‹ ᕿᓂᕈᑎᒧᑦ ᐅᑎᕈᑎᒃ
ᐃᓕᓐᓂᐊᑎᑦᓯᒍᑎᑦᓭᑦᐸᕐᓇᓯᒪᔪᑦ

ᐊᐳᑏᑦ ᐃᒪᑐᐃᓐᓀᓗ ᐊᑦᔨᐸᓱᒌᓐᓂᖏᑦ

ᐃᓘᓐᓈᒍᑦᑕᑯᓐᓇᓂᖅ

ᐊᓂᐅᖅ ᐊᑐᕐᑕᐅᓂᕐᐸᐅᕗᖅ ᐃᓄᐃᑦ ᓄᓇᒥ ᐊᓐᓇᐅᒪᒐᓱᐊᕐᓂᑯᑦ. ᐃᓪᓗᕕᒐᓕᐅᕈᑎᐅᓲᖑᑦᓱᑎᒃ ᐊᕐᖁᑎᒋᔭᐅᑦᓱᑎᓪᓗ, ᐃᒪᑐᐃᓐᓇᕆᔭᐅᓲᖑᑦᓱᑎᒃ ᐃᓄᓐᓄᑦ ᒪᙯᓕᑐᐊᕐᒪᑕ. ᑌᒣᒐᓗᐊᕐᑎᓗᒍ, ᐃᓕᓐᓂᐊᑏᑦ ᐃᓕᓐᓂᐊᓚᖓᔪᑦ, ᐊᐳᑏᑦ ᐊᑦᔨᒌᖕᖏᓂᖏᓐᓂᒃ ᐃᒥᕐᑕᐅᓲᑦ.

ᐃᓕᓐᓂᐊᑕᐅᔫᑉ ᓈᓂᖓᓂ, ᐃᓕᓐᓂᐊᑏᑦ ᐃᓕᑕᕐᓯᒍᓐᓇᓯᓚᖓᔪᑦ ᐊᐳᑏᑦ ᐃᒪᑐᐃᓐᓀᓗ ᐊᑦᔨᐸᓱᒌᓐᓂᖏᓐᓂᒃ ᐊᐳᑎᒥᒃ ᖃᐅᔨᓴᕈᑎᖃᕐᓗᑎᒃ/ᓇᐅᑦᓯᑐᐃᓗᑎᓪᓗ, ᓇᓗᓀᕐᓯᓗᑎᒃ ᐊᐳᑎᒥᒃ ᐃᒪᑐᐃᓐᓇᓯᐊᖑᓂᕐᐹᒥᒃ.

ᐃᓕᓐᓂᐊᑕᐅᔪᐃᑦ ᖃᐅᔨᒍᑎᕕᓃᑦ

ᒥᑦᓴᐅᓵᕆᓚᐅᑲᓪᓗᑎᒃ, ᖃᐅᔨᓴᕙᓪᓕᐊᓯᓂᐊᕋᒥ ᑌᒪ ᑐᑭᑖᕐᓗᑎᒃ ᖃᐅᔨᒍᑎᓂ, ᐃᓕᓐᓂᐊᑏᑦ ᐱᒍᓐᓇᓂᕐᒥᓂᒃ ᑕᑯᓐᓇᑕᐅᑎᑦᓯᓗᑎᒃ: ᕿᓂᕐᓗᑎᒃ ᑭᐅᑦᔪᑎᓂ ᑐᑭᑖᕈᑎᓂᓪᓘᓃᑦ ᓱᑯᐃᔦᓃᑦ ᐅᕝᕙᓘᓐᓃᑦ ᖃᕆᑕᐅᔭᕈᑏᑦ ᒥᑦᓵᓄᑦ ᐱᓀᓗᑕᐅᔪᓂᒃ.

ᖃᐅᔨᒪᓂᖅ

ᖃᓄᐃᑦᑑᓂᖏᑦ ᐊᐳᑏᑦ ᐊᑦᔨᒌᖕᖏᑐᐃᑦ (ᐃᑦᔪᓂᖓ, ᐊᐳᑏᑦ ᐃᒣᓪᓗ ᐊᑦᔨᐸᓱᒌᓐᓂᖏᑦ) ᐊᒻᒪᓗ ᐅᖃᕐᑕᐅᒍᓯᓪᓚᕆᖏᑦ ᓱᕐᖄᑎᕐᑕᐅᒍᓰᓪᓗ ᑐᑭᓯᓇᕐᑎᓯᐅᑏᑦ.

