ᓇᓗᓀᕐᓯᐅᑎ
ᑌᑦᓱᒪᓂ, ᐃᓄᐃᑦ ᐅᑭᐅᑭᑦᑐᐃᑦ (ᑕᒪᒋᑦ ᐊᖑᑏᑦ ᐊᕐᓀᓗ) ᐃᓕᑦᓯᖃᑦᑕᓯᒪᔪᑦ ᐃᓪᓗᕕᒐᓕᐅᕐᓂᒥᒃ ᑕᑯᓐᓇᑐᐃᓐᓇᓂᒃᑯᑦ, ᐃᓕᖕᖑᐊᓂᒃᑯᑦ ᐊᒻᒪᓗ ᐱᒋᐅᕐᓴᓂᒃᑯᑦ. ᐅᑭᐅᑭᑦᑑᓱᑎᒃ ᐱᒋᐊᕐᓱᑎᒃ, ᐃᓄᒻᒪᕆᒻᒧᑦ ᑕᑯᓐᓇᑕᐅᑦᓱᑎᒃ ᑕᒻᒪᓕᕐᒪᖔᑕ ᑲᒪᒋᔭᐅᑦᓱᑎᒃ, ᐅᖃᐅᑦᔪᑕᐅᑦᓱᑎᒃ ᐊᒻᒪᓗ ᖃᓄᐃᓘᕆᐊᒥᒃ ᐃᓕᓐᓂᐊᑎᑕᐅᑦᓱᑎᒃ. ᐃᓕᑦᓯᕇᕈᑎᒃ ᑕᒡᒐᓂ ᐱᒋᐅᕐᓴᐅᑎᐅᔪᒥ, ᐊᐳᑏᑦ ᖃᓄᐃᑦᑑᓂᖏᓐᓂᒃ, ᓴᓇᕐᕈᑎᓂᒃ ᖃᓄᖅ ᐊᑐᕆᐊᒥᒃ, ᒪᓕᑦᑕᐅᕆᐊᓕᓐᓂᓗ ᐃᓪᓗᕕᒐᓕᐅᕐᓂᒥᒃ ᐊᒻᒪᓗ ᖃᓄᖅ ᐃᓪᓗᕕᒐᓕᐅᕆᐊᖃᕐᓂᒥᒃ, ᑌᒪ ᐱᒋᐅᓪᓚᕆᒐᓱᐊᓯᓛᕐᑐᑦ. ᐃᓪᓗᕕᒐᓕᐅᕐᓂᒥᒃ ᐃᓕᑦᓯᒐᓱᐊᕐᓂᖅ ᐱᐅᓂᕐᐹᖅ ᐱᒋᐅᕐᓴᓗᓂ, ᐱᒋᐅᕐᓴᕆᐊᓪᓛᓗᓂ, ᐱᒋᐅᕐᓴᕆᐊᓪᓛᓗᓂ.
ᓵᓕ ᓇᐅᒃᑲᕈᐊᑉ ᐊᑦᔨᖁᑎᖓ
ᐃᓕᓐᓂᐊᑎᑕᐅᒍᑏᑦ ᓄᐃᒍᑎᖏᑦ
ᑕᒡᒐᓂ ᐱᒋᐅᕐᓴᐅᑎᒥ, ᐃᓕᓐᓂᐊᑏᑦ ᓄᓇᒨᓐᓂᐊᑐᑦ ᐃᓕᑦᓯᒪᔭᒻᒥᓂᓪᓗ ᐱᒋᐅᕐᓴᐅᑎᖃᕐᓗᑎᒃ. ᓇᓂᓯᒐᓱᐊᕐᓗᑎᒃ ᐃᓂᑦᓴᓯᐊᒥᒃ ᐃᓪᓗᕕᒐᓕᐅᕐᕕᓴᑦᓯᐊᒥᒃ ᐅᖄᖃᑎᒌᓐᓂᑯᑦ ᓄᓇᐅᑉ ᐱᐅᓯᖏᓐᓂᒃ ᐊᒻᒪᓗ ᕿᓂᓯᓪᓗᑎᒃ ᐊᐳᑎᒥᒃ ᐊᕕᑦᑐᕈᓐᓇᓇᕐᑐᓯᐊᒥᒃ. ᓴᓇᕐᕈᑎᓂᒃ ᐊᑐᕐᓗᑎᒃ ᐱᒋᐅᕐᓴᓗᑎᒃ ᐃᓪᓗᕕᒐᐅᑉ ᑐᖕᖓᕕᑦᓴᖓᓂᒃ ᐃᓂᓕᐅᕐᓂᒥᒃ ᐊᒻᒪᓗ ᐊᐳᑎᒥᒃ ᐳᐊᕐᕆᔭᕐᓗᑎᒃ. ᑖᑦᓱᒥᖓ ᐱᒋᐅᕐᓴᑎᒥ, ᐃᓕᓐᓂᐊᑎᑦᓯᔨ ᑕᑯᓐᓇᑎᑦᓯᖄᕈᓐᓇᑐᖅ, ᑌᒪ ᐱᒋᐅᕐᓴᓯᓂᐊᕐᒪᑕ ᐃᓕᓐᓂᐊᑏᑦ.
