“ᐃᓄᐃᑦ ᐱᐊᕃᑦ ᐊᒥᓱᕕᑦᑕᓂᕐᐹᖑᖃᑕᐅᕗᑦ ᓯᓚᕐᔪᐊᓕᒫᒥ ᑐᓯᓚᑦᑐᓂ, ᐱᓗᐊᕐᑐᒥᒃ ᓯᐅᑎᐅᑉ ᕿᑎᖓᑕ ᐋᓐᓂᐊᖃᕐᐸᓂᖓ ᐱᑦᔪᑕᐅᑎᓪᓕᒍ”
(ᐅᕃᓪ ᐱᐅᓃᒃ, 2023)
ᑲᑎᕕᒃ ᐃᓕᓴᕐᓂᓕᕆᓂᕐᒥ, ᐃᓕᓐᓂᐊᕕᓐᓂ ᑲᒪᒍᑎᓂᒃ ᐊᑐᕐᑎᓯᕗᒍᑦ ᓱᕐᖁᐃᕈᑕᐅᓚᖓᔪᓂᒃ ᐱᐊᕃᑦ ᑐᓯᓚᑦᑐᑦ ᑐᓵᑦᓯᐊᓂᖓᓂᒃ.
ᑕᒪᓐᓇ ᐱᑦᔪᑎᒋᑦᓱᒍ ᐃᓕᓐᓂᐊᑎᑦᓯᕕᑦᑕ ᐊᒥᓲᓂᕐᓴᖏᑦ ᐃᓱᐊᖁᑎᖃᕐᖁᑦ ᖃᓂᖕᖒᑎᓂᒃ. ᑖᒃᑯᓇᓂ ᐊᑐᐊᒐᕐᓂ, ᖃᐅᔨᓚᖓᔪᓯ ᐊᑐᕐᑐᐹᓗᓐᓂᒃ ᖃᐅᔨᒪᔭᑦᓴᓂᒃ ᐊᑐᕆᐊᓕᓯᓐᓂᒃ ᑖᓐᓇ ᐃᓱᐊᖁᑎ ᐊᑐᑦᓯᐊᓚᖓᓗᒍ.
ᑲᑎᕕᒃ ᐃᓕᓴᕐᓂᓕᕆᓂᕐᒥ, ᐃᓕᓐᓂᐊᕕᓐᓂ ᑲᒪᒍᑎᓂᒃ ᐊᑐᕐᑎᓯᕗᒍᑦ ᓱᕐᖁᐃᕈᑕᐅᓚᖓᔪᓂᒃ ᐱᐊᕃᑦ ᑐᓯᓚᑦᑐᑦ ᑐᓵᑦᓯᐊᓂᖓᓂᒃ.
ᖃᓂᖕᖒᑏᑦ ᓱᓇᐅᒻᒪᑕ?
ᖃᓂᖕᖒᑎ ᐱᓇᓲᑎᐅᕗᖅ ᓂᐱᕆᑦᓯᑎᑦᓯᓱᓂ ᐃᓕᓐᓂᐊᑎᑦᓯᔨᐅᑉ ᓂᐱᖓᓂᒃ ᐊᒻᒪᓗ ᓂᐱᒥᒃ ᓯᐊᒻᒪᑎᑦᓯᓱᓂ ᐃᓕᓐᓂᐊᑎᑦᓯᕕᐅᑉ ᐃᓗᓕᒫᖓᓄᑦ, ᐃᓕᓐᓂᐊᑎᓕᒫᑦ ᑐᓵᒍᓐᓇᓯᔫᒥᑎᑦᓱᒋᑦ ᑐᑭᓯᒍᓐᓇᓯᔫᒥᑎᑦᓱᒋᓪᓗ ᐃᓕᓐᓂᐊᑎᑦᓯᒍᑎᒥᒃ. ᑕᖏᖃᕐᑎᑕᐅᔪᖅ ᐅᖄᕕᒻᒧᑦ ᐃᓕᓐᓂᐊᑎᑦᓯᔨᐅᑉ ᐊᑐᕐᑕᖓᓄᑦ ᐊᒻᒪᓗ ᓂᐱᖃᐅᑎᓄᑦ ᐃᓂᓪᓚᓯᒪᑦᓯᐊᑐᓄᑦ ᐃᓕᓐᓂᐊᑎᑦᓯᕕᐅᑉ ᐃᓗᐊᓂ.
