‹ ᕿᓂᕈᑎᒧᑦ ᐅᑎᕈᑎᒃ
ᑐᓴᐅᒪᔭᐅᒋᐊᓖᑦ

ᓴᐳᑦᔨᓯᒪᓂᖅ ᓴᐳᑦᔭᐅᒪᓂᕐᓗ

ᐃᓱᒪᒋᓕᕋᑦᑎᒍ ᓇᒻᒥᓂᖅ ᖃᒪᑦᓯᐊᓂᖅ, ᐃᓱᒪᓪᓗᐊᓲᖑᔪᑦᓴᐅᖏᑦᑐᒍᑦ ᓴᐳᑦᔨᓯᒪᔪᑦᓴᐅᕆᐊᒥᒃ ᓴᐳᑎᔭᐅᓯᒪᒋᐊᖃᓕᕐᓂᒥᓪᓗ ᐊᓯᑦᑎᓂᒃ.  ᓴᐳᑦᔨᓯᒪᓂᖅ ᐊᒥᕐᕌᕈᑎᖃᕐᓂᓗ ᐊᓯᓂ ᐃᓱᒪᒋᑦᓱᒋᑦ ᐃᓄᑦᑎᒍᑦ ᐱᓪᓚᕆᐊᓘᖏᓐᓇᑐᖅ. ᐊᓪᓚᑕᕕᓂᕐᒥᒃ ᐃᓄᐃᑦ ᖃᐅᔨᒪᔭᑐᖃᖏᑦ: ᐃᓄᐃᑦ ᖃᐅᔨᒪᔭᖏᑦ ᑌᒪᖕᖓᓛᓂᑦ ᒥᑦᓯᖃᕆᐊᖏᑕ, ᐃᓄᒻᒪᕆᐅᓕᕐᑐᖅ ᒫᒃ ᑲᓪᓗᐊᖅ ᐅᖃᓚᐅᕐᑐᖅ ᐃᒫᒃ ‘ᐃᓄᐃᑦ ᑲᒪᒋᐅᑎᑦᓯᐊᐸᓚᐅᕐᑐᑦ ᐊᓂᒎᑎᑦᓯᐊᕈᒪᒧᑦ.  ᑌᒫᓪᓗᑐᖅ ᐱᓇᓱᐊᕆᐊᖃᕐᐸᓚᐅᕐᑐᑦ ᓴᐳᑦᔨᑲᑦᑕᐅᑎᒋᐊᖃᕐᓱᑎᒃ.  ᐊᓯᒥᒃ ᐃᑲᔪᕐᓯᒪᖃᑦᑕᓂᖅ ᐃᑲᔪᕐᑕᐅᒋᐊᓕᒥᒃ ᐃᓅᓯᐅᕆᐊᓕᒃᑰᑐᖅ, ᐊᖏᔫᑎᖏᓐᓇᕆᐊᓕᕗᑦ ᓄᖑᓐᓂᐊᖏᑦᑐᒥᒃ.  