‹ ᕿᓂᕈᑎᒧᑦ ᐅᑎᕈᑎᒃ
ᕿᒥᕐᕈᐊᑦ

ᐊᓂᕐᕋᒥ ᐊᑐᐊᕐᓯᓂᖅ

ᐊᑐᐊᕐᓯᖃᑎᖃᕐᓂᖅ ᕿᑐᕐᖓᓯᓐᓂᒃ ᐱᔭᕆᐊᑭᑦᑑᕗᖅ ᐊᒻᒪᓗ ᐱᒻᒪᕆᐅᑦᓱᓂ ᐃᓕᓐᓂᐊᑎᑦᓯᒍᑎᐅᑦᓱᓂ ᓱᖃᑦᓯᓂᒃᑯᑦ. ᕿᑐᕐᖓᓯᓐᓂᒃ ᓄᑖᓂᒃ ᐅᖃᕐᑕᐅᒍᓯᕐᓂᒃ ᐃᓕᑦᓯᑎᑦᓯᒍᓐᓇᓱᓂ, ᐃᓱᒪᑦᓯᐊᓂᕐᒥᒃ ᐱᓕᐅᒥᑎᑦᓯᒍᓐᓇᓱᓂ, ᓄᑖᓂᒃ ᐃᓕᑦᔫᒥᑎᑦᓯᓚᖓᑦᓱᓂ ᐊᒻᒪᓗ ᐃᓱᒪᑦᓯᐊᓕᐅᒥᑎᑦᓯᓗᓂ.

ᐃᑲᔪᕐᓯᓂᖅ ᐊᓂᕐᕋᒥ ᐊᑐᐊᕐᓯᓂᕐᒥᒃ ᐃᓕᓐᓂᐊᕖᑦ ᓂᕆᐅᓇᖕᖏᑐᒥ ᐅᒃᑯᐊᓯᒪᑎᓪᓗᒋᑦ, ᑲᑎᕕᒃ ᐃᓕᓴᕐᓂᓕᕆᓂᖅ ᐱᓇᓱᐊᖃᑎᖏᓪᓗ ᐃᓄᑦᑎᑑᕐᑐᓂᒃ ᕿᒥᕐᕈᐊᓂᒃ ᖃᕆᑕᐅᔭᒨᔦᔪᑦ ᐊᑐᐃᓐᓇᐅᔪᓂᒃ ᐊᒻᒪᓗ ᐊᑐᐃᓐᓇᖃᕐᑎᓯᑦᓱᑎᒃ ᐊᑐᐊᕐᓯᓂᕐᒥᒃ ᐃᑲᔪᕐᓯᐅᑎᓂᒃ ᑕᒡᒐᓂ ᐊᓪᓚᓯᒪᔪᒥ.


ᐊᑐᐊᕐᓯᓂᕐᒥᒃ ᐃᑲᔪᕐᓯᐅᑏᑦ

ᐊᑐᐊᕐᓯᓂᕐᒥᒃ ᐃᑲᔪᕐᓯᐅᑏᑦ ᐊᑐᐃᓐᓇᐅᑎᑦᓯᕗᑦ ᐊᖓᔪᕐᖄᕆᔭᐅᔪᓂᒃ ᐊᕐᓱᕈᕐᓇᖏᑦᑐᓂᒃ ᐃᑲᔪᕐᓯᒍᑎᑦᓴᓂᒃ ᕿᑐᕐᖓᒥᓄᑦ ᐊᑐᐊᕐᓯᒍᓐᓇᓯᑎᑦᓯᓚᖓᑦᓱᑎᒃ. ᑕᒪᒃᑯᐊ ᐃᑲᔪᕐᓯᐅᑏᑦ ᐊᓕᐊᕐᓇᕐᑑᑎᑦᓯᒐᓱᐊᕐᕈᑏᑦ ᐃᑲᔪᕐᓯᓂᒃᑯᑦ ᕿᑐᕐᖓᓯᓐᓂᒃ ᐊᒻᒪᓗ ᐃᓅᓱᑦᑐᓂᒃ ᐊᓕᐊᓱᐊᑎᑦᓯᓕᐅᒥᓚᖓᑦᓱᑎᒃ ᐊᑐᐊᕐᓯᒋᐊᒥᓪᓗ ᐃᓱᕐᕆᓕᐅᒥᓗᑎᒃ. ᐆᑦᑐᕋᖃᑦᑕᓗᑎᑦ ᐃᑲᔪᕐᓯᐅᑎᒥᒃ ᐊᑕᐅᓯᕐᒥᒃ ᐱᓇᓱᐊᕈᓯᕐᓂ ᐊᑐᓂ. ᐃᓱᐊᕆᓂᕐᐹᓂᒃ ᕿᑐᕐᖓᓄᑦ ᕿᒥᕐᕈᓗᑎᑦ.

ᐅᑭᐅᖏᑎᒍᑦ ᐊᕕᑦᑐᓯᒪᒐᓗᐊᕐᑎᓗᒋᑦ, ᐊᒥᓱᐃᑦ ᐊᑐᕐᑕᐅᒍᓐᓇᑐᑦ ᐊᑐᐊᕐᓯᔪᓄᑦ ᖃᑦᓯᑐᐃᓐᓇᓂᒃ ᐅᑭᐅᓕᓐᓄᑦ ᐊᒻᒪᓗ ᐱᒋᐅᕐᓂᓕᓐᓄᑦ. ᐅᓐᓂᑑᑦᔨᕗᒍᑦ ᓇᓪᓕᑐᐃᓐᓇᖏᓐᓂᒃ ᐊᑐᕐᓂᒥᒃ ᐃᓱᐊᕆᓂᕐᐹᓯᓐᓄᑦ ᐃᓚᒌᑎᒍᑦ.

