ᕿᒥᕐᕈᕆᐊᓪᓚᓂᖅ ᓯᓂᓐᓂᒥᒃ:
ᓯᓂᓐᓂᖅ ᓱᕐᕃᓯᒪᓲᖅ ᕿᑦᑌᖓᑦᓯᐊᓂᕐᒥᒃ, ᐃᑉᐱᓂᐊᕐᓂᒥᒃ, ᐃᓱᒪᐅᑉ ᐃᓱᒪᑦᓯᐊᕈᓐᓇᓂᖓᓂᒃ ᐊᒻᒪᓗ ᑎᒥᒥᒃ._ᑲᓇᑕᒥ ᓯᓂᓐᓂᒥᒃ ᑲᑐᑦᔨᖃᑎᒌᑦ ᐅᖃᕐᓯᒪᔪᑦ ‘’ᑭᓇᑐᐃᓐᓇᓕᒫᒃᑯᑦ ᓱᖅᑯᐃᓯᓯᒪᒋᐊᓖᑦ ᓇᒻᒥᓂᖅ ᐅᓐᓄᐊᑯᑦ ᓯᓂᓐᓂᒋᒋᐊᓕᒻᒥᓂᒃ. ᖃᐅᔨᒍᓐᓇᑐᑎᑦ ᑖᑦᓱᒥᖓ ᖃᓄᐃᓪᓗᐊᑎᒋᔪᒥᒃ ᓯᓂᒋᐊᖃᕐᓂᕆᔭᕐᓂᒃ ᐃᑉᐱᒋᑐᐃᓐᓇᓗᒍ ᑕᙯᕐᓯᓯᐊᕐᓯᒪᓃᑦ ᑕᙯᕐᓯᓯᐊᕐᓯᒪᖕᖏᓃᓪᓘᓃᑦ ᐅᓪᓛᑯᑦ ᐊᒻᒪᓗ ᕿᑦᑌᖓᓂᕆᔦᑦ ᐅᓪᓗᖃ’’. ᖃᐅᔨᒋᐊᓪᓚᕈᒪᑐᐊᕈᕕᑦ ᑲᓇᑕᒥ ᓯᓂᓐᓂᒥᒃ ᑲᑐᑦᔨᖃᑎᒌᑦ, ᐅᓇ ᓇᕐᓂᓗᒍ.
ᓯᕗᓪᓕᐹᖓ ᐊᑦᔨᖑᐊᖅ ᐊᑖᓃᑦᑐᖅ, ᑕᑯᒍᓐᓇᑕᕗᑦ ᖃᐅᔨᓴᕐᑕᐅᒍᑎᕕᓂᕐᓂᒃ ᑲᓇᑕᒥ ᓄᐃᑕᑎᑦᓯᔪᑦ ᐱᑦᔪᑎᒋᓗᐊᖕᖑᐊᑕᖏᓐᓂᒃ ᓱᒧᑦ ᐃᓚᖏᑦ ᐃᓄᐃᑦ ᓯᓂᒍᓐᓇᖏᐅᒪᓲᖑᓂᖏᑦ. ᑐᖓᓕᐊᓂ ᐊᑦᔨᖑᐊᒥ, ᖃᐅᔨᓴᕐᑕᐅᔪᕕᓂᕐᓂᒃ ᓄᓇᕘᑦᒥᑦ ᑕᑯᒍᓐᓇᑐᒍᑦ ᑌᓯᔪᓂᒃ ᓱᒧᑦ ᐃᓚᖏᑦ ᐃᓄᐃᑦ ᓯᓂᖅᑲᔦᖕᖏᐅᒪᓲᖑᒻᒪᖔᑕ. ᑖᒃᑯᐊ ᑭᓯᑦᓯᒍᑎᓖᑦ ᐊᑑᑎᖃᑐᐃᓐᓇᕆᐊᓖᑦ ᖃᐅᔨᑎᑦᓯᒍᑎᐅᓗᑎᑦ ᕿᓂᕐᑐᖃᑦᓴᓕᕐᐸᑦ ᓇᓂ ᐱᒋᐊᕋᔭᕐᒪᖔᑕ ᖃᐅᔨᓴᕋᓱᐊᑦᓴᓕᕈᑎᑦ ᐱᑦᔪᑕᐅᑐᐃᓐᓇᕆᐊᓕᒻᒥᒃ ᓯᓂᒍᓐᓇᖏᐅᒪᓂᕐᒧᑦ. ᖃᐅᔨᒪᒍᑦᑕ ᓱᓇᒧᑦ ᓯᓂᒍᓐᓇᖏᐅᒪᓲᖑᓂᕗᑦ ᐃᑲᔪᕐᓯᑐᐃᓐᓇᕆᐊᓕᒃ ᖃᓄᖅ ᓯᓂᑦᓯᐊᓂᕐᓴᕉᕈᓐᓇᒪᖔᕐᐱᑦ.