ᐃᑲᔪᕈᓐᓇᑐᑦ ᐃᓕᓐᓂᐊᑎᓕᒫᓂᒃ! ᓱᓕᕗᖅ, ᑖᑦᓱᒥᖓ ᓴᓇᕐᕈᑎᒥᒃ ᐊᑐᕈᕕᑦ ᑐᓵᑦᓯᐊᓂᕐᓴᒪᕆᐅᓚᖓᔪᑦ. ᖃᐅᑕᒫᑦ ᐊᑐᖃᑦᑕᓯᒍᕕᐅᒃ, ᐃᓕᓐᓂᐊᑎᑎᓐᓄᑦ ᑐᑦᓯᕌᖑᖃᑦᑕᓛᕐᑐᖅ ᐳᐃᒍᑦᓴᓂᐊᕈᕕᑦ.
ᐅᕙᓂ, ᑕᑯᓯᔪᓯ ᐱᑕᖃᓕᕐᑐᓂᒃ ᖃᓂᖕᖒᑎᓂᒃ ᐃᓕᓐᓂᐊᕕᓯᓐᓂ ᑕᑯᑐᐃᓐᓇᕆᐊᓕᓯᓐᓂᒃ.
Roger Dynamic ᖃᓂᖕᖒᑎ
ᓄᑖᖑᓂᕐᐸᐅᖃᑕᐅᔪᑦ ᓂᐅᕕᐊᖑᓯᒪᔪᓂ ᐃᓕᓴᕐᓂᓕᕆᔨᒃᑯᓄᑦ ᐊᒻᒪᓗ ᓅᒍᓐᓇᓱᑎᒃ ᖃᓂᖕᖒᑎᑕᖏᑦ. ᑖᓐᓇ Roger Dynamic ᖃᓂᖕᖒᑎ ᐋᕐᕿᓱᕆᐊᖓ ᐊᑐᕆᐊᖓᓗ ᓇᓗᓇᓲᖑᖕᖏᑐᖅ.
ᐃᓕᓐᓂᐊᑎᓄᑦ ᐱᕙᓪᓕᓇᕈᑎᖏᑦ
ᖃᓂᖕᖒᑏᑦ ᐱᕙᓪᓕᕈᑕᐅᕗᑦ ᐱᐊᕋᕐᓄᑦ ᑐᓯᓚᑦᑐᓄᑦ ᑭᓯᐊᓂᐅᒐᓛᖕᖏᑐᖅ, ᐃᓕᓐᓂᐊᑎᓕᒫᓄᑦ ᐱᕙᓪᓕᕈᑕᐅᒻᒪᑕ.
- ᐱᐅᓯᐅᒥᔪᖅ ᐅᖄᔭᐅᔪᓂᒃ ᐃᓕᑕᕐᓯᒍᓐᓇᓂᖓᑦ
- ᐱᓕᐅᒥᔪᑦ ᐃᓕᓐᓂᐊᑎᐅᑉ ᓈᓚᓐᓂᖓ, ᑲᒪᖃᑕᐅᓂᖓ ᐊᒻᒪᓗ ᐃᓚᐅᖃᑕᐅᓂᖓ
- ᓱᑲᓐᓂᓴᒥᒃ ᑎᒍᓯᔪᑦ ᐊᓪᓚᓂᐊᕐᓂᒥᒃ, ᐊᓪᓚᓂᕐᒥᒃ ᐊᒻᒪᓗ ᑭᓯᒍᑎᑎᒍᑦ ᐱᔪᓐᓇᕈᑎᓂᒃ
- ᑐᑭᓯᓂᐊᕐᓂᖅ ᐅᑲᐅᓯᕐᒥᒃ ᐊᔪᕐᓇᖏᓐᓂᓴᖅ ᓯᕗᓪᓕᐹᓂ ᐃᓕᑦᓯᕙᓪᓕᐊᓂᐅᑉ ᐊᕐᕌᒍᖏᓐᓂ
- ᑐᑭᓯᒪᑦᓯᐊᓂᕐᓴᐅᑎᑦᓯᔪᖅ ᐃᓕᓐᓂᐊᑎᑦᓯᔨᒥᒃ ᐊᒻᒪᓗ ᐃᑲᔪᕐᓯᒋᐊᓪᓚᓱᓂ ᐃᓕᓐᓂᐊᑏᑦ ᐱᓂᖓᓂᒃ ᐅᖃᐅᓯᐅᑉ ᑐᖓᓕᐊᓂᒃ ᐱᖓᔪᐊᓐᓂᓘᓐᓃᑦ.