ᐱᒋᐅᕐᓴᐅᑎᐅᑉ ᓈᓂᖓᓂ, ᐃᓕᓐᓂᐊᑏᑦ ᐱᔪᓐᓇᓯᓐᓂᐊᑐᑦ ᒪᑯᓂᖓ
- ᐃᓪᓗᕕᒐᓕᐅᕐᓂᐅᑉ ᐃᓂᑦᓴᖓᓂᒃ ᓇᓗᓀᕐᓯᒍᓐᓇᓯᓚᖓᔪᑦ;
- ᐊᑦᑐᖃᑦᑕᓗᓂ ᐊᒻᒪᓗ ᐊᐳᑏᑦ ᖃᓄᐃᑦᑑᓂᖏᓐᓂᒃ ᐊᑦᔨᒌᖕᖏᓂᖏᓐᓂᒃ ᐃᑉᐱᒍᓱᓪᓗᓂ;
- ᐊᐳᑎᑦᓯᐊᒥᒃ ᓇᓂᓯᓪᓗᓂ ᐃᓪᓗᕕᒐᓕᐅᕝᕕᓴᑦᓯᐊᒥᒃ;
- ᑕᑯᓯᒪᓗᓂ ᐆᑦᑐᕋᕐᓯᒪᓗᓂᓪᓗ ᐊᐳᑎᒥᒃ ᓴᓇᒻᒪᓕᐅᕐᓂᒥᒃ ᓴᓇᕐᕈᑎᓂᒃ ᐊᑐᕐᓗᓂ;
- ᐃᓪᓗᕕᒐᐅᑉ ᑐᖕᖓᕕᑦᓴᖓᓂᒃ ᐃᓂᓕᐅᕈᓐᓇᓗᓂ.
ᑲᔪᓯᓂᖓ
1. ᐃᓂᑦᓴᖓᓂᒃ ᓇᓗᓀᕐᓯᓯᒪᓂᖅ
ᐃᓕᓐᓂᐊᑎᑎᑦ ᓄᓇᒨᕐᑎᓗᒋᑦ. ᐳᕐᑐᓂᖏᑦ ᒪᓕᓪᓗᒋᑦ, ᐃᓪᓗᕕᒐᓕᐅᕝᕕᓴᑦᓯᐊᒧᑦ ᐁᑎᓗᒋᑦ ᐅᕝᕙᓘᓐᓃᑦ ᓇᒻᒥᓂᒃ ᕿᓂᕐᑎᓗᒋᑦ. ᐃᓪᓗᕕᒐᓕᐅᕝᕕᓴᑦᓯᐊᑦ ᓇᓗᓀᕐᑕᐅᓲᑦ ᓄᓀᑦ ᐱᐅᓯᖏᑦ ᐃᑉᐱᒋᑦᓱᒋᑦ ᐊᒻᒪᓗ ᐊᐳᑏᑦ ᖃᓄᐃᑦᑑᓂᖏᑦ ᒪᓕᑦᓱᒋᑦ.