ᕿᒥᕐᕈᒋᐊᓪᓛᓂᖅ ᑕᙯᕐᓯᓂᕐᒥᒃ :
2016 ᖑᑎᓪᓗᒍ, ᑐᓴᕋᑦᓴᖃᓚᐅᔪᔪᑦ ᓯᓚᕐᔪᐊᓕᒫᒥᒃ ᐊᖏᓂᕐᐹᒥᒃ ᖃᐅᔨᓴᕐᑕᐅᓂᖓ ᑕᙯᕐᓯᓂᐅᑉ ᐅᖃᓕᒪᒍᑎᕕᓂᐅᓚᐅᔪᔪᖅ ᐃᓱᒪᓐᓃᑐᐃᓐᓇᑐᑦ, , BBC-ᑯᑦ ᓈᓚᐅᑎᒃᑯᑦ. 18,000 ᐅᖓᑖᓅᕐᑐᑦ ᐃᓄᐃᑦ 134-ᓂᒃ ᓇᓂᑐᐃᓐᓇᖅ ᓄᓇᓂᒃ ᓯᓚᕐᔪᐊᒥ ᐱᓯᒪᔪᑦ (ᐊᒥᓲᓂᕐᓭᑦ UK-ᒥᑦ ᐱᓯᒪᔪᑦ, ᐊᓯᓕᒫᖏᑦ Europe-ᒥᑦ ᐅᕝᕙᓘᓐᓃᑦ North America-ᒥᑦ ᐱᓯᒪᑎᓪᓗᒋᑦ) ᐱᔭᕇᕐᑐᕕᓃᑦ ᑕᙯᕐᓯᓂᐅᑉ ᖃᐅᔨᓴᕐᑕᐅᒍᑎᖓᓂᒃ. ᐃᓄᐃᑦ ᑐᓂᔭᐅᔪᕕᓃᑦ ᐅᖃᐅᓯᕐᓂᒃ ᐊᑐᕈᓐᓇᑕᒥᓂᒃ ᖃᓄᖅ ᓇᓗᓀᕐᓯᒐᔭᕐᒪᖔᕐᒥᑦ ᑐᑭᖓᓂᒃ ᑕᙯᕐᓯᓂᐅᑉ. ᐊᑐᕐᑕᐅᓂᕐᐸᐅᓚᐅᕐᑐᐃᑦ ᐅᖃᐅᓰᑦ ᑎᒃᑯᐊᓗᐊᖕᖑᐊᓯᒪᔭᖏᑦ ᐅᑯᐊᖑᔪᑦ: ᓄᓪᓚᖓᓇᑦᓯᐊᑐᖅ, ᓭᒪᓇᕐᑐᖅ/ᓄᓪᓚᖓᓇᕐᑐᖅ, ᐃᓱᕐᕆᓇᕐᑐᖅ, ᐋᖅᑭᐸᓪᓕᐊᓇᕐᑐᖅ ᐊᒻᒪᓗ ᓯᓂᒃ.