ᓄᑲᕐᓯᐊᐲᑦ ᓈᓚᑦᑐᑦ ᐅᖃᕐᑕᐅᖏᓗᐊᕐᑐᓂᒃ ᖃᐅᔨᒪᒍᓐᓇᖏᓪᓚᑦ.
ᖃᐅᔨᒍᓐᓇᒥᔪᑦ ᐊᑦᓱᕈᕐᓇᓂᕐᓴᐅᒋᐊᖓ ᓈᓚᑦᓯᐊᕋᓱᒋᐊᒥᒃ ᐃᓕᓐᓂᐊᑎᑦᓯᔨᒥᒃ ᑐᓵᑦᓯᐊᓗᒍ ᑐᓵᒍᓐᓇᖏᑐᐊᕈᑎᒃ. ᖃᓂᖕᖒᑏᑦ ᐃᑲᔪᕈᓐᓇᑐᑦ ᒪᑭᑕᑦᓯᒍᑕᐅᓗᑎᒃ ᓈᓚᓐᓂᖓᓂᒃ ᐊᒻᒪᓗ ᐃᓚᐅᖕᖑᓱᐊᓂᖓᓂᒃ ᐃᓕᓐᓂᐊᑎᑕᐅᒍᑎᓂᒃ ᐊᑐᕐᓂᒥᓂ.
ᐃᓚᐅᑎᑦᓯᓗᑎᑦ ᑐᓵᓂᒃᑯᑦ ᐃᓕᑦᓯᒍᑎᓂᒃ ᑕᑯᓐᓇᓂᒃᑯᑦ ᐃᓕᑦᓯᒍᑎᓄᑦ ᓲᖑᓯᒋᐊᕈᑕᐅᑎᓪᓗᒍ ᐃᓗᓕᕐᒧᑦ. ᐊᑐᖃᑦᑕᓗᑎᑦ ᐊᑦᔨᖑᐊᓂᒃ, ᐊᓪᓚᖑᐊᕐᓯᒪᔪᓂᒃ, ᑕᑯᓐᓇᕋᑦᓴᓂᒃ ᐊᓯᖏᓐᓂᓗ ᑕᑯᓐᓈᓂᕐᒥᒃ ᐊᑐᕐᑐᓂᒃ ᐱᐅᓯᒋᐊᕈᑕᐅᑎᓪᓗᒋᑦ ᑐᑭᓯᓂᖓᓄᑦ ᐃᓕᓐᓂᐊᑎᓕᒫᑦ, ᖃᓗᓗᒋᑦ ᑌᒃᑯᐊ ᐊᑦᔨᐅᖏᑦᑐᓂᒃ ᐃᓕᑦᓯᒍᓯᓖᑦ.
ᐃᓄᐃᑦ ᐃᓕᓐᓂᐊᑐᑦ ᐱᐅᓯᖏᑦᑕ ᐃᓚᖓᑦ ᐃᓕᖓᕗᖅ ᐃᓕᑦᓯᓲᖑᓂᖓᓄᑦ ᐱᓗᐊᕐᑐᒥᒃ ᑕᐅᑐᓂᒃᑯᑦ ᐊᒻᒪᓗ ᑕᑯᓐᓇᐅᒐᕐᓂᑯᑦ. ᑌᒫᓪᓚᕆᒃ ᐃᓕᓐᓂᒃ ᐊᑐᖁᔨᕗᒍᑦ ᑕᑯᓐᓇᓂᒃᑯᑦ ᐃᑲᔪᕐᓯᒍᑎᓂᒃ ᐃᓚᒋᔭᐅᑎᓪᓗᒋᑦ ᖃᓂᖕᖒᑎᓄᑦ.
ᐃᑲᔪᕐᑕᐅᒋᐊᖃᕐᖀᑦ ᐊᑐᕐᓂᐊᕋᕕᑦ ᖃᓂᖕᖒᑎᓯᓐᓂᒃ?
