ᓇᓗᓇᕐᑐᖅ ᖃᖓ ᕿᓚᐅᑦᔭᓂᖅ ᓄᐃᒋᐊᖕᖓᓂᕐᒪᖔᑦ ᐃᓄᐃᑦ ᐃᓗᕐᖁᓯᖓᓄᑦ,ᑭᓯᐊᓂ ᕿᓚᐅᑦᔭᓂᐅᑉ ᒥᑦᓵᓄᑦ ᑕᑯᑦᓴᐅᑎᑦᓯᔪᓂᒃ ᖃᐅᔨᖃᑦᑕᓯᒪᓕᕐᑐᑦ ᐊᕐᕌᒍᕐᓂ4,500 ᐊᓂᒍᕐᑐᓂ. ᓄᑕᐅᖕᖏᓂᕐᐹᖅ ᕿᓚᐅᑦᔭᕈᑎᐅᑉ ᐃᓚᖓ ᑕᑯᔭᐅᓯᒪᔪᖅ ᑲᓇᑕᒥ 1000ᐊᕐᕌᒍᐃᑦ ᓈᓕᕐᑐᑦ ᐊᒻᒪᓗ ᑕᑯᔭᐅᓯᒪᑦᓱᑎᒃ ᐯᓚᑦ ᕿᑭᕐᑕᖏᓐᓂ ᓄᓇᕘᕐᒥ.ᐱᐅᓯᑐᖃᕐᓂ ᐊᖑᑏᑦ ᕿᓚᐅᑦᔭᓲᕕᓃᑦ ᓱᔪᖃᕐᑐᕕᓂᐅᑐᐊᕐᒪᑦ ᐆᑦᑐᑎᒋᓗᒍ ᓱᕈᓯᖅ ᓯᕗᓪᓕᐹᒥ ᒪᙯᓐᓂᕕᓂᖓᓄᑦ ᐅᕝᕙᓘᓐᓃᑦ ᐱᐊᕋᖅ ᐃᓅᓕᕐᒪᑦ. ᑭᓯᐊᓂ ᐃᓚᖏᓐᓂ ᓄᓇᕗᑦ ᓄᓇᓕᖏᓐᓂ ᐊᕐᓀᑦ ᐊᒻᒪᓗ ᐱᐊᕃᑦ ᕿᓚᐅᑦᔭᕈᓐᓇᐸᓐᓂᒥᔪᑦ ᑖᓂᓯᕐᓱᑎᓪᓗ.
ᐱᐅᓯᑐᖃᕐᑎᒍᑦ, ᕿᓚᐅᑦᔦᑦ ᓴᓇᔭᐅᖃᑦᑕᓯᒪᔪᑦ ᕿᔪᒻᒥ ᐃᒪᕐᒦᑎᑕᐅᔪᕕᓂᕐᒥ ᐊᑯᓂ ᓴᖑᑎᑕᐅᒍᓐᓇᓯᑦᓱᓂ ᕿᓚᐅᑦᔭᓕᐅᕐᑑᑉ ᓯᕐᖁᖏᓐᓄᑦ,ᐊᒡᒐᖏᓐᓄᑦ ᐊᒻᒪᓗ ᐊᓪᓕᕈᖏᓐᓄᑦ. ᓯᓚᑉᐱᐊᖓ ᕿᓚᐅᑦᔭᐅᑉ ᑐᑦᑐᔭᐅᕙᓪᓗᐸᑦᑐᕕᓂᖅ ᐅᓪᓗᐃᑦ ᒪᓕᑦᓱᒋᑦ ᓵᓐᓂᐹᒥᒃ ᒪᒥᕐᑖᕕᑦᓴᖅ ᒪᓕᑦᓱᒍ.