ᖃᐅᔨᓴᕐᓂᒧᑦ ᐃᓚᐅᔪᕕᓃᑦ ᐊᐱᕆᔭᐅᓐᓂᒥᔪᑦ ᑎᒃᑲᐊᓯᖁᔭᐅᑦᓱᑎᒃ ᐱᖓᓱᓂᒃ ᓱᖃᑦᓯᓂᐅᔪᓂᒃ ᑕᙯᕐᓯᓯᐊᕐᓇᓂᐹᓂᒃ. ᖃᐅᔨᓴᕐᓂᒧᑦ ᐃᓚᐅᔪᕕᓃᑦ ᐊᐱᕐᓱᑕᐅᓐᓂᒥᔪᑦ ᓱᓀᑦ ᐱᖓᓱᑦ ᓱᖃᑦᓯᒍᓰᑦ ᑕᙯᕐᓯᓇᑦᓯᐊᑐᖁᑎᒋᓂᕐᐹᕆᒻᒪᖔᕐᒥᒋᑦ. ᐅᓇ ᐊᑐᐊᒐᓕᐊᕕᓂᖅ ᑕᑯᑦᓱᒍ “The Rest Test: Preliminary Findings from a Large-Scale International Survey on Rest,” ᐊᒥᓲᓂᕐᓭᑦ ᓱᖃᑦᓯᒍᓯᒋᔭᐅᓲᑦ ᐃᓄᓐᓃᖏᑫᓐᓇᕆᐊᕐᓗᓂ ᐅᕝᕙᓘᓐᓃᑦ ᐃᓄᓐᓄᑦ ᐊᑐᕐᑐᓴᓕᐊᕆᔭᐅᑦᓱᑎᒃ ᓴᓇᔭᐅᓯᒪᔪᓃᖕᖏᑫᓐᓇᓂᕐᒥᒃ ᐱᑕᖃᕐᓂᓴᐅᓲᖑᓂᕋᕐᓱᒋᑦ (ᐆᒃᑐᕋᐅᑎᒋᓗᒋᑦ, ᐃᒡᓗᔪᐊᑦ, ᐊᕐᖁᓯᐅᕐᑕᐅᓃᑦ, ᐃᒡᓗᒐᓴᕐᔪᐊᑦ). ᕿᒣᓯᒪᒍᓱᓐᓂᖅ ᑐᑭᓕᒃ ᐃᓱᒪᐅᑉ ᐱᐅᓯᕆᖕᖑᓱᓲᖓᓂᒃ ᐃᒫᒃ ᐃᓱᒪᒋᖕᖑᐊᓱᒋᑦ ᓱᓇᓱᐊᕐᓂᓄᑦ ᐅᕝᕙᓘᓐᓃᑦ ᖁᕕᐊᓇᕐᑐᖑᐊᓕᕆᓂᕐᒧᑦ ᐊᑑᑎᓪᓗᑐᕐᑐᓂᑦ ᖃᐅᑕᒫᕐᓯᐅᑎᓂᓪᓘᓃᑦ ᕿᒣᓯᒪᒍᓯᒋᑦᓱᒋᑦ. ᓇᕐᓂᓗᒍ ᐅᓇ ᐱᑐᒍᑎᒃ The Ten Most Restful Activities, ᐊᑐᐊᕐᓯᒍᓐᓇᑐᑎᑦ, 3 ᓱᖃᑦᓯᒍᓰᑦ ᑕᙯᕐᓯᓯᐊᕐᓇᓂᕐᐹᑦ ᐅᑯᐊ:
- ᐊᑐᐊᕐᓯᓂᖅ
- ᓯᓚᑐᐃᓐᓇᒦᓐᓂᖅ ᐊᒻᒪᓗ
- ᐃᓄᑑᓂᖅ
ᖃᐅᔨᓴᕆᐊᓪᓛᕆᑦ ᑕᙯᕐᓯᓂᕐᒥᒃ ᓇᐅᑦᓯᑐᐃᓂᕐᒧᑦ ᖃᐅᔨᓴᕐᓂᒥᒃ, ᐊᒻᒪᓗ ᑕᙯᕐᓯᓂᐅᑉ ᐃᓘᓐᓈᒍᑦ, ᑐᓵᓗᑎᑦ ᑕᖏᖏᑦ ᑕᙯᕐᓯᓂᐅᑉ.
ᐱᒋᐅᕐᓴᖃᑦᑕᓂᖅ ᓯᓂᑦᓯᐊᓂᕐᒥᒃ
ᓯᓚᐅᑉ ᖃᐅᒪᒍᓯᖓᑕ ᐊᓯᑦᔨᑕᕐᓂᖓ Sᓱᕐᕃᓯᒪᒍᓐᓇᒥᔪᖅ ᓯᓂᓐᓂᒥᒃ. ᑖᓗᑕᕐᓯᒪᓂᖅ ᓯᕿᓂᕐᒥᒃ ᖃᕆᐊᒧᑦ ᐃᑎᕐᑎᑌᓕᑦᓱᒍ ᐃᒐᓛᒃᑯᑦ ᐃᑲᔪᕐᓯᒪᒍᓐᓇᒥᔪᖅ ᓯᓂᓐᓂᒃ ᐅᐱᕐᖔᖑᑎᓪᓗᒍ.