Select the age group of your children to go to that section:


ᐃᑲᔪᕐᓯᐅᑏᑦ ᐊᖓᔪᕐᖄᖑᔪᓄᑦ ᐱᐊᕌᕈᓕᓐᓄᑦ

ᐱᐊᕌᕈᕐᓄᑦ ᐊᑐᐊᕐᓯᑲᐱᓐᓂᒃ ᓈᒻᒪᑐᖅ. ᐱᐊᕃᑦ ᐃᓅᓕᕋᑖᕋᓗᐊᕋᒥᒃ ᐱᒋᐅᕐᓴᓯᓲᑦ. ᐅᖄᕕᐅᓂᑐᐃᓐᓇᑯᑦ, ᐱᖕᖑᐊᖃᑎᒋᓗᒋᑦ ᐊᒻᒪᓗ ᑲᒪᒋᑦᓯᐊᓱᒋᑦ ᐅᓪᓗᑕᒫᑦ, ᐱᐊᕌᕈᐃᑦ ᐱᕈᕐᐸᓕᐊᓚᖓᔪᖅ ᐅᖃᐅᓯᕐᓂᒃ ᐱᒋᐅᕐᓴᓂᒃᑯᑦ ᐊᑐᐊᕐᓯᒍᓐᓇᓯᓛᖁᓪᓗᒍ.

ᓯᓂᒐᓱᐊᕐᑎᓗᒍ ᐊᑐᐊᕐᓯᕕᖃᕐᓂᖅ

ᐱᐊᕌᕈᐃᑦ ᑎᒍᒥᕐᐊᓗᒍ ᕿᒥᕐᕈᐊᖃᑎᒋᓪᓗᒍ ᐊᓕᐊᕆᔭᖃᓚᖓᔪᖅ ᑎᒍᒥᐊᕐᑕᐅᒋᐊᒥᒃ ᑐᓵᓂᒃᑯᓗ ᓂᐲᓐᓂᒃ ᐊᑐᐊᕐᓯᑎᓪᓗᑎᑦ. ᐊᑦᑕᓇᕐᑐᒦᖕᖏᓂᕐᒥᓂᒃ ᐃᑉᐱᓂᐊᕐᓗᓂ ᐊᒻᒪᓗ ᖃᓄᐃᖕᖏᓯᐊᕐᓂᒥᓂᒃ ᐊᑐᐊᕐᓯᑎᓪᓗᑎᑦ ᕿᑐᕐᙰᑦ ᐱᔪᓐᓇᓂᕐᒥᓂᒃ ᐃᓱᒪᑦᓯᐊᒍᓐᓇᓯᓚᖓᔪᖅ ᐊᓕᐊᒋᔭᖃᕐᓗᓂᓪᓗ ᐊᑐᐊᕐᓯᓂᕐᒥᒃ.

ᕿᒥᕐᕈᐊᓂᒃ ᕿᓂᕆᑦ ᐱᐊᕌᕈᐃᓐᓄᑦ ᐊᑐᐊᕐᓯᒍᑎᑦᓴᑎᓐᓂᒃ >>

ᕿᑐᕐᖓᐱᑦ ᓂᐹᒍᓯᖏᓐᓂᒃ ᐱᕙᓪᓕᐊᑎᑦᓯᒐᓱᐊᕐᓂᖅ

ᑕᒪᒃᑯᐊ ᐱᐊᕌᕈᑉᐱᑦ ᐃᓕᓐᓄᑦ ᐅᖄᕈᓯᖏᑦ, ᐊᒻᒪᓗ ᐱᒻᒪᕆᐅᑦᓱᑎᒃ ᐅᖄᕆᐅᕐᓴᓂᕐᒧᑦ. ᐃᓕᑦᑎᕋᓱᐊᖃᑦᑕᓗᒋᑦ ᐃᓕᓐᓂᒃ ᑐᓵᑎᓪᓗᒋᑦ. ᓂᐹᒋᐅᕐᓴᖃᑦᑕᐸᑕ ᐱᐊᕌᕈᐃᑦ, ᑐᑭᖃᕐᓂᓴᐅᓕᐅᒥᓛᕐᑐᑦ. ᓂᐹᕈᓯᐊᐱᖏᓐᓂᒃ ᐃᓕᖃᑦᑕᓗᑎᑦ, ᒥᐅᒡᒎᖑᐊᕐᓗᑎᑦ ᐊᒻᒪᓗ ᓄᓇᒃᑰᔫᑉ ᓂᐱᖏᓐᓂᒃ ᐃᓕᖕᖑᐊᓗᑎᓗ!

ᐱᐊᕌᕈᐃᓪᓗ ᐊᖓᔪᕐᖄᕆᔦᓪᓗ ᐊᑐᐊᕋᑦᓴᖏᑦ ᕿᖕᒥᓗ ᐴᓯᓗ ᒥᖑᐊᕈᑎᓕᕆᔫᒃ

ᐃᑲᔪᕐᓯᐅᑏᑦ ᐊᖓᔪᕐᖄᖑᔪᓄᑦ ᐅᑭᐅᑭᑦᑐᓄᑦ ᐱᐊᕋᕐᓄᑦ

ᐱᐊᕃᑦ ᐅᑭᐅᑭᑦᑐᐃᑦ ᓂᒪᒍᓱᓐᓂᓭᑦ. ᐅᓪᓗᑕᒫᑦ ᐅᖄᖃᑎᖃᕈᓰᑦ ᐊᒥᓱᐃᖑᕗᑦ ᐊᒻᒪᓗ ᐅᖄᒋᐅᕐᓴᐅᑏᑦ.

ᐱᐊᕋᖅ ᐅᑭᐅᑭᑦᑐᖅ ᐊᑐᐊᕋᑦᓴᖏᑦ ᑭᓀᓐᓈ ᑎᒍᓯᔪᖅ ᐱᑕᐅᑉ ᐳᕕᕐᑕᔫᖓᓂᒃ?