ᐱᔪᓐᓇᓂᖏᑦ

ᐃᓕᑕᕐᓯᒋᐅᕐᓴᓂᖅ ᐊᑦᔨᒌᖕᖏᑐᓂᒃ ᐊᐳᑎᓂᒃ

ᖃᐅᔨᓴᕐᓂᖅ, ᐅᖁᒣᓐᓂᓂᒃ ᑲᒪᐅᑎᒥᒃ ᐊᑐᕐᓗᑎᑦ, ᑐᑭᓯᓴᕐᓂᖅ ᐃᓗᓕᖏᓐᓂ

ᖃᐅᔨᒍᑎᕕᓂᕐᒥᓂᒃ ᖃᐅᔨᑎᑦᓯᓂᖅ ᐊᓯᒥᓄᑦ

ᐱᐅᓯᖏᑦ

ᑐᑭᓯᒍᒪᓂᖏᑦ

ᐊᓯᒥᓄᑦ ᐅᒃᑯᐃᖔᑦᓯᐊᓂᖅ

ᓱᑲᓐᓂᖓ

ᖁᓪᓕᒧᑦ ᑏᓕᐅᕐᓂᖅ
ᓵᓕ ᓇᐅᒃᑲᕈᐊᑉ ᐊᑦᔨᓕᐊᕕᓂᖓ

1. ᐊᓂᐅᑉ ᐊᐅᓕᕐᓂᖓ

ᖃᐅᔨᓴᕐᑐᖅ: ᖃᐅᔨᕙᓪᓕᐊᔪᖅ ᑲᒪᓇᓱᐊᕐᑐᖅ ᓈᓚᑦᓱᓂ

ᖃᓄᐃᓕᖓᓕᕇᑦᓯᐅᓗᒋᑦ ᑐᑭᓯᓇᕐᑎᓯᒍᑏᑦ ᑖᒃᑯᐊ ᓄᓇᒥ ᒪᙯᓐᓂᐅᔪᓄᑦ, ᐅᕝᕙᓘᓐᓃᑦ ᐊᑑᑎᔭᐅᑎᓪᓚᕆᓪᓗᒍ. ᐃᓕᓐᓂᐊᑏᑦ ᓄᓇᒨᖃᑎᒋᓗᒋᑦ ᑏᑐᖃᑎᒌᕆᐊᕐᑐᓗᓯ ᐳᑳᓄᑦ ᑏᓕᐅᕐᓗᓯ. ᑕᑯᓐᓇᑕᐅᑎᓗᒍ ᐊᖏᓂᖓᑕ ᐊᓯᑦᔨᓂᖓᓂᒃ ᑐᑭᓯᓇᓕᕐᑎᓗᒍ ᐊᓯᑦᔨᕙᓪᓕᐊᓂᖓ. ᑌᑲᓂ ᑕᒐ ᙯᖁᔨᓯᒪᓗᓂ ᐱᐅᔫᒐᔭᕐᑐᖅ ᖃᐅᔨᒪᔪᓪᓚᕆᒻᒥᒃ ᐅᖄᕈᑎᖃᕋᔭᕐᑐᒥᒃ ᖃᓄᐃᑦᑑᓂᖏᓐᓂᒃ ᐊᐳᑏᑦ, ᐱᒻᒪᕆᐅᓂᖏᓪᓗ ᖃᓄᕐᓗ ᐊᑐᕐᑕᐅᓂᖏᓐᓄᑦ. ᐊᒥᓲᒐᓗᐊᕐᑎᓗᒋᑦ ᐊᐳᑏᑦ ᖃᓄᐃᑦᑑᓂᖏᑦ, ᐅᓐᓂᑑᑦᔨᕗᒍᑦ ᐱᖓᓱᓂᒃ ᐃᓕᓐᓂᐊᑕᐅᑎᑦᓯᓂᕐᒥᒃ.

ᐊᒥᓲᒐᓗᐊᕐᑎᓗᒋᑦ ᐊᐳᑏᑦ ᖃᓄᐃᑦᑑᓂᖏᑦ types of snow, ᐅᓐᓂᑑᑦᔨᔪᒍᑦ ᐱᓇᓱᐊᕐᓂᒥᒃ ᐱᖓᓱᓂᒃ ᒪᑯᓂᖓ.

ᐊᕿᓪᓗᔭᖅ

ᐊᑭᓗᕿᐊᖅ ᐊᐳᑎ, ᓄᑖᖅ ᐊᐳᑎ

ᓯᑎᓗᔭᖅ

ᓯᑎᔪᖅ ᑲᑎᒪᐅᑎᑲᓪᓚᑐᖅ ᐊᐳᑎ, ᓄᑕᐅᖕᖏᑐᖅ ᐊᐳᑎ

ᐳᑲᔭᖅ

ᕿᓪᓛᒋᐊᔪᖅ ᐊᐳᑎ

ᑏᑐᕐᓂᓯᓐᓂ, ᐃᓕᓐᓂᐊᑏᑦ ᖃᐅᔨᒪᑦᓯᐊᒪᖔᑕ ᐊᐳᑏᑦ ᖃᓄᐃᑦᑑᓂᖏᓐᓂ ᑲᒪᒋᓗᒋᑦ ᒪᑯᓂᖓᒐᓛᒃ ᑕᑯᑦᓴᑯᑦ, ᐃᑉᐱᓂᐊᕐᓂᑯᑦ, ᐅᖁᒣᓐᓂᖏᑦ, ᓯᑎᓂᖏᑦ, ᐊᓯᖏᓪᓗ. ᐃᓕᓐᓂᐊᑏᑦ ᑐᑭᓯᑎᒋᐊᕐᓗᒋᓪᓗ ᖃᓄᐃᑦᑑᓂᖏᓐᓂᒃ ᐊᐳᑏᑦ ᐊᐱᕐᓲᔭᕐᓂᑯᑦ:

  • ᖃᓄᖅ ᐃᓕᑕᕐᓂᐊᒍᓐᓇᕿᑦ x ᐊᐳᑏᑦ ᖃᓄᐃᑦᑑᓂᖏᓐᓂᒃ?
  • ᖃᓄᖅ ᐊᑦᔨᒌᖕᖏᓂᓖᒃ ᑖᒃᑯᐊ ᑕᒪᒋᑦ ᐊᐳᑏᑦ?
  • ᖃᓄᖅ ᑐᑭᓯᓇᕐᑎᑕᐅᒍᓐᓇᑐᖅ x ᑖᓐᓇ ᐊᐳᑎᖅ?

2. ᐊᐳᑏᑦ ᐃᒪᑐᐃᓐᓀᓗ ᐊᑦᔨᐸᓱᒌᓐᓂᖏᑦ

ᑐᑭᓯᓇᕐᓯᔪᖅ: ᐃᓕᑦᓯᒍᒪᓂᓖᑦ ᐱᕈᕐᐸᓕᐊᓲᑦ ᓱᕐᖁᐃᓯᒐᓱᐊᕐᓂᒥᒃ ᐊᑑᑎᑲᑦᑕᓕᑐᐊᕋᒥ ᐱᔭᑦᓴᒥᓂᒃ ᐱᔭᕇᒍᓐᓇᑕᒥᓂᒃ.

ᐃᓕᓐᓂᐊᑏᑦ ᐅᓐᓂᑑᑦᔨᓗᒋᑦ ᐱᔪᒥᑎᒋᓂᕐᒥᒃ . ᓄᓇᒥ, ᐱᔭᑦᓴᕆᓚᖓᔭᖏᑦ ᐃᓕᑕᕐᓯᒋᐅᕐᓴᓂᖅ ᐊᐳᑏᑦ ᐃᒪᑦᓴᓯᐊᖑᓂᕐᐹᖑᓂᖏᓐᓂᒃ. ᐅᓐᓂᑑᑦᔨᔪᒍᑦ ᐊᑐᕋᑦᓴᐅᓚᖓᔪᑦ ᐱᓇᓱᐊᕐᑕᐅᔪᒥ ᐱᖓᓱᓂᒃ ᐊᑦᔨᒌᖕᖏᑐᓂᒃ ᐊᐳᑎᓂᒃ ᐅᖃᕐᑕᐅᔪᓂ ᖁᓛᓂ (ᐊᕿᓪᓗᔭᖅ, ᓯᑎᓗᔭᖅ, ᐳᑲᔭᖅ).

  • ᓄᓇᒥ, ᐃᓕᓐᓂᐊᑏᑦ ᐱᒍᓐᓇᕕᓕᒫᒥᒍᑦ ᐊᐳᑏᑦ ᖃᓄᐃᑦᑑᓂᖏᓐᓂᒃ ᓇᕝᕚᒐᓱᐊᕐᓗᑎᑦ.
  • ᐅᖄᕈᑎᖃᕐᓗᑎᒃ ᐃᓱᒪᒋᔭᒥᓂᒃ ᓇᓪᓕᐊ ᐊᐳᑏᑦ ᐃᒪᓕᐅᕐᓂᐸᐅᓲᖑᓂᖏᓐᓂᒃ.
  • ᐊᑐᕐᓗᒋᑦ ᒪᓕᒉᑦ ᐊᑖᓃᑦᑐᑦ, ᐆᑦᑐᕋᕐᓂᐊᑐᑦ ᒥᑦᓴᐅᓵᕐᑕᒥᓂᒃ ᖃᐅᔨᓂᐊᕐᓗᑎᒃ ᓇᓪᓕᖏᑦ ᐊᕿᓪᓗᔭᖅ, ᓯᑎᓗᔭᖅ ᐳᑲᔭᕐᓘᓃᑦ ᐃᒪᓕᐅᕐᓂᐸᐅᒻᒪᖔᑦ ᐊᐳᑎᓂ.