ᐃᒫᒃ ᐅᖃᐅᓯᐅᖃᑦᑕᓯᒪᔪᖅ ᐱᑦᓯᐊᑕᐅᕙᑉᐳᖅ ᐱᐅᔪᒥᒃ ᐊᓯᒥᓄᑦ ᐱᓚᖓᔪᒥᒃ ᐃᑲᔪᖃᑦᑕᑐᑦᓴᐅᒋᐊᑦᑕᓗ ᖃᖓᓕᒫᖅ ᑕᒐᐅᓕᕐᐸᑦ ᐱᔪᓐᓇᑕᑦᑎᒎᕐᑐᒥᒃ.  ᑌᒣᓕᖓᑎᓪᓗᒍ, ᐅᕙᒍᑦ ᐃᑲᔪᕐᑕᐅᒋᐊᖃᓕᕈᑦᑕ, ᐊᓯᑦᑎᓄᑦ ᐃᕐᖃᑕᐅᕋᔭᕐᑐᒍᑦ ᐃᑲᔪᕐᑕᕕᓂᕆᒐᑦᑎᒍ ᐃᑲᔪᕐᑕᐅᕆᐊᖃᕐᑎᓗᒋᑦ’ (ᖃᕆᑕᖅ, ᔨ., ᑎᐊᔅᑕ, ᕕ., ᑕᒐᓕᒃ, ᓯ., 2017).  ᓴᐳᑦᓯᔨᒪᐅᑎᓂᖅ ᓲᕐᓗ ᕈᒪᔭᕐᓱᓂᕐᒧᑦ, ᑲᔪᖏᕐᓭᒍᑎᒥᒃ ᓈᓚᒐᓱᓐᓂᓗ ᐊᒥᓱᓂ ᐱᕙᓪᓕᖁᑎᑕᓕᒃ ᓲᕐᓗ ᕈᒪᓚᖀᓂᕐᒥᒃ ᐊᓯᓂᒃ, ᐱᑦᔪᑎᑦᓴᓯᒍᑕᐅᑦᓱᓂᓗ ᐃᓅᓯᕐᒥ ᐱᔭᕇᕐᐸᓚᑦᓯᐊᑐᓪᓚᕆᒻᒥ ᐊᓂᒍᕐᒪᑦ.  ᐃᑲᔪᕐᑕᐅᓂᖅ ᐊᒥᓱᓂᒃ ᐱᕙᓪᓕᓇᕐᑐᖃᕐᒥᔪᖅ ᐱᓇᓱᑦᓯᐊᓇᕐᓂᓴᐅᑦᓱᓂᓗ, ᐊᓯᒋᔭᒥᒃ ᑲᒪᑦᓯᐊᓇᕐᓂᓴᐅᑦᓱᓂ ᐃᓱᒪᕈᓯᕆᔭᕐᓗ ᐱᕙᓪᓕᓚᕆᑦᓱᓂ ᐱᕈᕐᐸᓚᓐᓂᑯᖅ. ᐅᑯᐊ ᐃᓱᒪᑦᓴᓯᐅᕈᑎᑦᓴᑎᑦ ᓴᐳᑦᔨᓯᒪᓂᕐᒧᑦ ᓴᐳᑦᔭᐅᓯᒪᓂᕐᒧᓗ ᑕᑯᒋᐊᕋᑦᓭᑦ.