ᐃᓂᑦᓴᓯᐊᑦ
- ᓯᑐᕐᖃᒐᓚᒻᒥ. ᐃᑦᔪᓂᕐᓴᐅᑎᓪᓗᒍ ᐊᐳᑎ ᓴᓇᒻᒪᓕᐅᕐᓇᓂᕐᓴᖅ ᐊᐳᑎᓂᒃ ᒪᔪᕙᓪᓕᐊᓱᓂ ᓯᑐᕐᖃᒐᓚᒻᒥ.
- ᑕᒡᒐᓂ ᐃᓂᐅᔪᒥ ᐊᐳᑎᐅᑉ ᐃᑦᔪᓂᖓ ᓈᒻᒪᓂᕐᓴᐅᒪᑦ ᓴᓇᒻᒪᓕᐅᕐᓂᑯᑦ (ᓯᑎᓪᓗᖃᖅ ᐅᕝᕙᓘᓐᓃᑦ ᐳᑲᔭᖅ).
ᐃᓂᑦᓴᐅᖏᑦᑐᐃᑦ
- ᑕᓯᐅᑉ ᓯᓈᖓᓂ. ᐃᒪᖅ ᐊᐳᑎᐅᑉ ᐃᒻᒧᐊᒎᑐᐃᓐᓇᕆᐊᓕᒃ ᐃᓪᓗᕕᒐᕐᒥᒃ ᐃᒪᕐᑕᓯᓗᓂᓗ ᐅᕝᕙᓘᓐᓃᑦ ᐱᐅᓕᓂᐊᒐᕐᓂᒃ ᖃᐅᓯᓕᕐᑎᕆᓗᓂ.
- ᓇᕐᓴᒥᒃ ᐅᕝᕙᓘᓐᓃᑦ ᑰᕝᕕᒥ. ᐱᕐᓯᑐᐊᕐᐸᑦ ᐊᐳᑦᔭᐅᒐᔭᕐᑐᖅ ᐊᒻᒪᓗ ᐃᓪᓗᕕᒐᖅ ᓴᐅᔭᐅᓗᓂ.
- ᐊᑭᓐᓈᓘᑉ ᓵᖓᓂ. ᓯᑑᕝᕕᐅᑐᐃᓐᓇᕆᐊᓕᒃ ᐊᓂᐅᕐᒧᑦ ᐃᓪᓗᕕᒐᖅ.
- ᖃᕐᖃᐅᑉ ᖄᖓᓂ. ᐊᓄᕆᑕᐅᓗᐊᕋᔭᕐᑐᖅ ᐊᒻᒪᓗ ᐊᓄᕆᒧᑦ ᐊᒻᒪᓂᕐᑖᑎᑕᐅᑲᑦᑕᕋᔭᕐᓱᓂ.
ᐊᐳᑏᑦ ᖃᓄᐃᑦᑑᓂᖏᓐᓂᒃ ᐃᓕᓐᓂᐊᓗᑎᒃ ᐃᓕᑦᓯᓴᐅᑎᕆᓚᖓᖕᖏᑐᑦ ᒫᓐᓇᓴᐅᑎᒋ. ᐊᓃᕐᑎᖃᑦᑕᓗᒋᑦ ᐃᓕᓐᓂᐊᑏᑦ, ᐃᑉᐱᓂᐊᕐᑎᖃᑦᑕᓗᒋᑦ, ᐊᕕᑦᑐᐃᖃᑦᑕᓗᑎᒃ, ᐊᐳᑏᑦ ᖃᓄᐃᑦᑑᓂᖏᓐᓂᒃ ᐊᑦᔨᒌᖕᖏᓂᖏᓐᓂᒃ ᕿᒥᕐᕈᖃᑦᑕᓗᑎᓪᓗ.