ᒪᕐᕉᓂᒃ ᐊᑦᔨᒌᖕᖏᑑᓐᓂᒃ ᐆᑦᑐᕋᐅᑎᖃᒍᓐᓇᑐᑦ. ᐊᑕᐅᓯᕐᒥᒃ ᒪᕐᕉᓂᓘᓐᓃᑦ ᐅᑦᑐᕋᒍᓐᓇᑐᑦ, ᒪᕐᕉᓈᕐᑎᓗᑎᒃ ᖃᓄᐃᓕᖓᓕᕇᑦᓯᐅᑎᓗᒋᑦ ᖃᐅᔨᒍᑎᐅᔪᓂ, ᒪᕐᕈᕕᓪᓗᓯ ᐱᔭᑦᓴᖃᕐᑎᓗᒋᑦ ᑲᒪᑦᓱᒥᖓ… ᐃᓱᒪᒋᔭᕐᓂᒃ ᐱᔪᓐᓇᐅᑏᑦ ᒪᓕᓪᓗᒍ ᑐᑭᑖᕈᓐᓇᖁᑎᑦ.

2.1. ᐊᑐᕐᑕᐅᒍᓐᓇᑐᑦ ᖃᐅᔨᑎᑦᓯᒍᑏᑦ

ᓯᕗᓪᓕᐹᖅ ᐊᑐᕐᑕᐅᒍᓐᓇᑐᖅ ᖃᓄᐃᓕᖓᓕᕇᑦᓯᐅᓂᖅ ᐊᐳᑏᑦ ᐊᖏᓂᖏᓐᓂ (ml) ᐃᒪᐅᓪᓗ ᐆᑦᑑᑎ ᐊᑐᕐᓗᒍ ᐊᐅᑎᑕᐅᒌᕐᓯᒪᔪᖅ. ᓄᐃᑎᑕᐅᒍᓐᓇᑐᖅ ᖃᐅᔨᑎᑦᓯᒍᑎ ᐅᕝᕙᓘᓐᓃᑦ ᐳᓴᓐᑎᓅᕐᓗᒍ ᐃᓕᓐᓂᐊᑕᐅᔪᐃᑦ ᑌᒣᓕᖓᑦᓭᓇᕐᒪᑕ. ᑖᓐᓇ ᐊᑐᕐᑕᐅᒍᓯᖅ ᐃᓕᓐᓂᐊᑎᑦᓯᒍᑎᑦᓯᐊᖑᕗᖅ ᐊᓯᑦᔨᑕᕐᓂᖏᓐᓂᒃ ᐊᒻᒪᓗ ᐊᑐᕐᑕᐅᓲᖑᑦᓱᓂ ᐃᓄᓐᓄᑦ ᐊᐳᑎᓂᒃ ᐃᒪᓕᐅᕈᑕᐅᑦᓱᓂ. ᑌᒣᒐᓗᐊᕐᑎᓗᒍ, ᑐᑭᓯᓇᕐᑎᓯᖕᖏᑐᖅ ᓱᒐᒥ ᐊᑦᔨᒌᖕᖏᑐᐃᑦ ᐊᐳᑏᑦ ᐃᒪᓕᐅᕐᓂᓴᐅᓂᖏᓐᓂᒃ.

  1. ᖃᓪᓗᑎ ᐊᑐᕐᓗᒍ ᐊᐳᑎᕐᑕᒍᑎᒋᓗᒍ (ᐊᑦᑐᒍᓐᓀᓗᒍ).
  2. ᐃᕐᖃᐅᒪᒋᓗᒍ ᐊᐳᑎᐅᑉ ᖃᓄᐃᓪᓗᐊᓂᖓ ᖃᓪᓗᑎᒻᒦᑐᖅ.
  3. ᐊᐅᑦᑎᓗᒍ ᖃᑦᑕᒥ.
  4. ᐃᒪᕈᕐᑐᖅ ᖃᓪᓗᑎᒧᑦ ᐅᑎᕐᑎᓗᒍ.
  5. ᐊᓪᓚᓗᒍ ᐅᓄᕐᓂᖓ ᐃᒪᐅᑉ ᖃᑦᑕᒦᑦᑐᖅ ᒥᓕᓖᑕᓄᑦ.
  6. ᑌᒫᑦᓭᓈᕐᓗᓯ ᐊᑐᓂ ᐊᐳᑎᓂᒃ ᑲᒪᑦᓯᐊᓗᓯ ᐊᑦᔨᒌᑦᑐᓂ ᑎᒍᓯᓗᓯ.

ᐱᔭᑦᓴᖅ ᑲᔪᓯᑎᓪᓗᒍ, ᐊᐱᕐᓲᔭᖃᑦᑕᓗᑎᑦ ᐃᓕᓐᓂᐊᑎᓄᑦ ᖃᓄᑐᐃᓐᓇᖅ ᐃᓕᓕᐅᒥᖁᓪᓗᒋᑦ ᐃᓕᓐᓂᐊᑕᒥᓂᒃ.