 


ᓴᐳᑦᔨᓯᒪᓂᖅ


ᑐᓵᑦᓯᐊᖃᑦᑕᓗᓂ  

ᐱᐅᓂᕐᐸᐅᖃᑕᐅᓪᓚᕆᑦᑐᖅ ᐃᑲᔪᓚᖓᒍᓂ ᐊᓯᒋᔭᒥᒃ, ᑐᓵᕋᓱᓐᓂᖅ ᐃᑉᐱᒋᒐᓱᓪᓗᒋᑦ ᑭᖕᖒᒪᒋᓂᕋᕐᑕᖏᑦ ᐱᔪᒪᔭᖏᓪᓗ.  ᑐᓵᑦᓯᐊᖃᑦᑕᓂᖅ ᐊᓯᒥᒃ ᐅᓚᐱᑦᓯᓇᓂ ᐊᔪᖀᒋᐊᑐᐃᓐᓇᕋᓂᓗ ᓴᐳᑦᔨᓯᒪᓂᐅᑦᓱᓂ ᐃᑲᔪᕐᓯᓚᕆᐊᓗᒍᓐᓇᑐᖅ. 

ᐃᑲᔪᕈᓐᓇᓂᕐᓂᒃ ᑲᖐᑦᓴᑎᑦᓯᓗᑎᑦ

ᐃᓚᖓᓂᑦ ᐃᓄᐃᑦ ᐃᑲᔪᕐᑕᐅᒋᐊᒥᒃ ᐅᐱᒍᓱᓪᓚᕆᑦᓱᑎᒃ ᑭᓯᒥ ᓇᓗᕐᖁᑎᒐᓚᓲᑦ ᐃᑲᔪᕐᑕᐅᖁᒪᒐᓱᒋᐊᖅ ᐃᑲᔪᕐᑕᐅᒋᐊᖃᓕᕆᐊᒥᓪᓗ ᓂᓪᓕᒐᓱᒋᐊᖅ.  ᐊᒥᓱᓂᒃ ᐃᑲᔪᕐᓯᕈᑎᑦᓴᖃᕐᖁᒍᑦ ᐃᓄᓐᓂᒃ ᐊᐱᕆᑐᐃᓐᓇᓯᓐᓇᐅᖏᑦᑐᓂᒃ ᐃᑲᔪᕐᑕᐅᕈᒪᓯᓐᓇᐅᖏᑦᑐᓂᓪᓗ ᐅᖃᕐᓗᑎᒃ. ᐊᒥᓱᓄᐊ ᓴᐳᑦᔨᓯᒪᕈᑎᑦᓴᐅᔪᑦ ᐃᑲᔪᕈᑎᒋᔪᓐᓇᑕᑎᑦ, ᓲᕐᓗ ᓭᒪᖕᖏᑐᒥᒃ (ᑐᓵᕋᓱᓐᓂᖅ), ᑌᑲᓃᓪᓗᑯᓐᓂᖅ (ᐃᑲᔪᕐᓯᓯᑦᓱᓂ ᐱᒍᑦᔨᓱᓂᓘᓐᓃᑦ), ᐅᖄᕕᖃᕐᓂᖅ (ᐊᔪᖀᒋᐊᕐᓱᓂ ᐃᒫᙰᓚᑦᓱᓂᓘᓐᓃᑦ) ᐱᔪᕆᓕᕐᓵᕆᓂᖅ (ᑲᔪᖏᕐᓭᓂᒃᑯᑦ ᐱᑦᓯᐊᑫᓐᓇᖁᑎᑦ ᓚᓂᒃᑯᓘᓐᓃᑦ). ᐃᓕᓴᕐᓗᒋᑦ ᐊᑦᔨᒋᖕᖏᑐᑦ ᐃᑲᔪᕐᓯᕈᑎᒋᔪᓐᓇᕋᔭᕐᑕᑎᑦ ᐊᓯᓐᓂᐅᕕᑦ. 

ᖃᐅᔨᒋᐊᓕᐅᒥᔭᕐᓂᖅ

ᖃᐅᔨᒋᐊᓕᐅᒥᔭᖃᑦᑕᓂᖅ ᐃᓄᒻᒥ ᑲᒪᑦᓯᐊᓂᐅᕗᖅ ᖃᓄᐃᖁᔨᓇᓂ ᓴᐳᑦᔨᓯᒪᑦᓱᒋᓪᓗ ᖃᓄᓕᒫᖅ ᕈᓐᓇᑕᒃᑰᑐᒥᒃ.  ᑕᒪᓐᓇ ᐃᓚᓐᓈᕆᓐᓂᒥᒃ ᐃᑲᔪᕐᑐᖅ ᐃᓄᓐᓂᓗ ᐊᕙᑎᓐᓃᑐᓂᒃ ᖃᓄᐃᓘᖃᑎᕋᕈᑕᐅᑦᓯᐊᕙᑦᓱᓂ.  ᖃᐅᔨᒋᐊᓕᐅᒥᔭᕐᐸᒋᑦ ᐃᓅᖃᑎᓐᓂ ᐊᑯᓂ ᑐᓴᕐᕕᒋᓐᓂᖏᑐᐊᕈᕕᒋᑦ. 

ᐃᓱᒪᒋᕙᒋᑦ ᓚᓐᓂᑐᐃᓐᓇᓗᑎᑦ ᐅᓪᓗᓯᐅᕐᓂᖓᓂᒃ ᐊᓯᔩᓗᑐᐊᓗᕈᓐᓇᑐᑎᑦ ᐊᓕᐊᓇᕐᓂᓴᒧᑦ.    