ᖃᐅᔨᒪᓚᖓᕗᑎᑦ ᐱᐊᕃᑦ ᕿᑲᑐᐃᓐᓇᓚᖓᖕᖏᒪᑦ ᐊᑐᐊᕐᓯᒐᓱᐊᕐᑎᓗᑎᑦ

ᐱᐊᕃᑦ ᐅᑭᐅᑭᓐᓂᓭᑦ ᓂᒪᒍᒪᓂᓖᑦ, ᑌᒣᒻᒪᑦ ᐃᓱᒫᓗᒋᕈᓐᓀᓗᒍ ᐊᑐᐊᕐᓯᒐᓱᐊᕐᑎᓗᑎᑦ ᕿᓄᓯᑉᐸᑦ ᐅᕝᕙᓘᓐᓃᑦ ᒥᓯᑦᑕᓯᑉᐸᑦ, ᐱᖕᖑᐊᓯᑐᐃᓐᓇᐸᑦ ᐅᕝᕙᓘᓐᓃᑦ ᐃᓕᓐᓃᓱᓂ ᐲᑐᐃᓐᓇᐸᑦ ᐊᑐᐊᕐᓯᒐᓱᐊᕐᓃᓂ. ᓂᒪᑦᑐᐊᒐᓗᐊᕐᐸᑦ, ᑭᓯᐊᓂ ᓈᓚᑦᑐᑦ.

ᐊᐱᕐᓱᖃᑦᑕᓂᖅ

ᓈᓚᓗᒋᑦ ᐱᐊᕋᓯᑦᑕ ᑭᐅᒍᑎᖏᑦ. ᐱᐊᕃᑦ ᐅᑭᐅᑭᑦᑐᐃᑦ ᖃᓄᓕᒫᖅ ᐅᖄᕈᑎᑦᓴᓖᑦ ᐊᒻᒪᓗ ᐃᓱᒪᒍᓯᖃᕐᓱᑎᒃ ᑐᓴᕈᒥᓇᕐᑐᓂᒃ ᓯᓚᐅᕐᔪᐊᒨᓕᖓᔪᓂᒃ. ᑫᓪᓗᑐᖃᑦᑕᓗᒋᑦ ᐱᐊᕋᓯᑦᑕ ᖃᓄᖅ ᐃᓱᒪᒋᔭᖏᓐᓂᒃ ᐅᖄᖁᓪᓗᒋᑦ.

ᐊᑐᐊᕐᓯᕕᒋᖃᑦᑕᓗᒋᑦ ᓀᑦᑐᓂᒃ, ᓇᓗᓇᖕᖏᑐᓂᒃ ᐊᑐᐊᕐᓯᕕᒌᓐᓇᖃᑦᑕᓗᒋᓪᓗ

ᐱᐊᕃᑦ ᐅᑭᐅᑭᑦᑐᐃᑦ ᓈᓚᖕᖏᓂᕐᓭᑦ ᐱᐊᕌᕈᕐᓂᒃ. ᕿᒥᕐᕈᐊᓂᒃ ᕿᓂᖃᑦᑕᓗᑎᑦ ᓀᑦᑐᓂᒃ ᓇᓗᓇᖕᖏᑐᓂᓪᓗ. ᑮᑖᐱᒃ ᐊᑐᐊᕐᓯᓗᑎᑦ, ᐅᓪᓗᑯᑦ ᐊᒥᓱᕕᓪᓗᑎᑦ.

ᐊᓕᐊᓱᐊᖕᖏᓚᑑᖅ?

ᐊᓯᐊᓂᒃ ᐊᑐᐊᕐᓯᕕᒋᒐᓱᐊᕐᓗᒋᑦ ᐅᕝᕙᓘᓐᓃᑦ ᓯᐊᕉᓕᕐᐸᑦ ᐅᓪᓘᑉ ᐃᓛᓐᓂ. ᐱᐊᕋᕐᒧᑦ ᐅᑭᐅᑭᑦᑐᒧᑦ ᐊᑐᐊᕐᓯᕕᖃᕐᓂᖅ ᑐᕌᖓᒻᒪᑦ ᐃᓕᓐᓂᐊᑎᑦᓯᒐᓱᐊᕐᓂᑯᑦ ᐱᐅᔪᓂᒃ ᐊᑑᑎᑎᑦᓯᒐᓱᐊᕐᓂᐅᕗᖅ ᕿᒥᕐᕈᐊᑎᒍᑦ, ᑭᓯᐊᓂᓕ ᕿᒥᕐᕈᐊᓕᒫᒥᒃ ᓈᓂᖓᓄᑦ ᑎᑭᐅᑎᓪᓗᑯᐊᐱᖕᖏᓗᑎᑦ.

ᕿᒥᕐᕈᐊᓂᒃ ᕿᓂᕆᑦ ᐱᐊᕋᕐᓄᑦ ᐅᑭᐅᑭᑦᑐᒧᑦ ᐊᑐᐊᕐᓯᒍᑎᑦᓴᑎᓐᓂᒃ >>


ᐃᑲᔪᕐᓯᐅᑏᑦ ᐊᖓᔪᕐᖄᖑᔪᓄᑦ ᐃᓕᓐᓂᐊᕆᐊᕕᑦᑐᓂᒃ ᐱᐊᕋᓕᓐᓄᑦ

ᐊᑐᐊᕐᓯᑲᐱᑦᓯᒪᓗᑎᑦ ᐊᒻᒪᓗ ᐊᑐᐊᕐᓯᖏᓐᓇᖃᑦᑕᓗᑎᓪᓗ. ᐊᕐᕌᒍᐃᑦ ᐱᒋᐊᕐᓂᖏᓐᓂ ᐱᒻᒪᕆᐅᕗᖅ ᐱᕈᕐᐸᓕᐊᓂᖏᑦ ᐃᓅᓯᓕᒫᒥᓅᓕᖓᔪᓂᒃ ᐊᑐᐊᕐᓯᓂᕐᒥᒃ ᐊᓕᐊᒋᔭᖃᕐᓂᖏᑦ. ᐱᐊᕋᕐᓄᑦ ᐊᑐᐊᕐᓯᑲᐱᓐᓂᒃ ᓈᒻᒪᑐᖅ!

ᐊᑐᐊᕐᓯᖃᑎᒌᓐᓂᖅ ᐅᓪᓗᑕᒫᑦ

ᐊᑐᐊᕐᓯᖃᑎᒋᖃᑦᑕᓗᒍ ᕿᑐᕐᙰᑦ ᐅᓪᓗᑕᒫᑦ. ᐱᔪᓐᓇᓯᑐᐊᕈᑦᓯ ᐃᓱᐊᕐᑐᒥᒃ ᐊᓕᐊᓇᕐᑐᒥᒃ ᐊᑑᑎᖃᑦᑕᓗᓯ, ᖃᓂᑦᑕᕇᓐᓂᒥᒃ.