  • ᓇᓚᐅᑦᓵᑎᓗᒋᑦ ᓇᓪᓕᖏᑦ ᐊᐳᑏᑦ ᐃᒪᓕᐅᕐᓂᐹᖑᓚᖓᒻᒪᖔᑕ.
  • ᐃᓗᓕᖏᑦᑕ ᐊᖏᓂᖏᑦ ᓱᓚᖓᕙ ᐊᐳᑎ ᐊᐅᑦᑎᓗᒍ?
  • ᐃᒪᖅ ᑎᕐᑎᑯᑖᑦᑎᒍᕕᐅᒃ ᐊᑯᓃᓗᐊᕐᑐᒥ ᓱᓚᖓᔪᖅ?
  • ᐃᓕᓐᓂᐊᑎᒥᒃ ᑕᒪᑦᓱᒥᖓ ᐱᓇᓱᐊᕐᑕᐅᔪᒥ ᖃᐅᔨᑎᑦᓯᒍᑎᐅᔪᓂ ᐅᐃᕖᕐᕆᓯᔪᖃᕈᓐᓇᖃ? ᖃᓄᐃᓘᕐᓗᓂ?

2.2. ᐃᑦᔪᓂᓕᕆᓃᑦ ᐊᑐᕐᑕᐅᒍᓐᓇᑐᑦ

ᑐᖓᓕᐊ ᐊᑐᕐᑕᐅᒍᓯᖅ ᐊᐳᑎᐅᑉ ᐊᖏᓂᖓᓂᒃ (ᐅᖁᒣᓐᓂᖓᖔᖅ ᐃᓂᑐᓂᖓᐅᖕᖏᑐᖅ) ᐃᒪᕈᕐᑎᓯᓂᖅ. ᐃᒪᐅᑉ ᐊᖏᓂᖓ 1g/ml, ᐊᐳᑎ ᐊᖏᓂᖃᕐᑎᓗᒍ 0,1g/ml ᑌᒪ 10%-ᓂᒃ ᐃᒪᕐᑕᓕᒃ. ᑕᒪᓐᓇ ᐊᑐᕐᑕᐅᒍᓯᖅ ᓱᑯᐃᔦᔨᓄᑦ ᓇᐅᑦᓯᑐᒍᑎᐅᓲᖅ ᐊᐳᑏᑦ ᐃᒪᑐᐃᓐᓀᓗ ᐊᑦᔨᐸᓱᒌᓐᓂᖏᓐᓂᒃ. ᑌᒣᒐᓗᐊᕐᑎᓗᒍ, ᓇᓗᓀᕐᑕᐅᑲᒐᓱᐊᕆᐊᓖᑦ ᐊᒻᒪᓗ ᐱᓪᓗᑯᒐᓱᐊᕐᓇᓱᑎᒃ ᐃᓄᐃᑐᐃᓐᓀᑦ ᐊᑐᓲᖏᓐᓂ ᐊᐳᑎᒥᒃ ᐃᒪᕈᕐᑎᓯᒍᓯᕐᓂᒃ.

  1. ᐅᖁᒣᓐᓂᓂᐊᕐᓗᒍ ᐃᓗᓕᖃᖕᖏᑐᖅ ᖃᑦᑕᖅ ᐊᒻᒪᓗ ᐊᓪᓚᓗᒍ ᐅᖁᒣᓐᓂᖓ ᑯᕌᒻᓄᑦ.
  2. ᖃᓪᓗᑎ ᐊᐳᑎᕐᑕᒍᑎᒋᓗᒍ ᐆᑦᑐᕋᐅᑎᑦᓴᒥᒃ (ᐊᑦᑐᒍᓐᓀᓗ).
  3. ᐅᖁᒣᓐᓂᓂᐊᕐᓗᒍ ᑕᑕᑦᑐᖅ ᖃᑦᑕᖅ ᐊᒻᒪᓗ ᐊᓪᓚᓗᒍ ᐅᖁᒣᓐᓂᖓ ᑯᕌᒻᓄᑦ.
  4. ᑲᑎᕐᓱᓗᒍ ᐅᖁᒣᓐᓂᒋᔭᖓ ᐆᑦᑐᕋᐅᑎᐅᑉ.
  5. ᐊᓪᓚᓗᒍ ᐅᓄᕐᓂᖓ ᐊᐳᑎᐅᑉ ᖃᑦᑕᒦᑦᑐᖅ ᒥᓕᓖᑕᓄᑦ.
  6. ᐊᑐᕐᓗᒍ ᓇᓗᓀᕐᓯᒍᑎᐅᑫᓐᓇᑐᖅ ᐆᑦᑑᕋᐅᑎᒧᑦ ᑲᑎᕐᓱᒍᓯᖅ ᐊᖏᓂᖓᓂᒃ.
  7. ᐊᖏᓂᖓ ᐆᑦᑐᕋᐅᑎᐅᑉ ᐊᐳᑏᑦ ᐃᒪᑐᐃᓐᓀᓗ ᐊᑦᔨᐸᓱᒌᓐᓂᖓᑕ ᐳᓴᓐᑎᖓᓄᑦ.
  8. ᑌᒫᑦᓭᓈᕐᓗᓯ ᐃᓘᓐᓇᖏᓐᓄᑦ ᐊᐳᑎᓄᑦ ᐊᑦᔨᒌᖕᖏᑐᓄᑦ ᐊᑦᔨᒌᓂᒃ ᐊᐳᑎᓂᒃ ᓄᐊᑦᓯᓯᒪᒐᓱᐊᕐᓗᓯ.