ᐱᓇᓱᖃᑎᑎᑦ ᖃᐅᔨᒋᐊᖃᑦᑕᑭᑦ

ᑲᔪᖏᕐᓴᐸᑦᑎᒋᑦ ᖃᐅᔨᒋᐊᓕᐅᒥᔭᖃᑦᑕᖁᑦᓱᑎᑦ ᐱᓇᓱᖃᑎᓐᓂᐅᕕᑦ ᐃᓚᓐᓈᕆᑦᓯᐊᕙᓪᓕᐊᓗᒍ.  ᑌᒣᓕᐅᕐᓂᓄᑦ ᓄᐃᑦᓯᓚᖓᔪᖅ ᓴᐳᑦᔨᓯᒪᑦᓯᐊᑐᒥᒃ ᐃᓕᓴᕐᕕᓴᑦᓯᐊᓚᕆᐊᓗᒻᒥ ᓇᔪᕐᓗᒍ ᐃᓕᓴᕐᕕᓯᓐᓂ.  ᐊᑐᕐᑕᐅᑎᑦᓯᖃᑦᑕᓂᖅ ᐃᓕᓭᕈᑎᑦᓴᓂᒃ ᐱᓇᓲᑎᑦᓴᓂᓪᓘᓃᑦ ᐃᑲᔪᕐᓯᕈᓐᓇᒥᔪᖅ ᐱᓇᓱᕈᒪᓕᐅᒥᑎᑦᓯᓗᓂ ᓴᐳᑦᔨᓯᒪᕈᑎᒋᓗᒍᓗ ᐱᓇᓱᖃᑎᑦᓂᒃ.  ᐊᓯᐊᒍᑦᑕᐅᖅ ᐃᑲᔪᕈᓐᓇᒥᔪᑎᑦ ᑲᑐᑎᔭᒥᒃ ᐱᓇᓱᓐᓂᑯᑦ ᐊᒻᒪᓘᓐᓃᑦ ᖁᕕᐊᓲᑎᖃᕐᓂᑯᑦ ᐊᓂᒎᑎᑦᓯᐊᒥᒋᐊᒥᒃ ᐃᓕᓴᕐᕕᒥ ᐊᑑᑎᒋᐊᓕᓐᓂᒃ.   ᐊᑐᐊᕐᓯᓚᐅᕐᓂᐊᖁᑎᑦ ᐊᑕᐅᓯᐅᑉ ᐃᓕᓴᕐᕕᐅᑉ ᐊᑐᕐᑕᕕᓂᖓᓂᒃ ᓄᐃᑦᓯᕙᓪᐊᕈᑎᒋᑦᓱᓂᐅᒃ ᐃᓗᓯᕐᓱᓯᐊᕐᑐᒥᒃ ᐃᓕᓴᕐᕕᒥ ᐃᓕᕐᕈᓯᐅᓂᐊᕐᑐᒥᒃ.  


ᓴᐳᑦᔭᐅᑎᑦᓯᐊᖃᑦᑕᕆᑦ: 


ᐅᑕᕐᕿᑎᕐᓇᒍ!  

ᐃᓚᖏᑦ ᐃᓄᐃᑦ ᐃᑲᔪᕐᑕᐅᕈᒪᒐᓱᒋᐊᖅ ᓇᓗᕐᖁᑎᓪᓚᕆᑦᑐᑦ ᐃᓕᕋᓱᒃᓱᑎᓪᓗ ᐊᐱᕆᒐᓱᒋᐊᖅ.  ᐃᑲᔪᕐᑕᐅᕈᒪᓂᖅᑦ ᐱᑦᓴᕃᓐᓇᑐᒥᒃ, ᐊᔪᕐᓴᑐᒥᒃ ᓱᕐᖃᔭᖕᖏᑐᒥᓪᓗ ᑐᑭᓯᒪᔭᐅᒋᐊᖃᖕᖏᑐᖅ; ᑐᑭᖃᑐᐃᓐᓇᒪᑦ ᐃᓕᕐᑕᓯᕈᑎᒥᒃ ᑭᓪᓕᕆᔪᓐᓇᑕᓄᑦ ᑎᑭᓯᒪᓕᕆᐊᒥᒃ.  ᓴᐳᑎᔭᐅᓂᖅ ᐃᓕᑦᓯᕙᓪᓕᕈᑕᐅᔪᓐᓇᒥᔪᖅ.  ᐊᕐᓕᐊᕈᑎᑦᓴᖃᓗᐊᓕᕐᓂᕈᕕᑦ, ᐃᓱᕐᕿᒋᔭᓐᓂ ᐲᕐᑎᑫᓐᓇᖁᕙᑦᑎᒋᑦ ᐃᑲᔪᕐᑕᐅᕈᒪᓯᓗᑎᓪᓗ.   