ᓱᓇᓕᒫᓂᒃ ᐊᑎᓕᐅᕆᖃᑦᑕᓂᖅ

ᕿᑐᕐᙰᑦ ᐅᖃᐅᓯᕐᓂᒃ ᐱᒋᐅᕐᓴᑎᓪᓗᒍ ᐅᖄᕕᒋᖃᑦᑕᓗᒍ ᐅᖃᐅᓯᕐᓂᒃ ᓱᓇᑐᐃᓐᓇᓂᓪᓗ. ᐆᑦᑑᑎᒋᓗᒍ, “ᑕᑯᒋᑦ ᖃᖓᑦᑕᔫᖅ! ᐅᑯᐊ ᖃᖓᑦᑕᔫᑉ ᐃᓴᕈᒋᒃ. ᓱᒐᒥ ᐃᓴᕉᓚᔭᐅᓲᖑᔪᕆᔭᑎᑦ?”

ᐅᖄᕈᑎᒋᖃᑦᑕᓗᒍᓪᓗ ᐊᓪᓚᓂᖅ

ᐅᖃᐅᑎᓗᒋᑦ ᕿᑐᕐᖓᓯ ᖃᓄᖅ ᐊᑐᐊᕐᓯᒋᐊᒥᒃ ᓴᐅᒥᐊᓂ ᐱᒋᐊᕐᓱᒍ ᑕᓕᕐᐱᒧᑦ ᑎᑭᑦᓱᒍ ᐊᒻᒪᓗ ᐅᖃᐅᓰᑦ ᐊᕕᑦᑕᓲᖑᓂᖏᓐᓂᒃ ᐊᑐᓂ.

ᑕᑯᑎᖃᑦᑕᓗᒋᑦ ᐊᓪᓚᓯᒪᔪᓂᒃ ᓇᓂᓕᒫᕐᑐᓂᒃ

ᐅᖄᕕᒋᖃᑦᑕᓗᒍ ᐊᓪᓚᓯᒪᔪᓂᒃ ᐅᖃᐅᓯᕐᓂᒃ ᑕᑯᔭᓕᒫᑎᓐᓂᒃ ᓇᓂᓕᒫᖅ. ᕿᑐᕐᙰᑦ ᐊᐱᕆᖃᑦᑕᓗᒍ ᐅᖃᐅᓯᕐᒥᒃ ᓇᓂᓯᒍᓐᓇᒪᖔᑦ ᐊᓃᕐᓂᑕᒫᑦ.

ᐱᐊᕋᕐᓄᑦ ᐊᖓᔪᕐᖄᓄᓪᓗ ᐊᑐᐊᕋᑦᓴᖏᑦ ᑭᐳᖕᖓᐅᑎᔪᑦ, ᐊᑐᐃᓐᓇᐅᔪᖅ ᐅᖓᕙᒥᐅᑎᑐᑦ ᐊᒻᒪᓗ ᑕᓯᐅᔭᕐᔪᐊᒥᐅᑎᑐᑦ

ᕿᒥᕐᕈᐊᓂᒃ ᓇᓂᓯᓂᖅ ᐃᓕᓐᓂᐊᕆᐊᕕᑦᑐᓄᑦ ᕿᑐᕐᖓᓯᓐᓄᑦ >>


ᐃᑲᔪᕐᓯᐅᑏᑦ ᐊᖓᔪᕐᖄᖑᔪᓄᑦ ᐃᓕᓐᓂᐊᕆᐊᖕᖓᑐᓂᒃ ᐱᐊᕋᓕᓐᓄᑦ

ᐱᖕᖑᐊᖃᑎᒋᖃᑦᑕᓗᒋᑦ ᐊᓪᓚᕈᓯᕐᓂᒃ, ᐅᖃᐅᓯᕐᓂᒃ ᐊᒻᒪᓗ ᓂᐱᓐᓂᒃ! ᐊᓕᐊᓱᐊᓂᖅ ᐅᖃᐅᓯᕐᒨᓕᖓᔪᓂᒃ ᐃᑲᔪᕐᓯᔪᖅ ᕿᑐᕐᖓᓯᑦᑕ ᐃᓕᑦᓯᒍᓯᖏᓐᓂᒃ ᐊᑐᐊᕐᓯᒋᐅᕐᓴᑎᑦᓯᓂᕐᒧᑦ.

ᐃᓕᓐᓂᐊᕆᐊᖕᖓᑐᐃᑦ ᐊᑐᐊᕋᑦᓴᖏᑦ ᑎᒍᒥᐊᕋᑎᒍᑦ ᖃᕆᑕᐅᔭᒃᑯᑦ ᔫᓯᐱ ᐊᐅᓚᓴᕐᑐᖅ

ᐊᑐᐊᕐᓗᒍ ᑌᒪ ᐆᑦᑐᕋᕐᓗᒍ

ᕿᑐᕐᖓᐱᑦ ᐊᑐᐊᕐᑕᖏᓐᓂᒃ ᑐᑭᓯᓇᕐᑎᓯᓗᑎᑦ ᐃᓅᓯᕐᒥᒃ ᐊᑑᑎᓲᓂᒃ. ᐊᑐᐊᕐᓯᐸᑦ ᐆᒪᔪᓐᓅᓕᖓᔪᓂᒃ, ᐅᓂᒃᑲᐅᔨᓗᒍ ᒪᙯᓐᓂᕕᓂᕐᓂᒃ ᑭᖑᓪᓕᐹᒥ.