ᐃᓕᓐᓂᐊᑏᑦ ᐅᖄᖁᓗᒋᑦ ᐃᓱᒪᒋᔭᕐᒥᓂᒃ ᓱᒐᒥ ᐊᐳᑎᐅᑉ ᐅᖁᒣᓐᓂᖓ ᐊᑦᔨᐸᓱᒋᕙᐅᒃ ᐊᐳᑏᑦ ᐃᒪᑐᐃᓐᓀᓗ ᐊᑦᔨᐸᓱᒌᓐᓂᖏᓐᓂᒃ.

3. ᐅᖄᖃᑎᒌᓐᓃᑦ ᐊᖏᖃᑎᒌᓐᓃᓗ

ᑐᑭᓯᓇᕐᓯᔪᖅ: ᐃᓕᑦᓯᒍᒪᓂᓖᑦ ᐱᕈᕐᐸᓕᐊᓲᑦ ᒪᓕᑦᓱᒋᑦ ᐊᓯᖏᑦᑕ ᖃᐅᔨᒍᑎᕕᓂᖏᓐᓂᒃ ᐊᒻᒪᓗ ᓄᐃᑦᓯᓱᓂ ᐱᑐᑦᓯᒪᒻᒪᑕ ᖃᐅᔨᔭᒍᑎᐅᔪᕕᓃᑦ.

ᓄᓇᒥ ᖃᕆᐊᕐᒥᓘᓐᓃᑦ, ᐅᖄᖃᑎᒋᓗᒋᑦ ᐆᑦᑐᕋᐅᑎᕆᔭᕕᓂᖏᓐᓂ. ᖃᓄᐃᓕᖓᓕᕇᑦᓯᐅᑎᓗᒋᑦ ᐃᓕᓐᓂᐊᑏᑦ ᖃᐅᔨᔭᕕᓂᖏᓐᓂ ᐊᑐᓂ ᐊᑐᕐᑕᐅᒍᓯᐅᔪᓂ.

ᐱᐅᔫᓕᕐᑐᖅ ᐊᑐᕐᑕᐅᒍᓯᐅᔪᓂ ᐅᖄᖃᑎᖃᕐᓂᖅ ᐊᓯᑦᔨᑕᕐᓂᖏᓐᓂᓗ ᐊᐳᑏᑦ ᐃᒪᕈᕐᓱᑎᒃ ᑎᕐᑎᐅᒐᕐᓱᑎᓗ ᐅᕝᕙᓘᓐᓃᑦ ᐅᖁᒣᓐᓂᖏᑦ ᐊᑦᔨᐸᓱᖏᓪᓗ ᐊᐳᑏᑦ ᐃᒣᓪᓗ ᐊᑦᔨᐸᓱᒌᓐᓂᖏᓐᓂᒃ. ᓇᓗᓀᕐᓯᒍᓐᓇᕆᕗᑎᑦ ᐊᓕᐊᒋᓂᕐᐹᑎᓐᓂᒃ ᐃᑉᐱᒋᔭᕕᓂᑎᓐᓂ ᐆᑦᑐᕋᕐᓂᐅᔪᓂ, ᐆᑦᑑᑎᒋᓗᒍ ᐃᓕᓐᓂᐊᑏᑦ ᑎᕐᑎᑎᑦᓯᐅᒐᕐᓱᑎᒃ ᐃᒪᕐᒥᓂᒃ, ᐊᐳᑎᕐᑕᓱᑎᓪᓘᓃᑦ ᐊᑦᔨᒌᖕᖏᑐᓂᒃ ᐅᕝᕙᓘᓐᓃᑦ ᐅᖁᒣᓐᓂᖏᓐᓂ ᓇᓗᓀᕐᓯᒐᑎᒃ ᐆᑦᑐᕋᐅᑎᒥᑕ.