ᐃᑉᐱᓂᐊᕈᑎᒋᔭᑎᑦ ᐅᖃᐅᓯᕆᖃᑦᑕᑭᑦ  

ᖃᐅᔨᓯᒪᕗᒍᑦ ᒪᓐᓇ “ᖃᓄᐃᑉᐲᑦ?”-ᓚᔭᐅᓂᑐᐃᓐᓇᖅ ᑭᐅᒐᓱᒍᐊᒥᒃ ᐃᓚᖓᓂᑦ ᓇᓗᓇᕐᓯᐸᒋᐊᖓ.  ᐃᓚᖓᓂᑦ ᐃᓄᐃᑦ ᖃᓄᐃᖕᖏᓂᕋᓲᑦ ᑭᐅᑲᓪᓚᑐᐃᓐᓇᓱᑎᒃ ᓲᖑᒐᒥᒃ ᖃᓄᐃᑦᔪᑎᖃᓕᕋᑕᕐᓱᑎᒃ.  ᑭᓇᒧᑦ ᐊᐱᕆᔭᐅᒍᑦᑕ ᖃᓄᐃᒻᒪᖔᑦᑕ, ᐅᖃᐅᑎᓪᓗᑐᕐᓗᒍ ᐱᐅᓂᕐᓴᖅ ᖃᓄᓪᓚᕆᒃ ᐱᒻᒪᖔᑦᑕ. ᐃᒻᓄᑦ ᐊᐱᕆᐅᑎᒋᔪᓐᓇᑕᕗᑦ “ᐅᖃᕈᒪᕋᔭᕐᖁᖔ ᐃᑉᐱᒋᔭᒃᑲᓂᒃ ᐆᒧᖓ ᐃᓄᒻᒧᑦ?”.  ᐊᖏᕈᒃᑯ, ᑌᒪᓕ ᐃᓄᓐᓂᒃ ᐅᖃᐅᑦᔨᒋᐊᖅ ᑕᖃᒪᒋᐊᒥᒃ, ᐅᐃᒪᔮᖕᖑᓱᒋᐊᒥᒃ, ᑭᑦᓴᕆᐊᒥᒃ ᑕᐸᓀᑦᑐᑰᒋᐊᒥᓪᓗ ᓇᓗᖕᖏᓂᕐᓴᐅᓕᕋᔭᕐᑐᑦ ᖃᓄᖅ ᓴᐳᑦᔨᓯᒪᕆᐊᕐᑐᓴᐅᒻᒪᖔᕐᒥ ᐅᕙᑦᑎᓂᒃ.

ᐃᑲᔪᕐᑎᓴᓕᒃ ᓱᓕᒋᐊᓪᓚᒃ!  

ᐃᓅᖃᑎᓐᓈᑎᑦ ᓴᐳᑦᔨᓯᒪᔨᑦᓴᓯᐊᖑᒻᒥᔪᑦ.  ᐊᑐᕐᓗᒋᑦ ᖃᕆᑕᐅᔭᕈᑏᑦ ᐊᑦᔨᒋᖕᖏᑐᓪᓗ ᐅᐸᒐᑦᓴᐅᔪᑦ ᖃᓄᐃᓘᖃᑎᒌᑉᕕᓴᑦᓯᐊᕌᓘᒃ. ᐃᓱᐃᓪᓕᐅᓴᕐᓂᕈᕕᑦ ᐅᖃᖃᑎᖃᒋᐊᒥᒃ ᐃᓅᖃᑎᓐᓈᕋᓗᐊᓂᒃ ᐊᑑᑎᓯᒪᔪᖅ ᐱᓪᓗᒍ, ᐊᕿᖃᖕᖏᑐᒥᒃ ᐱᒍᑦᔭᐅᕈᑎᑦᓭᑦ ᓴᐳᑦᔭᐅᕈᒪᕕᑦᓴᐅᒥᔪᑦ ᐱᔪᑦ.  ᖃᐅᔨᒋᐊᕐᓗᒍ ᐃᑲᔪᕐᑕᐅᕕᑦᓴᖅ ᐱᓇᓱᐊᕈᑕᐅᔪᖅ ᖃᓄᐃᖕᖏᓯᐊᕐᓂᑎᓐᓂᒃ ᐱᑦᓯᐊᓂᖅ ᐱᒍᑦᔨᒍᑎᑦᓴᑕᓕᒃ ᐃᓕᓐᓂᒃ ᐊᑐᐃᓐᓇᓂᒃ.