ᖃᐅᔨᒪᔭᑦᓭᑦ ᐃᓕᓐᓂᐊᑎᑦᓯᕕᓯᓐᓂ ᖃᓂᖕᖒᑏᑦ ᒥᑦᓵᓄᑦ ᐱᔭᑦᓴᐅᕗᑦ ᑐᓵᔪᐃᑦ ᖃᕆᑕᐅᔭᒃᑯᑦ ᐱᑐᕝᕕᖓᓂ ᐱᒋᐅᕐᓴᐅᑏᑦ ᐊᒻᒪᓗ ᐃᓕᓐᓂᐊᑎᑦᓯᒍᑏᑦ ᐊᑖᓂ. ᐃᑲᔪᕐᑕᐅᓂᕐᒥᒃ ᑐᑦᓯᕋᕈᓐᓇᒥᔪᓯ ᐱᔪᒪᓗᓯᓘᓐᓃᑦ ᖃᐅᔨᒪᔭᑦᓴᒋᐊᓪᓚᓂᒃ ᓄᓇᓕᓯ ᐃᓱᐊᖁᑎᓄᑦ ᐱᒍᑦᔨᐅᑎᓂᒃ ᐱᓇᓱᑦᑎᖏᓐᓄᑦ ᐃᓚᐅᔪᓂᒃ. ᐃᓕᓐᓂᐊᕕᓯ ᓇᓗᓀᕐᓯᒌᕐᓯᒪᑐᐃᓐᓇᕆᐊᓕᒃ ᐃᑲᔪᕐᑎᓴᒥᒃ ᐃᓄᒻᒥᒃ ᖃᓂᖕᖒᑎᓂᒃ ᑲᒪᒍᓐᓇᑐᒥᒃ.
ᑐᓵᔪᐃᑦ ᐃᓕᓐᓂᐊᑎᑦᓯᕖᑦ (ᐱᑐᒍᑎᖓ ᖁᓪᓕᖅ ᐊᑦᑐᓗᒍ)
ᒪᑭᑕᑦᓯᓂᖅ
ᑐᓵᒍᑎᓕᕆᔨ ᐊᑐᐃᓐᓇᕈᖃᑦᑕᕆᐊᓛᕈᓇᐅᔪᖅ ᒪᕐᕈᕕᓪᓗᓂ ᐊᕐᕌᒍᑕᒫᑦ ᓄᓇᓕᓐᓂ ᐊᒥᓲᓂᕐᓴᓂ ᐃᓕᓐᓂᐊᓇᐅᑉ ᐊᕐᕌᒍᖓᑕ ᐃᓗᐊᓂ ᑲᔪᓯᔪᒥᒃ ᒪᑭᑕᑦᓯᔨᐅᓗᓂ ᐃᑲᔪᕐᑎᐅᓗᓂᓗ.
ᐊᑐᕐᑐᐹᓗᐃᑦ ᐃᓱᒪᒋᔭᑦᓭᑦ ᓄᐃᓯᒻᒥᔪᑦ!
ᐃᑲᔪᕐᑕᐅᒍᒪᒍᓐᓇᒥᔪᓯ ᐃᓄᒻᒧᑦ ᓇᓗᓀᕐᑕᐅᓯᒪᔪᒧᑦ ᐃᓕᓐᓂᐊᕕᓯᓐᓂ ᐅᖃᕐᓗᓯᓘᓐᓃᑦ CC-ᑯᑦ ᐱᓇᓱᑦᑎᖏᓐᓄᑦ ᑌᒣᓪᓗᓯ ᑭᓯᐊᓂᓪᓚᕆᐅᑐᐊᕐᐸᑦ.
ᐃᓕᓐᓂᐊᑎᑦᓯᔩᑦ ᐃᓚᐅᓯᓂᖓᑦ
ᑕᒪᓐᓇ ᐱᒻᒪᕆᐅᓂᕐᐹᖅ ᐱᑕᖃᕆᐊᓕᓕᒫᓂ!
ᐃᑲᔪᕐᑐᓂᓯ ᐊᑐᕐᓂᐸᐅᑦᓱᓂ ᐃᓚᒋᔭᐅᕗᖅ ᓱᕐᖁᐃᓂᕐᒧᑦ ᐃᓕᓐᓂᐊᑎᓕᒫᑦᑕ ᐱᑎᑕᐅᓂᖓᓂᒃ ᐃᓕᓐᓂᐊᑎᑦᓯᕕᒻᒥ ᐊᕙᑎᒥᒃ ᐃᓱᐊᕐᓂᐹᒥᒃ ᐃᓕᑦᓯᓂᕐᒧᑦ.
ᖃᖓ ᐊᑐᖃᑦᑕᑐᕐᓴᐅᕗᖓ ᖃᓂᖕᖒᑎᒃᑲᓂᒃ?