ᐱᔭᕇᒍᓯᕐᓗᑎᑦ, ᐃᓕᓐᓂᐊᑏᑦ ᐊᖏᖃᑎᒌᓕᕐᑎᓗᒋᑦ, ᒪᓕᓪᓗᒋᑦ ᖃᐅᔨᒍᑎᕕᓃᑦ, ᓇᓪᓕᐊ ᐊᐳᑏᑦ ᐱᐅᓂᕐᐸᐅᒪᖔᑦᑕ ᐃᒪᕈᕐᓂᖏᑦ (ᐊᖏᓂᖏᑦ). ᑕᒪᓐᓇ ᐃᓕᓐᓂᐊᑕᐅᒍᓯᖅ ᐃᓗᕐᕈᓯᒨᓕᖓᒻᒥᔪᖅ, ᐊᖏᖃᑎᒌᓪᓗᑎᒃ ᐃᓗᕐᕈᓯᐅᕗᖅ ᐃᓄᐃᑦ ᑐᑭᑖᓚᐅᕐᑕᕕᓂᖓ.

ᖃᐅᔨᓴᕐᓂᖅ

ᑕᒡᒐᓂ ᐃᓕᓐᓂᐊᑎᑦᓯᒍᑎᒥ, ᐅᓐᓂᑑᑦᔨᔪᒍᑦ ᖃᐅᔨᓴᕐᓂᒥᒃ ᐆᑦᑐᕋᑲᑦᑕᓂᕐᒥᒃ ᓱᑯᐃᔦᓂᑎᒍᑦ. ᖃᐅᔨᓴᕐᓃᑦ ᒪᓕᑐᐃᓐᓇᒍᓐᓀᓗᑎᒃ ᒪᓕᒐᕐᓂᒃ, ᑭᓯᐊᓂᓕ ᓇᓗᓀᕐᓯᒍᓐᓇᒪᖔᑕ ᐱᐅᓂᕐᐸᐅᔪᓂᒃ, ᑐᑭᓯᑎᓪᓗᒋᑦ ᐱᐅᔫᓂᖓᓂᒃ ᐊᑐᐃᓐᓇᐅᔪᓂᒃ ᐊᑐᕐᓂᒥᒃ ᐊᒻᒪᓗ ᐊᑦᔨᐸᓱᒌᓐᓂᖏᓐᓂᒃ ᖃᐅᔨᒍᑎᐅᔪᕕᓃᑦ ᐆᑦᑐᕋᐅᑎᒥᑕ ᐃᓱᒪᒋᔭᕕᓂᖏᓐᓄᑦ ᓄᐃᑕᕕᓂᖏᓐᓄᑦ.

ᐃᓘᓐᓇᖏᑦ

ᐃᓕᓐᓂᐊᑎᓕᒫᑦ ᐃᓱᒪᒋᔭᒥᓂᒃ ᓄᐃᑦᓯᒍᓐᓇᑐᑦ ᐊᐳᑏᑦ ᐃᒪᑐᐃᓐᓀᓗ ᐊᑦᔨᐸᓱᒌᓐᓂᖏᓐᓅᓕᖓᔪᓂᒃ ᐊᒻᒪᓗ ᒪᓕᓪᓗᑎᒃ ᐊᑕᐅᓯᕐᔪᐊᒥᓪᓘᓃᑦ ᒪᓕᒐᓕᐊᕕᓂᕐᓂᒃ. ᓇᓗᓀᕐᓯᓚᖓᔪᑦ ᐱᓀᓗᑕᒋᓲᒻᒥᓂᒃ.

ᐃᓓᓐᓇᖏᑦ

ᐃᓕᓐᓂᐊᑏᑦ ᐊᒥᓱᑦ ᐊᖏᓚᖓᔪᑦ ᐅᕝᕙᓘᓐᓃᑦ ᐊᖏᑦᓯᐊᖏᓪᓗᑎᒃ ᐃᓱᒪᒋᔭᒥᓂᒃ ᐊᑑᑎᓚᐅᑲᑦᓱᑎᒃ ᒪᓕᒐᓕᐊᕕᓂᕐᓂᒃ ᖃᐅᔨᒍᑎᒥᓂᒃ ᐅᖄᒍᑎᖃᓯᓗᑎᒃ. ᐃᓕᑕᕐᓯᓕᓐᓂᐊᑐᑦ ᑕᒪᓯᒪᔪᓂᒃ ᓈᒻᒪᓈᕐᑐᓂᓪᓘᓃᑦ.

ᐃᑭᓐᓂᓭᑦ

ᐃᓕᓐᓂᐊᑏᑦ ᐃᓚᖏᑦ ᑐᑭᓯᑦᓴᐅᑎᒋᓐᓂᐊᑐᑦ ᒪᕐᕉᓂᒃ ᒪᓕᒑᓐᓂᒃ ᓈᒻᒪᓈᕐᑐᓂᓪᓗ ᐊᑐᓕᕇᕐᓗᑎᒃ ᖃᐅᔨᒍᑎᐅᔪᓂᒃ ᒪᓕᓕᕇᕐᓗᑎᒃ. ᐃᓕᑕᕐᓯᓕᓐᓂᐊᑐᑦ ᐅᕝᕙᓘᓐᓃᑦ ᓈᒻᒪᓈᕐᑐᓂᒃ ᑲᒪᒍᓐᓀᓗᑎᒃ.