ᐃᑲᔪᕐᑕᐅᒍᑎᖃᕆᐊᖃᕐᖀᑦ ᐸᕐᓇᕋᓱᓪᓗᑎᑦ?

ᐃᑲᔪᕐᑕᐅᕈᒪᓚᐅᕐᓂᐊᖁᑎᑦ ᐱᓇᓱᖃᑎᓐᓄᑦ ᐅᑉᕙᓘᓐᓃᑦ ᐃᓕᓴᕐᓂᓕᕆᐅᑎᓄᑦ ᐊᔪᖀᒋᐊᕐᑎᓯᓐᓂᒃ ᐃᑲᔪᕐᑕᐅᒍᑎᖃᒋᐊᖃᕈᕕᑦ ᐃᓕᓭᕈᑎᑦᓴᓕᐅᕐᑎᓗᑎᑦ.  ᖃᐅᔨᒋᐊᕈᓐᓇᒥᔪᑎᑦ ᕓᔅᐳᒃᒥ ᓄᓇᕕᒻᒥ ᐃᓕᓭᔨᓂᒃ  ᐅᑉᕙᓘᓐᓃᑦ “ᓄᓇᓕᒃ” ᓇᕿᑦᑕᐅᑎᖓ Nunavik-IcE ᖃᕆᑕᐅᔭᕐᓕᐊᕐᕕᖓᓂ. ᐅᓇ ᐃᓕᓐᓂᐊᑎᑦᓯᒍᑎ ᐊᓪᓚᕕᐅᔪᓐᓇᑐᖅ ᐃᑲᔪᕐᑎᓴᑦᓯᐊᖑᒻᒥᔪᖅ ᐃᓕᓴᐅᑎᑦᓴᓕᐊᑎᑦ ᐊᓯᓐᓂᒃ ᐸᕐᓇᖃᑎᖃᕐᓗᑎᑦ ᐱᓇᓱᐊᕈᓐᓇᓕᕋᕕᒋᑦ.


ᓇᒻᒥᓂᖅ ᑲᒪᑦᓯᐊᓂᕐᒧᑦ ᐊᑐᑕᐅᓲᖅ: 

ᐃᑲᔪᕐᑕᐅᕈᒪᓂᕐᓂᒃ ᐆᑦᑐᕋᖃᑦᑕᓗᑎᑦ ᓴᐳᑦᔭᐅᕈᒪᐅᑎᓂᓪᓘᓃᑦ.  ᐃᓄᑦᑕᖃᕐᖄ ᓄᓇᓕᓐᓃᑐᒥᒃ ᐃᑲᔪᓚᐅᕐᓯᒪᔭᓐᓂᒃ?  ᐃᑲᔪᕐᑕᐅᖃᒻᒥᐅᒋᕖᑦ ᐊᓯᓐᓄᑦ?  ᐊᑦᔨᖑᐊᓂᒃ ᑐᔪᓚᐅᕐᓂᐊᖃᑎᒍᑦ ᖃᓄᖅ ᐃᓄᐃᑦ ᓄᓇᓕᑦᓯᓂ ᓴᐳᑦᔨᓯᒪᖃᑦᑕᐅᑎᓲᖑᒻᒪᖔᑕ.

  • Max. file size: 64 MB.
    Once your picture is uploaded, our team will receive it and add it to this page in the following days.
  • Adding your name and your community is optional. If you choose to do so, it will appear under the picture you sent.
ᐊᐱᕐᓲᑎᑦᓴᖃᕈᕕᑦ ᐅᖃᐅᓯᑦᓴᖃᕈᕕᓪᓘᓃᑦ, ᖃᐅᔨᓴᕐᕕᒋᑎᒍ.

ᖃᐅᔨᓴᕐᕕᒋᑎᒍ