- ᐱᓇᓱᒋᐊᓕᒻᒥᒃ ᑐᑭᓯᑎᑦᓯᒍᑎᓂᒃ ᐅᖄᓕᕈᕕᑦ.
- ᐃᓕᓐᓂᐊᑎᓕᒫᓂᒃ ᐅᖃᐅᑦᔪᓗᒋᑦ ᐃᓕᓐᓂᐊᑎᑦᓯᓕᕈᕕᑦ.
- ᐅᓂᒃᑳᑐᐊᓂᒃ ᐊᓪᓚᓂᐊᓕᕈᕕᑦ.
- ᖃᓂᖕᖒᑎᒧᑦ ᐅᖄᒍᑎᒥᒃ ᐃᓕᓐᓂᐊᑎᓄᑦ ᐁᑦᑐᐃᖃᑦᑕᕈᓐᓇᑐᑎᑦ ᐅᖄᓕᕐᐸᑕ ᓱᓚᐅᕐᓂᒥᓂᒃ ᐱᓇᓱᐊᕈᓯᐅᑉ ᐃᓱᐊᓂ, ᐅᕝᕙᓗᓘᓐᓃᑦ ᐅᖄᓗᑎᒃ ᑐᑭᓯᑎᑦᓯᒋᐊᓕᕐᐸᑕ, ᑌᒫᒐᓚᒃ.
ᖃᖓ ᖃᒥᖃᑦᑕᑐᑦᓴᐅᕙ?
- ᐅᖄᓕᕈᕕᑦ ᓱᓇᒐᓚᒻᒥᒃ ᐱᓇᓱᑦᑎᐅᖃᑎᓐᓅᕕᑦ.
- ᐃᓕᓐᓂᐊᑏᑦ ᑲᒪᓕᕐᐸᑕ ᐊᒡᒐᒨᕆᐊᖃᕐᓂᓴᓂᒃ ᐊᒻᒪᓗ ᐃᑲᔪᕐᑎᑐᐃᓐᓇᑎᑐᑦ ᐱᓇᓱᓕᕈᕕᑦ.
- ᐳᐃᒍᕐᑌᓕᖃᑦᑕᓗᒍ ᖃᒥᒋᐊᖓ ᐅᓪᓘᑉ ᐃᓱᐊᓂ.
ᐃᓱᒪᒋᔭᑦᓭᑦ ᐊᑐᓕᕈᑦᓯ ᖃᓂᖕᖒᑎᓯᓐᓂᒃ
ᐃᓱᒪᑖᕈᑎ 1
ᓱᖏᐅᓐᓂᕈᕐᖄᓗᓯ ᖃᓂᖕᖒᑎᓄᑦ: ᖃᓂᖕᖒᑎᒥᓂᒃ ᐊᑐᖕᖏᓂᓯᓐᓂ ᐃᓕᓐᓂᐊᑎᑦᓯᕕᒻᒥ, ᐃᓕᑦᓯᖄᕐᓗᓯ ᖃᓄᖅ ᐊᑐᕐᑕᐅᓲᖑᒻᒪᖔᑕ ᐱᑦᓯᐊᓗᓂ. ᐊᑐᕆᐅᕐᓴᓗᓯ ᐅᖄᕕᖓᓂᒃ ᐊᒻᒪᓗ ᐋᕐᕿᓱᐃᓂᕐᒥᒃ ᓂᐱᕆᓐᓂᖓᓂᒃ ᖃᐅᔨᓚᖓᓗᒍ ᐱᐅᓂᕐᐹᖅ ᐋᕐᕿᓯᒪᐅᑎᒋᓗᒍ ᐃᓕᓐᓂᐊᑎᑦᓯᕕᓯ ᐃᓗᐊᓂ.