ᑎᒡᒍᐊᓯᓂᖅ ᐅᖄᓗᒋᓪᓗ ᐅᖃᐅᓯᕐᑕᖏᑦ

ᕿᑐᕐᙰᑦ ᑎᑭᒻᒥᓄᑦ ᐊᑐᐊᕐᑕᒥᓂᒃ ᑎᒡᒍᐊᑎᖃᑦᑕᓗᒍ ᐅᖃᐅᓯᕐᑕᖏᓐᓂᓘᓐᓃᑦ ᐅᖄᕐᑕᖏᓐᓂᒃ. ᐊᓪᓚᕕᑦᓴᒥ ᑌᒣᓘᕐᑎᓗᒍ, ᓯᐅᕋᕐᒥᒃ ᐅᕝᕙᓘᓐᓃᑦ ᓄᓇᔭᒥᒃ, ᐅᕝᕙᓘᓐᓃᑦ ᐴᕈᓇᕐᒥᒃ ᓴᓇᐅᒐᑦᑕᓕᒻᒥᒃ.

ᐊᓪᓚᓂᖅ

ᐊᓪᓚᕕᑦᓴᖃᕐᓗᑎᒃ ᐊᓪᓚᐅᑎᓂᓪᓗ ᐊᑐᐃᓐᓇᓂᒃ ᕿᑐᕐᙰᓄᑦ ᐊᑐᕐᑕᐅᔪᑦᓴᓂᒃ ᐊᓪᓚᒍᑎᕆᓂᐊᕐᑕᖏᓐᓂᒃ. ᐱᓇᓱᐊᖃᑎᒌᓪᓗᑎᒃ, ᐊᓪᓚᓯᒪᔪᓕᐅᕐᓗᑎᒃ ᐅᖃᐅᓯᕐᒥᒃ ᒪᕐᕉᓂᓪᓘᓃᑦ ᓱᓇᑐᐃᓐᓇᒨᓕᖓᔪᒥᒃ.

ᐅᖃᕈᓯᕐᓂᒃ ᐱᖕᖑᐊᕈᑎᖃᕐᓂᖅ

ᐱᒋᐅᕐᓴᑎᓪᓗᒋᑦ ᐅᖃᕐᑕᐅᒍᓯᕐᓂᒃ ᓂᐱᓐᓂᒃ ᐅᖃᐅᓯᕈᕐᑎᖃᑦᑕᓗᒋᑦ. ᐊᐱᕆᓗᑎᑦ, “ᓇᓚᐅᑦᓵᕈᓐᓇᖀᑦ ᐅᓇ ᐅᖃᕐᑕᐅᒍᓯᖅ ᓱᓇᐅᒻᒪᖔᑦ? ᓇ-ᑎᕐ-ᓂ-ᐅ-ᑎᒃ” ᐅᖃᕐᑕᐅᒍᓰᑦ ᓱᒃᑫᓂᕐᓴᒥᒃ ᐅᖃᖃᑦᑕᓗᒋᑦ.

ᕿᒥᕐᕈᐊᓂᒃ ᓇᓂᓯᓂᖅ ᐃᓕᓐᓂᐊᕆᐊᖕᖓᑐᓄᑦ ᕿᑐᕐᖓᓯᓐᓄᑦ >>


ᐃᑲᔪᕐᓯᐅᑏᑦ ᐊᖓᔪᕐᖄᖑᔪᓄᑦ ᐳᕐᑐᓂᓕᒻᒥᒃ 1-ᒥ ᐱᐊᕋᓕᓐᓄᑦ

ᕿᑐᕐᙰᑦ ᓂᐱᕆᑦᑐᒥ ᐊᑐᐊᕐᓯᑎᖃᑦᑕᓗᒍ. ᐊᑐᐊᕐᓯᒋᐅᕐᓴᑎᖃᑦᑕᓗᒍ ᕿᑐᕐᙰᑦ ᐱᒋᐅᕐᓴᑎᓪᓗᒍ ᐅᓪᓗᑕᒫᑦ!

ᐊᑐᐊᕐᓯᕇᕈᒪ ᐊᑐᐊᕐᓯᓯᓪᓗᑎᓪᓗ

ᐊᑐᐊᕐᓯᑲᑦᑕᐅᑎᓗᑎᒃ ᓂᑦᔮᔪᒥ. ᐱᐊᕃᑦ ᐊᓕᐊᕆᔭᖃᓲᑦ ᐊᖓᔪᕐᖄᒥᓂᒃ ᐁᑉᐸᖃᕆᐊᒥᒃ.

ᑕᒻᒪᓂᖏᓐᓂᒃ ᐅᖃᐅᑎᖃᑦᑕᓗᒋᑦ ᕿᑐᕐᖓᓯ ᐊᑐᐊᕐᓯᓕᕐᐸᑦ

ᕿᑐᕐᙰᑦ ᑕᒻᒪᓕᑐᐊᕐᐸᑦ ᑕᑯᑎᖃᑦᑕᓗᒍ ᐊᓪᓚᕈᓯᕐᒥᒃ ᐅᖃᐅᓯᕐᒥᓘᓐᓃᑦ ᐳᐃᒍᕐᑐᕕᓂᐅᑉᐸᑦ ᑕᒻᒪᑲᓪᓚᐸᓪᓘᓃᑦ. ᐊᒥᓱᐃᑦ ᐊᑐᐊᕐᓯᒋᐅᕐᓴᑐᑦ ᓇᓚᐅᑦᓵᓲᑦ ᐅᖃᐅᓯᕐᒥᒃ ᐅᖃᕐᓱᑎᒃ ᑐᖕᖓᕕᒋᑦᓱᒍ ᐅᖃᐅᓯᐅᑉ ᓯᕗᓪᓕᐹᖓᓂᒃ ᐊᓪᓚᕈᓯᖓᓂᒃ.

ᐅᖄᓂᖅ, ᐅᖄᓂᖅ, ᐅᖄᓂᖅ!

ᐅᖄᖃᑎᒋᓗᒍ ᕿᑐᕐᙰᑦ ᐅᓪᓗᑕᒫᑦ ᐃᓪᓘᑉ ᐃᓗᐊᓂ ᐊᑑᑎᔪᓂ. ᐅᖃᐅᓯᕐᓂᒃ ᐃᓚᐅᕐᑐᐃᖃᑦᑕᓗᑎᑦ ᐊᑦᔨᐅᖏᑦᑐᓂᒃ ᐅᖄᖃᑎᒋᓗᒋᑦ, ᑌᒪ ᐅᖄᔭᑎᑦ ᐊᒥᓱᖕᖑᐸᓪᓕᐊᑎᓗᒋᑦ ᐅᖄᕈᑎᒋᖃᑦᑕᑕᕕᓂᑎᑦ ᒪᓕᑦᓱᒋᑦ.