2. ᑕᑯᓐᓇᑎᑦᓯᓂᖅ
ᐃᓕᓐᓂᐊᑏᑦ ᐃᓕᑦᓯᒪᓕᕐᑕᖏᓐᓂᒃ ᑕᑯᓐᓇᑎᓪᓗᒋᑦ ᐱᒋᐅᕐᓴᐅᑎᐅᑫᓐᓇᑐᓂᒃ. ᐃᓪᓗᕕᒐᐅᑉ ᑐᖕᖓᕕᖓᓂᒃ ᑕᑯᑎᓗᒋᑦ, ᐊᐳᑎ ᐳᐊᕐᕆᔭᕐᓗᒍ ᑌᒪ ᐊᕕᑦᑐᐃᓯᓗᑎᑦ ᓴᓇᒻᒪᓂᒃ. ᐱᕕᑦᓴᖃᕈᕕᑦ, ᐃᓪᓗᕕᒐᓕᐅᕐᓗᑎᑦ ᑕᑯᓐᓈᑕᐅᓗᑎᑦ ᐃᓕᓐᓂᐊᑎᓄᑦ. ᐱᕕᑦᓴᖃᖕᖏᑯᕕᑦ, ᐅᖂᑕᓕᐅᕐᓗᑎᑦ, ᓴᓇᒻᒪᓄᑦ ᐊᕕᐅᕐᖃᑫᓐᓇᑕᑎᓐᓄᑦ.
ᐃᓕᓐᓂᐊᑎᑦᓯᔨ ᐃᓪᓗᕕᒐᐅᑉ ᑐᖕᖓᕕᑦᓴᖓᓂᒃ ᐃᓂᓕᐅᕐᑐᖅ ᐊᒻᒪᓗ ᑕᑯᑦᓴᐅᑎᑦᓯᓱᓂ ᐃᓪᓗᕕᒐᐅᑉ ᐊᒻᒪᓂᕆᓂᐊᕐᑕᖓᓂᒃ ᒪᕐᕉᓂᒃ ᑐᑭᒧᐊᕐᑐᓕᐅᕐᓱᓂ ᐊᒻᒪᓗᑭᑖᑉ ᕿᑎᖓᒍᑦ. ᑖᒃᑯᐊ ᑐᑭᒧᐊᕐᑑᒃ ᓯᓕᑦᑑᓂᕐᓴᐅᕆᐊᓖᒃ ᓂᑯᕐᕋᕕᒋᓚᖓᒐᕕᒃᑭᑦ ᐊᐳᑎᒥᒃ ᐃᓕᐅᕐᙯᕈᓐᓇᓯᐊᓐᓂᐊᕋᕕᑦ ᓴᓇᒻᒪᓂᒃ ᓯᕗᕋᕐᓄᑦ.
ᐃᓕᓐᓂᐊᑎᑦᓯᔨ ᐱᖓᓱᓂ ᓯᓈᓕᒻᒥ ᐊᑐᕐᑐᖅ ᑐᑭᓯᓇᕐᑎᓯᑦᓱᓂ ᐊᑐᕐᑕᐅᒍᓯᐅᓲᒥᒃ ᓇᓗᓇᖕᖏᑐᒥᒃ ᐊᐳᑎᓂᒃ ᓴᓇᒻᒪᓕᐅᕐᓂᒥᒃ. ᓴᓇᒻᒣᑦ ᓯᓕᓐᓂᓴᐅᑉᐸᑕ ᐊᑖᓃᑦᑐᖏᑦ ᒥᑭᓂᕐᓴᐅᑎᓪᓗᒍ ᖄᖓᓃᓐᓂᓴᖅ, ᐃᓕᐅᕐᖃᕈᓐᓇᓂᐊᖕᖏᑕᑎᑦ ᐊᐳᑎ ᓱᒃᑯᓗᓂᑭᓯᐊᓂ.
ᐊᐳᑎᓂᒃ ᐊᕕᑦᑐᐃᓯᒪᓕᕈᕕᑦ ᓈᒻᒪᑐᓂᒃ ᐊᖏᓂᓕᓐᓂᒃ ᐊᒻᒪᓗ ᓴᓇᒪᑦᓯᐊᑎᓪᓗᒋᑦ, ᐃᓕᓐᓂᐊᑎᑦᓯᔨ ᐅᖂᑕᓕᐅᕐᑐᖅ ᑖᓪᓕᑕᐅᕈᑎᑦᓴᒥᒃ ᐊᓄᕆᒧᑦ. ᑏᓕᐅᕐᕕᐅᓚᖓᔪᖅ ᑖᑦᓱᒪ ᐊᑭᓐᓇᐅᑉ ᐅᖓᑖᓂ. ᐱᕕᑦᓴᖃᕈᕕᑦ, ᐃᓪᓗᕕᒑᕈᒻᒥᒃ ᓴᓇᕈᓐᓇᖁᑎᑦ ᑐᖕᖓᕕᑉᐱᑦ ᓯᓚᑖᓂ ᐃᓂᓕᐊᕆᑫᓐᓇᑕᑉᐱᑦ.