ᐊᑐᕆᐅᕐᓴᖃᑎᖃᕐᓗᓯ ᐱᓇᓱᑦᑎᐅᖃᑎᓯᓐᓂᒃ; ᐃᓕᓐᓂᐊᑎᑦᓯᔩᑦ ᐊᓯᓯᑦ ᐃᓕᓐᓂᐊᕕᓯᓐᓂ ᖃᓂᖕᖒᑎᒥᓂᒃ ᐊᑐᓲᖑᑉᐸᑕ, ᐃᓱᒪᓗᓯ ᐱᒋᐅᕐᓴᖃᑎᖃᕐᑐᓴᐅᓂᕐᒥᒃ ᑌᒃᑯᓂᖓ ᐅᕝᕙᓗᓘᓐᓃᑦ ᐁᒃᑐᑑᑎᖃᑎᒋᓗᒋᑦ ᐃᓱᒪᑖᕈᑎᓂᒃ ᐊᒻᒪᓗ ᖃᐅᔨᔭᓯᓐᓂᒃ. ᐃᑲᔪᕐᑎᒌᓐᓂᖅ ᑐᕌᕈᑕᐅᒍᓐᓇᐳᖅ ᐊᑐᕐᑐᒪᕆᐊᓗᓐᓂᒃ ᑐᑭᓯᒍᑎᖃᕐᓂᒧᑦ ᐊᒻᒪᓗ ᐱᐅᑎᓯᕆᓗᒋᑦ ᐱᐅᓂᕐᐹᓄᑦ.
ᐃᓱᒪᑖᕈᑎ 2
ᐅᖃᓕᒪᕕᖓ ᐃᓂᑦᓯᐊᒧᑦ ᐋᕐᕿᓗᒍ: ᐊᑐᖃᑦᑕᓗᒍ ᐅᖃᓕᒪᕕᒃ ᑌᑲᓂᑦᓭᓇᖅ ᐃᓂᖃᕐᑎᖏᓐᓇᓗᒍ, ᖃᓂᕐᓄᑦ ᖃᓂᑦᑑᒍᓂ ᐱᐅᓂᕐᓴᖅ ᑭᓯᐊᓂ ᓯᕗᕋᓪᓗᐊᖓᓂᐅᖕᖏᑐᖅ. ᑌᒣᓕᖓᑎᑦᓱᒍ ᓱᕐᖁᐃᑎᑦᓯᔪᖅ ᓂᐲᑦ ᑐᑭᓯᑦᓴᓯᐊᖑᓗᓂ ᑐᓴᕐᑕᐅᓚᖓᒋᐊᖓ ᑭᓪᓕᖃᑦᓯᐊᖏᑦᑐᓂᒃ ᐅᕝᕙᓗᓘᓐᓃᑦ ᐊᓯᑦᔨᓯᒪᔪᓂᒃ ᓱᕐᕙᓗᓕᐅᕈᓐᓀᓗᓂ.
ᐃᓱᒪᑖᕈᑎ 3
ᐅᖄᑦᓯᐊᑐᐃᓐᓇᓗᓯ: ᖃᓂᖕᖒᑏᑦ ᓴᓇᒪᕗᑦ ᓂᐱᓯᓐᓂᒃ ᓂᐸᕆᑦᑑᑎᑦᓯᓱᑎᒃ, ᑌᒣᒻᒪᓗ ᙯᒐᓕᒋᐊᖃᑦᔭᖏᓪᓚᓯ ᐅᕝᕙᓗᓘᓐᓃᑦ ᓂᐱᒥᓐᓄᑦ ᐊᑦᓱᕈᒋᐊᖃᑦᔭᖏᓪᓚᓯ. ᐱᐅᓯᓯᓐᓂᒃ ᓂᐱᖃᑐᐃᓐᓇᓗᓯ ᓱᑲᓐᓂᕆᓲᓯᓐᓂᓗ ᑖᒃᑯᐊ ᖃᓂᖕᖒᑏᑦ ᐊᓯᓕᒫᖓᓂᒃ ᐋᕐᕿᓱᐃᒻᒪᑕ.
ᐃᓱᒪᑖᕈᑎ 4
ᐃᓕᓐᓂᐊᑏᑦ ᐃᓚᐅᖁᖃᑦᑕᓗᒋᑦ: ᐃᓕᓐᓂᐊᑎᓯ ᐃᕐᙯᑎᖃᑦᑕᓗᒋᑦ ᖃᓂᖕᖒᑎᐅᑉ ᒥᑦᓵᓄᑦ ᖃᓄᕐᓗ ᐱᕙᓪᓕᓇᕐᓂᖓᓂᒃ. ᑲᔪᖏᕐᓴᓗᒋᑦ ᐊᐱᕐᓱᕈᒪᑉᐸᑕ ᐃᓚᐅᖁᓗᒋᓪᓗ ᐅᖃᐅᑦᔫᑎᒍᑎᓄᑦ. ᑕᒪᓐᓇ ᐱᐅᓯᑎᑦᓯᑐᐃᓐᓇᔭᖏᑦᑐᖅ ᐃᓚᐅᖕᖑᓱᐊᓂᖓᓂᒃ ᐱᕕᑖᕈᑎᒋᓚᖓᒻᒥᒐᕕᐅᒃ ᑕᑯᓇᓱᓐᓂᒥᒃ ᖃᓂᖕᖒᑏᑦ ᐊᑐᑦᓯᐊᒻᒪᖔᑕ ᐃᓘᓐᓀᓄᑦ.