ᐊᓪᓚᓂᖅ, ᐊᓪᓚᓂᖅ, ᐊᓪᓚᓂᖅ!

ᕿᑐᕐᙰᑦ ᐊᐱᕆᓗᒍ ᐊᓪᓚᖁᓪᓗᒍ ᓂᕿᓂᒃ ᓂᐅᕕᕐᓂᐊᕈᑎᑦᓴᐱᑦ ᐊᑎᖏᓐᓂᒃ, ᓇᑯᕐᒦᕈᑎᒥᒃ ᐊᓈᓇᑦᓯᐊᒥᓄᑦ, ᐅᕝᕙᓘᓐᓃᑦ ᐅᓪᓗᑕᒫᕐᓯᐅᑎᓂᒃ ᐊᓪᓚᓯᒪᔪᓕᐅᕐᑎᓗᒋᑦ ᐊᓂᕐᕋᐅᑉ ᐃᓗᐊᓂ ᐊᑑᑎᔪᓂᒃ.

ᐳᕐᑐᓂᓖᑦ 1-ᒥ ᐊᑐᐊᑦᓴᖏᑦ ᓇᑦᓯᖅ ᐃᒻᒪᖄ ᖃᓄᐃᑦᑑᒐᔭᕐᑐᖅ?

ᓇᓂᓯᓂᖅ ᕿᒥᕐᕈᐊᓂᒃ ᐳᕐᑐᓂᓕᓐᓄᑦ 1-ᒥᒃ ᐱᐊᕋᕐᓄᑦ >>


ᐃᑲᔪᕐᓯᐅᑏᑦ ᐊᖓᔪᕐᖄᖑᔪᓄᑦ ᐳᕐᑐᓂᓕᒻᒥᒃ 2-ᒥ ᕿᑐᕐᖓᓕᓐᓄᑦ

ᐊᑐᐊᕐᓯᒍᑎᑦᓴᓂᒃ ᐊᓪᓚᕈᑎᑦᓴᓂᒃ ᐅᓂᒃᑲᐅᓯᑦᓴᓂᓪᓗ ᕿᓂᕐᓗᓯ ᕿᑐᕐᙰᓗ ᐊᑕᐅᑦᓯᑯᑦ. ᐅᐱᒌᓐᓇᖃᑦᑕᓗᕈ ᕿᑐᕐᙰᑦ ᐊᑐᐊᕐᓯᒋᐅᕐᓴᑐᖅ ᐊᒻᒪᓗ ᐅᓂᒃᑳᑐᐊᓕᐅᕐᑎᓗᒍ!

ᐳᕐᑐᓂᓖᑦ 2-ᒥ ᐊᑐᐊᕋᑦᓴᖏᑦ ᕿᑐᕐᖓᕋᓂᒃ ᑕᑯᓚᐅᕋᑕᕐᕿᑦ? ᑎᒍᒥᐊᕋᕐᒧᑦ ᖃᕆᑕᐅᔭᒧᑦ

ᐃᓚᒥᓅᓕᖓᔪᓂᒃ ᐅᓂᒃᑲᐅᓯᓂᒃ ᐅᓂᒃᑳᕕᒋᓗᒍ

ᐱᐊᕃᑦ ᐊᓕᐊᕆᔭᓖᑦ ᐅᓂᒃᑲᐅᓯᓂᒃ ᐃᓚᒌᓘᓕᖓᔪᓂᒃ ᑐᓵᕆᐊᒥᒃ. ᐅᓂᒃᑲᐅᔨᓗᒍ ᓱᓇᑐᐃᓐᓇᒥᒃ ᐊᑑᑎᔪᕕᓂᕐᒥᒃ ᐱᐊᕋᐅᑎᓪᓗᑎᑦ.

ᐊᓪᓚᓯᒪᔪᖃᐅᑎᓕᐅᕐᓂᖅ

ᐃᑦᓯᕕᒻᒨᔦᓗᑎᑦ ᐊᓪᓚᖑᐊᕐᓯᒪᔪᓂᒃ ᐊᓪᓚᓯᒪᔪᑦᑕᓕᓐᓂᓘᓐᓃᑦ ᐊᑐᕋᑦᓴᓂᒃ. ᐊᓪᓚᕈᑎᑦᓴᖏᓐᓂᒃ ᕿᑐᕐᖓᐱᑦ ᑐᑭᑖᕋᓱᐊᕐᓗᑎᑦ ᐆᑦᑑᑎᒋᓗᒍ ᓂᕿᓂᒃ ᓂᐅᕕᕐᓂᐊᕈᑎᑦᓴᒥᒃ, ᐃᓅᓕᕐᕕᓯᐅᕐᑐᒧᑦ ᐊᓪᓚᓯᒪᔪᓕᐅᕐᑎᓗᒍ ᐅᕝᕙᓘᓐᓃᑦ ᓇᑯᕐᒦᒍᑎᓂᒃ.

ᐊᑕᐅᑦᓯᑯᑦ ᕿᒥᕐᕈᐊᓕᐅᕐᓗᑎᒃ

ᐊᓪᓚᕕᑦᓭᑦ ᒪᑉᐱᓗᒋᑦ ᕿᑎᖓᒍᑦ ᑲᑎᑎᕆᐅᑎᒧᑦ ᑲᑎᑎᓪᓗᒋᑦ ᕿᒥᕐᕈᐊᓕᐅᕐᓗᑎᒃ. ᕿᑐᕐᙰᑦ ᐊᓪᓚᓯᒪᔪᓕᐅᕐᑎᓗᒋᑦ ᒪᑉᐱᒐᕐᓂᒃ ᐊᑐᓂ ᑌᒪ ᐊᑦᔨᖑᐊᓕᐅᕐᑎᓗᒍ ᑭᖑᓂᖓᒍᑦ.