“ᐱᔭᕐᓂᑐᐊᐱᒃ ᑐᑭᓯᓇᑦᓯᐊᓱᓂ ᑐᑭᓯᓇᕐᑎᓯᓕᕋᒥ ᑭᓯᐊᓂ ᓴᓇᒋᐊᓯᕈᕕᐅᒃ, ᓇᓗᓇᕐᑐᖅ ᐊᕐᓱᕈᕐᓇᓱᓂ.”
ᓂᐊᓕ ᓈᔅᑕᐴᑲ
ᐅᑎᕐᕕᒋᕆᐊᖃᕈᕕᒃᑭᑦ ᐃᓗᓕᖏᑦ, ᐱᒋᐅᕐᓴᐅᑎᐅᑫᓐᓇᑐᐃᑦ ᐃᓪᓗᕕᒐᓕᐅᕐᓂᒧᑦ ᑕᑯᒋᐊᕐᓗᒋᑦ.
3. ᐆᑦᑐᕋᕐᓂᖅ
ᐃᓕᓐᓂᐊᑏᑦ ᐊᐳᑎᓂᒃ ᓴᓇᒻᒪᓕᐅᕐᑎᓗᒋᑦ, ᑐᑭᓯᑎᖃᑦᑕᓗᒋᑦ ᐱᒍᓐᓇᕕᖏᑎᒍᑦ ᐆᑦᑐᕋᖃᑦᑕᓗᒋᑦ. ᐊᐳᑎᓂᒃ ᐊᕕᑦᑐᐃᒍᓐᓇᓯᑉᐸᑕ, ᐃᓪᓗᕕᒐᐅᑉ ᑐᖕᖓᕕᑦᓴᖓᓂᒃ ᐃᓂᓕᐅᕈᓐᓇᑐᑦ ᐊᒻᒪᓗ ᐱᒋᐅᕐᓴᓗᑎᑦ ᐊᐳᑎᓂᒃ ᐊᒻᒪᑎᕆᓂᕐᒥᒃ ᐊᒻᒪᓗ ᐲᔭᕐᓗᒋᑦ ᓴᓇᒻᒪᓕᐊᖏᑦ ᐃᓂᓕᐊᕕᓂᐅᑉ ᐃᓗᐊᓂ.
ᐃᓂᑦᓴᖓᓂᒃ ᓇᓗᓀᕐᓯᒍᒪᕈᕕᑦ, ᐊᑦᓱᓈᒥᒃ ᐊᑐᕈᓐᓇᑐᐃᑦ ᐃᓕᓐᓂᐊᑏᑦ ᐅᓈᒧᑦ ᕿᓚᑦᓯᒪᑎᓪᓗᒍ. ᐅᓈᒃ ᐊᐳᑎᒧᑦ ᒪᑭᑕᑎᓗᒍ ᕿᑎᖓᓂ, ᐃᓪᓗᕕᒐᑦᓴᐅᑉ ᐊᖏᓂᑦᓴᖓᓂᒃ ᖃᐅᔨᓴᕐᓗᑎᒃ ᑌᒪ ᐱᓱᓯᓪᓗᑎᒃ ᐅᓈᒥᒃ ᑫᕕᓪᓗᑎᒃ ᐊᑦᓱᓈᖅ ᐊᑐᕐᓗᒍ ᑐᖕᖓᕕᑦᓴᐅᑉ ᐃᓂᑦᓴᖓᓂᒃ ᐋᕐᖀᒐᓱᐊᕐᓗᑎᒃ.
ᐱᐅᓕᓂᐊᒉᑦ
- ᐊᐳᑎ
- ᓴᓇᕐᕈᑏᑦ (ᐸᓇᒃ, ᐅᓇᒃ, ᑭᓪᓘᑎᒃ, ᐊᑦᓱᓈᖅ)