ᑳᐱᑐᕐᑌᓕᓂᖅ, ᐃᒥᐊᓗᑦᑌᓕᓂᖅ ᓱᐴᕈᓯᔭᕐᑌᓕᓂᕐᓗ ᓯᓂᒐᓱᐊᕐᓇᐅᓚᐅᕐᑎᓇᒍ ᐃᑲᔪᕐᓯᒪᒍᓐᓇᒥᔪᖅ ᓯᓂᑦᓯᐊᕈᓐᓇᓂᕐᒥᒃ. ᑖᒃᑯᐊ ᐃᓚᒪᐅᑏᑦ ᕿᑦᑌᖓᑎᑦᓯᒍᓐᓇᒪᑕ ᐊᒻᒪᓗ ᐃᓕᓐᓂᒃ ᐃᖅᑯᒪᑎᑦᓯᒍᓐᓇᓱᑎᑦ. ᓄᑭᑖᕐᓇᑐᑦ ᐃᒥᕃᑦ, ᐃᒥᕃᑦ, ᑳᐲᑦ, ᑏ ᐊᒻᒪᓗ ᐊᐅᑯᓗᐃᑦ ᕿᑦᑌᖓᓇᕐᑐᑕᓖᑦ. ᓱᓇᑐᐃᓐᓇᖅ ᕿᑦᑌᖓᓇᕐᑐᑕᓕᒃ, ᐊᓪᓚᑕᐅᓯᒪᓲᑦ.
ᐊᐅᓚᑦᓯᓂᖅ ᑕᖃᒪᓂᕐᒥᒃ ᓄᓪᓚᖓᖅᑲᔭᖕᖏᓂᕐᒥᓗ
ᑕᖃᒪᓂᖅ ᓄᓪᓚᖓᖅᑲᔭᖕᖏᓂᕐᓗ ᖃᐅᔨᒪᔭᐅᔪᑐᖄᒃ ᐱᐅᖕᖏᓂᒃᑯᑦ ᓱᕐᕃᓯᒪᓲᖑᒋᐊᖏᓐᓂᒃ ᓯᓂᒻᒥᒃ ᑕᙯᕐᓯᓂᕐᒥᓗ. ᐊᑕᐅᓯᑐᐃᓐᓇᒥᒃ ᖃᓄᐃᓘᕐᑕᐅᒍᓯᖃᖕᖏᑐᖅ ᑕᖃᒪᓂᖅ ᐊᑦᔨᒌᖕᖏᑐᐃᓐᓇᐅᓂᑯᑦᑎᓄᑦ.
ᐃᓚᖏᑦ ᐃᓄᐃᑦ ᐃᑯᓪᓓᒋᐊᕆᓲᑦ ᑕᖃᒪᓂᕐᒥᓂᒃ ᓄᓇᓕᐊᕐᓂᑯᑦ, ᐃᓚᒥᓃᓐᓂᑯᑦ ᐃᓚᓐᓈᒥᓂᓪᓗ, ᐅᖃᓕᒪᖃᑎᖃᕐᓂᑯᑦ ᐊᓯᒥᓂᒃ, ᕿᑲᐅᒐᕐᓂᑯᑦ/ᑐᑦᓯᐊᓂᒃᑯᑦ, ᑕᓚᕖᓴᕐᓂᑯᑦ/ᑕᕐᕋᓕᔮᕐᓂᑯᑦ, ᐃᙯᓕᓴᕐᓂᑯᑦ, ᓂᑦᔭᓗᑦᑖᕈᑎᓕᐅᕐᓂᑯᑦ ᐅᕝᕙᓘᓐᓃᑦ ᓴᓇᖕᖑᐊᓂᒃᑯᑦ, ᐊᒻᒪᓗ/ᐅᕝᕙᓘᓐᓃᑦ ᒪᙯᒋᐊᕐᓯᒪᓂᒃᑯᑦ.
ᑭᓇᓕᒫᒃᑯᑦ ᐊᑦᔨᒌᖕᖏᑐᓂᒃ ᓱᖃᑦᓯᐅᑎᖃᓲᑦ ᐃᑲᔪᕐᓯᒍᑎᒋᑦᓱᒋᑦ ᐃᑯᓪᓓᒋᐊᕐᑎᓯᓯᒪᓂᒃᑯᑦ ᑕᖃᒪᓂᕐᒥᓂᒃ. ᓱᖃᑦᓯᒍᑎᓂᒃ ᐊᑑᑎᖃᑦᑕᓂᖅ ᐊᓕᐊᒋᔭᑎᓐᓂᒃ ᐃᑲᔪᕐᓯᓯᒪᑐᐃᓐᓇᕆᐊᓕᒃ ᓯᓂᓐᓂᒃ, ᑕᙯᕐᓯᓂᕐᓂᒃ ᐊᒻᒪᓗ ᐃᓘᓐᓈᒍᑦ ᖃᓄᐃᖕᖏᓯᐊᕐᓂᕆᔭᕐᓂᒃ.