ᐅᓂᒃᑲᐅᓯᓕᐅᕐᓂᖅ

ᐃᓚᒌᑎᒍᑦ ᐅᓂᒃᑳᖑᐊᓕᐅᑲᑦᑕᐅᑎᓗᓯ ᐊᓪᓚᑲᑦᑕᐅᑎᓗᓯ ᒪᙯᓐᓂᒨᓕᖓᔪᒥᒃ ᐅᕝᕙᓘᓐᓃᑦ ᐱᓱᓐᓂᕕᓂᐅᔪᒥᒃ. ᐃᔪᕐᓇᑑᑎᒐᓱᐊᕐᓗᒍ, ᐃᕐᓯᓇᕐᑎᒐᓱᐊᕐᓗᒍ ᐅᕝᕙᓘᓐᓃᑦ “ᑲᔪᓯᔪᖅ”-ᓚᔪᕐᑕᓯᓗᒍ ᑭᖑᓂᐊᒍᑦ ᒪᙯᓐᓂᕕᓂᑦᓯᑦᑕ ᐅᕝᕙᓘᓐᓃᑦ ᐱᓱᓐᓂᕕᓂᓯᑦᑕ ᑲᔪᓯᒍᑎᑦᓴᖓᓄᑦ.

ᓇᓂᓯᓂᖅ ᕿᒥᕐᕈᐊᓂᒃ ᐳᕐᑐᓂᓕᓐᓄᑦ 2-ᒥᒃ ᐱᐊᕋᕐᓄᑦ >>


ᐃᑲᔪᕐᓯᐅᑏᑦ ᐊᖓᔪᕐᖄᖑᔪᓄᑦ ᐳᕐᑐᓂᓕᓐᓂᒃ 3-ᒥ ᕿᑐᕐᖓᓕᓐᓄᑦ

ᐊᑐᐊᕐᓗᒍ, ᐅᖄᒍᑎᒋᓗᒍ, ᐃᓱᒪᒋᓗᒍᓗ! ᕿᑐᕐᖓᐱᑦ ᑐᑭᓯᓕᐅᒥᒍᑎᑦᓴᖏᓐᓂᒃ ᕿᓂᕐᓗᑎᑦ, ᑐᕌᒍᑎᑦᓴᓚᕆᐅᔪᒥᒃ ᐊᑐᐊᕐᓯᒋᐅᕐᓴᓂᕐᒧᑦ ᐱᒻᒪᕆᐅᔪᒥᒃ.

ᐅᖄᒍᑎᒋᓗᒋᑦ ᑕᑯᔭᓯ ᐊᑑᑎᔭᓯᓪᓗ

ᐅᖄᒍᑎᒋᓗᒋᑦ ᐅᓪᓗᑕᒫᑦ ᓱᖃᑦᓯᐅᑎᓯ ᕿᑐᕐᙰᑦ ᖃᐅᔨᒻᒪᓕᐅᒥᖁᓪᓗᒍ, ᑕᒪᓐᓇ ᐱᒻᒪᕆᐅᑦᓱᓂᓪᓗ ᓈᓚᒋᐅᕐᓴᐅᑎᐅᑦᓱᓂ ᐊᑐᐊᕐᓯᒋᐅᕐᓴᐅᑎᓪᓚᕆᐅᑦᓱᓂᓗ. ᐅᖄᕕᒌᓐᓇᖃᑦᑕᓗᒍ, ᐆᑦᑑᑎᒋᓗᒍ, ᐃᒐᖃᑎᒌᓪᓗᑎᒃ, ᐁᕕᒋᓚᐅᕐᓯᒪᖕᖏᑕᓯᓄᑦ ᐁᓗᓯ, ᐅᕝᕙᓘᓐᓃᑦ ᑕᕐᕋᓕᔮᕇᕈᑦᓯ.

ᕿᑐᕐᙰᑦ ᐃᓕᓐᓂᐊᑎᓗᒍ “ᐃᓱᒪᒧᑦ ᐅᑉᐱᓵᕆᐅᑎᓂᒃ”

ᕿᑐᕐᙰᑦ ᑕᑯᑎᓗᒍ ᓀᓪᓕᑎᕐᓯᒪᔪᓂᒃ ᐅᓂᒃᑲᐅᓯᒥᒃ ᐅᕝᕙᓘᓐᓃᑦ ᐃᓱᒪᑦᓴᓯᐅᕐᑎᓗᒍ ᖃᓄᐃᓘᓚᖓᒻᒪᖔᑦ ᑭᖑᓂᐊᒍᑦ. ᑕᒪᒋᑦ ᐊᑐᕐᑕᐅᒍᓰᒃ ᐱᐊᕋᕐᒥᒃ ᐃᑲᔪᕐᓯᓲᑦ ᑐᑭᓯᓕᐅᒥᑎᑦᓯᓂᕐᒥᒃ ᐊᐅᓚᔨᒋᐅᕐᓴᓂᕐᒥᓗ.

ᐊᑦᔨᒌᖕᖏᑐᓂᒃ ᐊᓪᓚᓂᖅ

ᐊᑦᔨᒌᖕᖏᑐᓂᒃ ᕿᒥᕐᕈᐊᓂᒃ ᐊᑐᐊᕐᓯᓗᑎᑦ ᕿᑐᕐᙰᑦ ᐊᑦᔨᐅᖏᑦᑐᓂᒃ ᑕᑯᖁᓪᓗᒍ ᐊᓪᓚᕈᓯᕐᓂᒃ. ᐃᓚᖏᑦ ᐱᐊᕃᑦ ᐱᓗᐊᕐᑐᒥ ᓱᕈᓰᑦ ᓱᓕᔪᓂᒃ ᐊᓕᐊᒋᔭᓖᑦ ᕿᒥᕐᕈᐊᓂᒃ.