ᑖᓐᓇ ᑐᑦᑑᑉ ᐊᒥᖓ ᑌᒪ ᐃᒪᕐᒦᑎᑕᐅᓯᑦᓱᓂ ᒥᕐᖁᓕᒫᖏᑦ ᐱᔭᕐᑎᑕᐅᑦᓱᑎᒃ ᑕᐃᒪ ᐸᓂᕐᓯᓂᐊᓕᕐᒪᑦ. ᐱᒻᒪᕆᐅᕙᑦᑐᕕᓂᖅ ᑐᑦᑐᔭᕐᒥᒃ ᐊᓕᑎᑦᓯᑌᓕᑦᓱᓂ ᑭᓪᓚᖃᕐᑌᓕᑎᓗᒍᓗ. ᕿᓚᐅᑦᔭᐅᑉ ᐊᓇᐅᓪᓚᐅᑎᖏᑦ ᓴᓇᔭᐅᓲᕕᓂᖅ ᕿᔪᒻᒥᑦ, ᓇᑦᔪᓂᒃ ᐅᕝᕙᓘᓐᓃᑦ ᐃᒪᕐᒥᐅᑕᐅᑉ ᐆᒪᔫᑉ ᐃᓚᖓᓂᒃ ᐃᒧᔭᐅᒪᑦᓱᓂ ᐆᒪᔫᑉ ᒪᒥᖓᓄᑦ(ᑐᑦᑐᔭᕐᒧᑦ, ᓇᑦᓯᔭᕐᒧᑦ ᐅᕝᕙᓘᓐᓃᑦ ᐊᓯᖏᓐᓄᑦ). ᕿᓚᒍᑎᖓ ᐊᕙᓗᖓᓂ ᕿᓚᐅᑦᔭᐅᑉ ᐱᕐᕃᑕᐅᓲᕕᓂᖅ ᐊᕐᓇᒧᑦ ᐊᑐᕐᓱᓂ ᐃᕙᓗᔭᕐᒥᒃ. ᑌᒣᑦᑐᖅ ᕿᓚᐅᑦᔭᖅ ᐲᔭᕐᑕᐅᓲᕕᓂᖅ ᑖᓂᓯᕐᑎᓯᓂᖅ ᕿᓚᐅᑦᔭᒧᑦ ᐱᔭᕇᕐᒪᑦ.ᑐᑦᑐᔭᖅ ᐲᕐᑕᐅᓱᓂ, ᐃᒧᔭᐅᑦᓱᓂ ᐊᒻᒪᓗ ᐃᓂᑦᓯᐊᒨᕐᑕᐅᓱᓂ ᑖᓂᓯᕐᑎᓯᒋᐊᓪᓚᓕᕐᒥᐸᑕ ᕿᓇᐅᑦᔭᓂᕐᒧᑦ ᑭᖑᓪᓕᒥ ᐊᑐᕐᑕᐅᒋᐊᓪᓚᖏᓐᓂᒥᓂ.
“ᐃᓚᖏᑦ ᓂᒪᓐᓂᖏᑦ ᐱᐅᔪᓪᓚᕆᐅᓲᑦ ᐅᑎᕐᑕᓱᑎᒃ ᓯᕗᒧᓪᓗ ᐊᑦᓱᕉᓚᓂᖃᕐᑑᔭᕋ ᑎᒃ”
ᓘᒃ ᐊᕐᓈᓇᖅ, 1987
ᐅᓪᓗᒥᐅᓕᕐᑐᖅ, ᐃᓄᐃᑦ ᕿᓚᐅᑦᔭᐅᑎᖏᑦ ᓴᓇᔭᐅᓲᑦ ᕿᔪᒻᒥᑦ ᐊᒻᒪᓗ ᓯᓚᐹᑦᓴᔭᒥᒃ ᖃᐅᓯᓕᕐᖃᔭᖕᖏᑐᑦᓴᔭᒥᒃ(ᖃᓪᓗᓈᕐᑕᔭᖅ ᐊᑐᕐᑕᐅᓲᖅ ᓱᕈᔪᑦᓯᐅᑎᑦᓴᔭᐅᑎᓪᓗᒍ ᐊᑎᒋᓕᐊᓄᑦ). ᐃᓄᐃᑦ ᓂᐅᕕᕈᓐᓇᑐᑦ ᑌᒣᑦᑐᒥᒃ ᓯᓚᐹᑦᓴᔭᕐᒥᒃ ᓂᐅᕕᕐᓂᐊᕕᒻᒥᑦ,ᕿᓚᒍᑎᑦᓴᖓᓂᓪᓗ ᐊᕙᓗᖓᒍᑦ ᕿᓚᐅᑦᔭᐅᑉ. ᑌᒫᒃ ᓱᑲᓐᓂᓴᔭᖅ ᓴᓇᒋᐊᖓ ᐊᒻᒪᓗ ᐊᑯᓃᕐᓂᓴᐅᓲᖑᑦᓱᓂ.ᐲᔭᕆᐊᑐᕋᓂᓗ ᓯᓚᑉᐱᐊᖓ ᐱᐅᓕᐊᖑᓚᖓᓗᓂ.