ᐃᓕᓐᓂᐊᑏᑦ ᐅᖃᐅᓯᑦᓴᒥᓂᒃ ᐅᖃᖁᓗᒋᑦ: ᐃᓕᓐᓂᐊᑏᑦ ᐊᐱᕆᓗᒋᑦ ᐃᓕᓐᓂᒃ ᑐᓵᑦᓯᐊᒪᖔᑕ ᐊᒻᒪᓗ ᖃᓂᖕᖒᑎᓄᑦ ᐃᑲᔪᕐᑕᐅᒪᖔᑕ. ᖃᓄᐃᓕᒍᑎᖏᑦ ᐃᓱᐊᖁᑎᒋᒍᓐᓇᑕᑎᑦ ᐋᕐᕿᓯᐊᕐᑎᓯᓗᑎᑦ ᓂᐱᖃᕈᑏᑦ ᐋᕐᕿᓯᒪᓂᖏᓐᓂᒃ ᓇᓗᓀᕐᓯᓗᑎᓪᓗ ᖃᓄᒐᓚᒃ ᐃᓱᐃᓪᓕᖓᑐᐃᓐᓇᕆᐊᓕᓐᓂᒃ.
Tip 5
ᐃᑉᐱᓱᓪᓗᑎᑦ ᐅᖓᑎᒥ ᓱᕐᕙᓗᓐᓂᒃ: ᖃᓂᖕᖒᑏᑦ ᐃᑲᔪᕈᓐᓇᕋᓗᐊᕐᑎᓗᒋᑦ ᐅᖓᑎᒥ ᓱᕐᕙᓛᔪᓂᒃ ᓵᓚᖃᕈᑎᒋᓗᒋᑦ ᓱᒐᓗᓗᐊᖕᖏᐸᑕ, ᐃᑯᓪᓚᑎᑦᓯᒐᓱᖃᑦᑕᓗᑎᑦ ᐱᑕᖃᕆᐊᑐᖕᖏᑐᒥᒃ ᓱᕐᕙᓗᒻᒥᒃ ᐃᓕᓐᓂᐊᑎᑦᓯᕕᐅᑉ ᐃᓗᐊᓂ. ᐃᒐᓛᑦ ᐅᒃᑯᐊᓗ ᒪᑐᖃᑦᑕᓗᒋᑦ ᐱᕕᖃᕐᐸᑦ ᐊᒻᒪᓗ ᐃᓕᓐᓂᐊᑏᑦ ᐅᖄᑦᑌᓕᖁᖃᑦᑕᓗᒋᑦ ᐃᓕᓐᓂᐊᑎᑦᓯᓂᕐᓂ.
Tip 6
ᐱᖕᖑᐃᓗᑎᑦ ᐃᑦᓯᕙᐅᑌᑦ ᐋᕐᕿᒋᐊᕐᕕᖃᕐᓂᖓᓂᒃ: ᐃᑦᓯᕙᐅᑌᑦ ᐃᓕᓐᓂᐊᑎᑦᓯᕕᐅᑉ ᐃᓗᐊᓂ ᐋᕐᕿᓯᒪᑎᖃᑦᑕᓗᒋᑦ ᐃᓕᓐᓂᐊᑎᓕᒫᑦ ᑐᕃᓐᓇᑕᐅᒍᓐᓇᓂᐊᕐᒪᑕ ᓂᐱᖃᐅᑎᓄᑦ. ᑌᒫᒃ, ᓂᐱᓐᓂᐅᕕᑦ ᑐᓵᒍᓐᓇᓚᖓᔪᑦ ᑐᕃᓐᓇᑕᐅᓗᑎᒃ ᑐᕃᓐᓇᑕᐅᖕᖏᑲᓗᐊᕈᑎᓪᓗ ᖃᓂᖕᖒᑏᑦ ᐃᓗᐊᒍᑦ ᐊᕝᕕᐊᓗᑕᖃᕐᑎᓇᒍ.