ᐃᓚᒋᐊᕈᑏᑦ

  • ᐊᑑᑎᓯᒪᖕᖏᑯᕕᑦ, ᑐᑭᓯᓇᕐᑎᓗᒋᑦ ᑕᒪᒋᑦ ᒪᓕᒐᓕᐊᕕᓃᑦ ᓇᓗᓀᕐᓯᒐᓱᐊᕐᓂᑯᑦ ᐊᐳᑏᑦ ᐃᒣᓪᓗ ᐊᑦᔨᐸᓱᒌᓐᓂᖏᓐᓂᒃ ᐊᒻᒪᓗ ᑲᑎᑦᑎᓗᒋᑦ.
  • ᐊᐳᑏᑦ ᐃᒪᑐᐃᓐᓀᓗ ᐊᑦᔨᐸᓱᒌᓐᓂᖏᑦ ᖃᐅᔨᒍᑎᕕᓂᐅᔪᓄᑦ ᐃᓚᐅᓕᕐᑎᓗᒋᑦ ᐊᓯᖏᓐᓄᑦ ᐊᐳᑎᓄᑦ ᐃᓕᓐᓂᐊᑎᑦᓯᒍᑎᐅᔪᓄᑦ ᐸᕐᓇᑕᐅᒪᔪᓄᑦ.
  • ᐃᓕᓐᓂᐊᑏᑦ ᐃᓕᓐᓂᐊᑎᓗᒋᑦ ᐊᑐᕐᑕᐅᓲᖑᓂᖏᓐᓂᒃ ᐊᐳᑏᑦ ᐊᒪᑐᐃᓐᓀᑦ ᐊᑦᔨᐸᓱᒌᓐᓂᖏᑦᑕ ᓱᕐᖄᑎᕐᑕᐅᒍᓯᖏᑦ ᐱᒻᒪᕆᐅᓂᖏᓪᓗ.

ᐱᐅᓕᓂᐊᒉᑦ

  • ᖃᓪᓗᑎ
  • ᐅᑯᒣᓐᓂᓂᐊᕈᑎ
  • ᓱᐴᔫᒃ (ᐅᕝᕙᓘᓐᓃᑦ ᐆᓇᕐᓯᓰᒍᑎ ᖃᓄᐃᑦᑐᑐᐃᓐᓇᖅ)
  • ᖃᑦᑕᖅ ᐅᕝᕙᓘᓐᓃᑦ ᑏᓕᐅᕈᑎ
  • ᑲᑎᕐᓯᒍᑎ (ᐊᑐᕐᑕᐅᓗᑯᒋᐊᑐᖕᖏᑐᖅ)
  • ᐃᓕᓐᓂᐊᑕᐅᕈᑎᑦᓭᑦ ᐊᑐᐃᓐᓇᐅᑎᑕᐅᔪᑦ (1 ᐊᑐᓂ ᒪᓕᑦᑕᐅᒋᐊᓖᑦ)
  • ᐊᓪᓚᐅᑎ
  • ᐊᓪᓚᕕᑦᓴᐅᑉ ᓯᑎᓗᑕᖓ (ᐊᑐᕐᑕᐅᓗᑯᒋᐊᑐᖕᖏᑐᖅ)

ᐅᖃᐅᓰᑦ

  • ᐊᕿᓗᖃᖅ (ᐊᕿᑦᑐᖅ ᐊᕿᓗᕿᐊᖅ, ᓄᑖᖑᓂᕐᓴᖅ ᐊᐳᑎ)
  • ᓯᑎᓗᖃᖅ (ᓯᑎᔪᖅ ᑲᑎᒪᐅᑎᑲᓪᓚᑐᖅ ᐊᐳᑎ, ᓄᑕᐅᖕᖏᓂᕐᓴᖅ ᐊᐳᑎ)
  • ᐳᑲᔭᖅ (ᕿᓪᓚᕿᔪᖅ ᐊᐳᑎ)

ᖃᐅᔨᒋᐊᕐᕕᓭᑦ

United States National Park Services (n.d.). How Much Water is in this Snow? Document accessible at: https://www.nps.gov/glac/learn/education/upload/How%20much%20water%20is%20in%20this%20snow%20activity.pdf

NASA Student Observation Network (n.d.). Snow Pit Procedures. Document accessible at: https://www.nasa.gov/pdf/186123main_SnowPitProcedures.pdf

ᐊᐱᕐᓲᑎᑦᓴᖃᕈᕕᑦ ᐅᖃᐅᓯᑦᓴᖃᕈᕕᓪᓘᓃᑦ, ᖃᐅᔨᓴᕐᕕᒋᑎᒍ.

ᖃᐅᔨᓴᕐᕕᒋᑎᒍ