ᕿᓚᐅᑦᔭᓂᕐᑎᒍᑦ ᑖᓂᓯᕐᓂᖅ ᐊᑦᔨᐅᖏᑦᑐᒥᒃ ᑖᓂᓯᕈᓯᕐᓂᒃ ᐱᑕᖃᓲᖑᒻᒥᔪᖅ ᐆᑦᑐᑎᒋᓗᒍ ᓰᕐᖂᓂᒃ ᐃᕿᑦᑎᓯᑦᓱᓂ ᓂᒪᓐᓂᖅ ᐊᒻᒪᓗ ᓂᒪᔭᕐᓂᖅ ᑫᕙᓗᐊᕐᓱᓂ. ᐃᓚᖏᑦ ᕿᓚᐅᑦᔭᑏᑦ ᓂᓪᓕᖃᑦᑕᓲᖑᒻᒥᔪᑦ ᐅᖃᕐᑕᐅᓲᑦ ᓂᓪᓕᕆᐊᑲᓪᓚᖃᑦᑕᑐᑦ. ᑖᓐᓇ ᓂᓪᓕᕆᐊᑲᓪᓚᖃᑦᑕᓂᖅ ᓄᐃᑕᑎᑦᓯᒥᔪᖅ ᕿᓚᐅᑦᔭᑎᒥᒃ ᐊᓕᐊᓱᓐᓂᖓᓂᒃ ᐊᒻᒪᓗ ᖁᕕᐊᓱᐊᓂᖓᓂᒃ. ᐃᓚᖏᑦ ᐃᓄᐃᑦ ᕿᓚᐅᑦᔭᑏᑦ ᐃᖕᖏᕈᓯᓕᐅᓲᖑᒻᒥᔪᑦ ᓇᒻᒥᓂᖅ ᐃᖕᖏᕈᓯᒥᓂᒃ ᕿᓚᐅᑦᔭᒍᓯᕐᒥᓗ. ᐃᓘᓐᓇᒐᓚᑎᒃ ᑖᒃᑯᐊ ᐃᖕᖏᕈᓰᑦ ᐊᑦᔨᐅᖏᑦᑐᒥᒃ ᐊᑑᑎᓯᒪᓂᕐᒥᓄᑦ ᓄᓇᒥ ᐃᖕᖏᕈᑎᐅᓲᑦ. ᐃᓚᖏᑦ ᐃᖕᖏᕈᓰᑦ ᑭᖑᕚᖏᓐᓄᑦ ᐁᑦᑑᑎᐅᓲᖑᒻᒥᔪᑦ ᐊᖓᔪᕐᖄᖏᓐᓂᑦ ᐅᕝᕙᓘᓐᓃᑦ ᓴᐅᓂᖏᓐᓂᑦ (ᐊᑎᖃᕐᕕᖏᓐᓂᑦ).
ᐃᓄᐃᑦ ᕿᓚᐅᑦᔭᕈᓯᖏᑦ ᓄᓇᕕᒻᒨᓯᒪᔫᔭᖕᖏᑲᓗᐊᕐᑎᓗᒋᑦ ᑭᖑᓂᕐᒥ, ᐊᒥᓱᐃᑦ ᐃᖕᖏᖑᐊᕐᑏᑦ ᕿᓚᐅᑦᔭᓂᕐᒥᒃ ᓄᓇᕕᒻᒥ ᓄᓇᓕᖏᓐᓅᕆᓯᒪᓕᕐᑐᑦ ᒫᓐᓇᐅᔪᖅ. ᑕᑯᒍᓐᓇᒥᔪᒍᑦ ᐊᒥᓱᓂᒃ ᓴᓇᖕᖑᐊᑎᓂᒃ ᓴᓇᐅᒐᕐᓯᒪᔭᖏᓐᓂᒃ ᐅᕝᕙᓘᓐᓃᑦ ᓴᓇᖕᖑᐊᓯᒪᔭᖏᓐᓂᒃ ᐃᓚᐅᑎᓪᓗᒋᑦ ᐃᓄᐃᑦ ᕿᓚᐅᑦᔭᑏᑦ ᐃᓚᒋᔭᐅᑎᓪᓗᒋᑦ ᐃᓗᕐᖁᓯᖏᓐᓄᑦ.