ᓴᓂᕐᕙᓯᒪᒐᓱᐊᕐᓗᒋᑦ ᖃᕆᑕᐅᔭᕈᑎᑎᑦ
ᐊᑦᓱᕈᕐᓇᒥᔪᖅ ᓄᓪᓚᖓᒐᓱᒋᐊ ᐊᒻᒪᓗ ᑕᙯᕐᓯᒐᓱᒋᐊ ᐅᖃᓕᒪᕕᐅᑲᑦᑕᑐᐊᕋᑦᑕ ᐊᒻᒪᓗ ᖃᐅᔨᑎᑦᓯᒍᑎᒧᑦ ᖃᐅᔨᑎᑕᐅᖏᓐᓇᖃᑦᑕᓱᓂ ᖃᕆᑕᐅᔭᒃᑯᑦ. ᑐᖑᔪᕐᑕᖅ ᐃᑯᒪ ᐱᔪᖅ ᑕᓚᕖᓴᕐᓂᒃ ᖃᕆᑕᐅᔭᕐᓂᓘᓐᓃᑦ ᓯᓂᒍᓐᓇᖏᐅᒪᑎᑦᓯᒍᓐᓇᒥᔪᑦ.
ᑕᑯᓴᖃᑦᑕᖏᓐᓂᒃ ᐅᖄᓚᐅᑎᓂᒃ, ᖃᕆᑕᐅᔭᓂᒃ ᐊᒻᒪᓗ/ᐅᕝᕙᓘᓐᓃᑦ ᑎᒍᒥᐊᕌᐱᓐᓂᒃ ᖃᕆᑕᐅᔭᕐᓂᒃ ᑲᒪᖕᖏᓂᖅ ᓯᓂᑦᓯᐊᓇᕐᓂᓴᐅᒍᓐᓇᒥᔪᖅ.
ᐊᓂᕐᑎᕆᓂᖅ
ᐊᑕᐅᓯᖅ ᓱᑲᑦᑐᒥᒃ ᐊᒥᓱᐃᑦ ᐃᓄᐃᑦ ᐊᑐᓲᖑᒻᒥᒧᑦ ᑕᙯᕐᓯᓂᕐᒧᑦ ᐱᒋᐅᕐᓴᖃᑦᑕᓱᑎᑦ ᐊᓂᕐᑎᕆᓂᕐᒥᒃ ᐃᙯᓕᓴᕈᑎᖃᕐᓱᑎᑦ. ᖃᐅᔨᒋᐊᓪᓛᕈᓐᓇᑐᑎᑦ ᐊᓂᕐᑎᕆᓂᐅᑉ ᐃᙯᓕᓴᐅᑎᖏᓐᓂᒃ ᐊᒻᒪᓗ ᓯᑦᑐᑕᕐᓂᑯᑦ ᐅᕙᓂ ᖁᒻᒧᐊᑎᑕᐅᓯᒪᔪᒃᑯᑦ ᑐᖅᑲᑕᕐᕕᖓᓂᒃ.
ᐱᕕᑦᓴᖃᕐᑎᓗᑎᑦ ᐃᒻᒥᓂᒃ ᓄᖅᑲᓗᑎᑦ ᑕᙯᕐᓯᓗᑎᑦ
ᖃᓄᐃᖕᖏᑐᖅ ᕿᑲᑫᓐᓇᖃᑦᑕᓗᑎᑦ ᐊᒻᒪᓗ ᓄᖅᑲᑫᓐᓇᖃᑦᑕᓗᑎᑦ. ᐊᓃᖕᖑᐊᓇᐅᓕᑐᐊᕐᐸᑦ ᐊᑐᖏᓐᓇᕋᓱᐊᖃᑦᑕᓗᒍ ᓄᖅᑲᑫᓐᓇᓯᒪᓂᕐᒥᒃ ᐅᕝᕙᓘᓐᓃᑦ ᐱᓱᖕᖑᐊᑫᓐᓇᓗᑎᑦ ᕿᑎᕋᓕᕐᓯᒪᓂᖓᓂᒃ ᓂᕆᓐᓇᒥᒃ. ᑖᑯᐊ ᙯᑕᐅᓯᒪᒻᒪᑕ ᐅᕙᑦᑎᓄᑦ ᑕᙯᕐᓯᕕᑦᓴᐅᓱᑎᑦ ᐳᐃᒍᕐᑌᓕᖃᑦᑕᕆᑦ ᐊᑐᖏᓐᓇᕋᓱᐊᖃᑦᑕᓂᒃᑯᑦ ᑖᒃᑯᓂᖓ!