ᐳᕐᑐᓂᓖᑦ 3-ᒥ ᐊᑐᐊᕋᑦᓴᖏᑦ ᓇᓄᐊᓗᐃᑦ ᐃᓕᒪᓇᕐᑐᑦ

ᓇᓂᓯᓂᖅ ᕿᒥᕐᕈᐊᓂᒃ ᐳᕐᑐᓂᓕᓐᓄᑦ 3-ᒥᒃ ᐱᐊᕋᕐᓄᑦ >>


ᐃᑲᔪᕐᓯᐅᑏᑦ ᐊᖓᔪᕐᖄᖑᔪᓄᑦ ᐃᓅᓱᑦᑐᓄᑦ

ᐃᓅᓱᑦᑐᖁᑏᑦ ᑕᑯᑎᓗᒍ ᐃᑦᔭᒐᑦᓴᓯᐊᖑᑎᓪᓗᑎᑦ ᐊᑐᐊᕐᓯᑎᓪᓗᑎᑦ ᐊᒻᒪᓗ ᓱᖃᑦᓯᓂᑕᒫᑦ ᐆᑦᑑᑎᒋᓗᒍ ᕿᒥᕐᕈᑎᓪᓗᑎᑦ ᐊᑐᐊᒑᕈᕐᓂᒃ, ᐃᒐᕈᓯᕐᓂᒃ, ᒪᓕᒐᕐᓂᒃ, ᑐᓴᕋᑦᓴᓂᒃ, ᕿᒥᕐᕈᐊᒐᕐᓂᒃ, ᐊᓪᓚᖁᑎᓂᒃ ᐊᒻᒪᓗ ᖃᕆᑕᐅᔭᒃᑯᑦ ᐊᓪᓚᑖᑎᓐᓂᒃ. 

ᐃᓅᓱᑦᑐᐃᑦ ᐊᑐᐊᕋᑦᓴᖏᑦ ᓵᓕᐅᑉ ᐅᓂᒃᑳᑐᐊᖓ ᖃᕆᑕᐅᔭᒃᑯᑦ

ᐃᓚᒌᑎᒍᑦ ᐊᓕᐊᓱᐊᓂᖅ

ᕿᑐᕐᖓᖃᕈᑦᓯ ᓄᑲᕐᓯᓂᒃ ᐅᕝᕙᓘᓐᓃᑦ ᐊᖓᔪᕐᓯᓂᒃ ᐊᑐᐊᕐᓯᖃᔭᖕᖏᑐᓂᒃ, ᐃᓅᓱᑦᑐᖁᑎᑎᑦ ᐊᑐᐊᕐᓯᑎᖃᑦᑕᓗᒍ ᓂᐱᕆᑦᑐᒥᒃ. ᑭᓇᓕᒫᒃᑯᑦ ᐊᓕᐊᒋᔭᖃᓚᖓᔪᐃᑦ!

ᐊᑐᐊᕐᓯᒍᒪᓂᖃᖕᖏᓚᕆᑦᑑᖅ?

ᐃᓚᖓᓂ, ᐃᓅᓱᑦᑐᐃᑦ ᐊᑐᐊᕐᓯᒍᒪᓂᖃᖕᖏᓚᕆᑦᑐᑦ. ᐃᒻᒪᖄ ᐱᖃᑎᒥᓃᒍᒪᓂᕐᓭᑦ ᓱᖃᑦᓯᓂᕐᒥᓗ ᐱᒍᒪᓂᕐᓴᐅᓱᑎᒃ. ᑕᒪᓐᓇ ᖃᓄᐃᖕᖏᑐᖅ. ᐅᑕᕐᕿᓯᐊᑐᐃᓐᓇᓗᑎᑦ, ᐊᒻᒪᓗ ᐊᑐᐊᕋᑦᓴᓂᒃ ᐊᑐᐃᓐᓇᐅᑎᑦᓯᑐᐃᓐᓇᓗᑎᑦ ᐊᓂᕐᕋᒥ. ᐊᑐᐊᕐᓯᓛᕐᑐᑦ ᐊᑐᐃᓐᓇᐅᓕᕈᑎᒃ!

ᐊᑐᐊᕐᓯᓂᖅ ᑕᒪᒋᓐᓂᒃ ᐅᖄᕈᓯᕐᓂᒃ

ᖃᓄᐃᖕᖏᑐᖅ ᕿᑐᕐᙰᑦ ᐅᖄᒍᓯᕐᒥᓂᒃ ᐊᑐᐊᕐᓯᒍᑎᒃ, ᑐᖓᓕᐊᓂᒃ ᐅᕝᕙᓘᓐᓃᑦ ᑕᒪᒋᓐᓂᒃ! ᐃᓅᓱᑦᑐᖁᑏᑦ ᐃᓄᑦᑎᑑᕐᑐᓂᒃ ᐊᑐᐊᕐᓯᒋᐊᒥᒃ ᐊᓕᐊᒋᔭᖃᕐᓂᓴᐅᑉᐸᑦ, ᑌᒫᒃ ᐅᖃᐅᓯᕐᒥᓂᒃ ᐃᑲᔪᕐᓯᓚᖓᔪᖅ ᑎᒍᒥᐊᓂᕐᓴᐅᓗᓂ ᐊᒻᒪᓗ ᐱᒋᐅᕐᓴᓂᕐᓴᐅᖃᑦᑕᓗᓂ, ᑌᒫᒃ ᐃᑲᔪᕐᓯᓚᖓᒻᒥᓱᓂ ᖃᓪᓗᓈᑎᑑᕐᑐᓂᒃ ᐊᑐᐊᕐᓯᒋᐅᕐᓴᓂᕐᒥᒃ.

ᓇᓂᓯᓂᖅ ᕿᒥᕐᕈᐊᓂᒃ ᐃᓅᓱᑦᑐᓄᑦ>>


ᖃᐅᔨᒋᐊᕐᕕᓭᑦ

Reading Rockets (n. d.). Reading tips. Document available at https://www.colorincolorado.org/families.

ᐊᐱᕐᓲᑎᑦᓴᖃᕈᕕᑦ ᐅᖃᐅᓯᑦᓴᖃᕈᕕᓪᓘᓃᑦ, ᖃᐅᔨᓴᕐᕕᒋᑎᒍ.

ᖃᐅᔨᓴᕐᕕᒋᑎᒍ