ᐃᒥᑦᓯᐊᑑᒪᓂᕐᓗ ᓂᕿᑦᓯᐊᑑᒪᓕᕐᓗ ᐱᒻᒪᕆᐅᕗᑦ ᐊᑐᕐᓂᖃᕐᓱᑎᒃ ᑎᒥᒧᑦ, ᐃᓱᒪᒧᑦ ᐃᓱᒪᒃᑯᓗ ᖃᓄᐃᖕᖏᓯᐊᕐᓂᑯᑦ. ᖃᕆᑕᕗᑦ ᐱᓇᓱᐊᖏᓐᓇᓕᒫᒻᒪᑦ ᐱᔭᑦᓴᙯᓐᓇᓕᒫᕐᓱᓂ ᐃᓱᒪᒋᔭᑦᑎᓂᒃ ᓂᒪᓐᓂᕗᓐᓂᓗ, ᐊᓂᕐᑎᕆᓂᕗᓐᓂᒃ, ᐆᒻᒪᑎᑦᑕ ᑎᓪᓕᑖᖓᓂᒃ, ᐊᓯᒐᓵᓗᖏᓐᓂᓗ. ᐱᓇᓱᐊᖏᓐᓇᓕᒫᕐᓂᑯᖓᓄᑦ, ᖃᕆᑕᕗᑦ ᐱᑎᑕᐅᖏᓐᓇᓕᒫᕆᐊᓕᒃ ᐆᒪᒍᑎᓂᒃ ᓂᕿᓂᒃ ᐱᓯᒪᔪᓂᒃ. ᓂᕆᔭᕗᑦ ᓱᕐᕃᓂᖃᓪᓚᕆᓲᖅ ᖃᕆᑕᑦᑕ ᐊᐅᓚᓂᖓᓂᒃ. ᓂᖀᑦ ᖃᕆᑕᐅᑉ ᐃᓂᓪᓚᖓᐅᓯᖏᓐᓂᒃ ᓱᕐᕃᓲᖅ (ᐆᑦᑑᑎᒋᑦᓱᒍ, ᐱᑕᑦᓴᓕᕐᑑᒪᓗᐊᓕᑐᐊᕋᕕᑦ ᐅᕐᓱᓕᓐᓂᓗ ᐊᑯᓃᓗᐊᕐᑐᖅ, ᓱᕐᕃᒍᓐᓇᑐᖅ hippocampus-ᓚᔭᐅᔪᒥᒃ – ᖃᕆᑕᐅᑉ ᐃᓚᖓᑦ ᐊᐅᓚᔨᒍᑎ ᐃᑲᔪᕐᓯᓲᖑᑦᓱᓂᓪᓗ ᐃᓕᑦᓯᕙᓪᓕᐊᓂᕐᒥᒃ). ᓂᖀᑦ ᓱᕐᕃᒍᓐᓇᒥᔪᑦ ᖃᕆᑕᑦᑕ ᐊᐅᓚᑕᐅᒍᓯᖏᓐᓂᒃ (ᐆᑦᑑᑎᒋᓗᒍ, glucose-ᓚᔭᐅᔪᖅ ᓂᕆᔭᑎᓐᓃᓲᖑᒻᒥᔪᖅ ᐱᓇᓱᐊᕐᓂᖃᕐᒥᔪᖅ serotonin-ᓚᔭᐅᔫᑉ ᐃᓚᖓᓂᒃ ᐱᕙᓪᓕᐊᒍᑎᖓᓂᒃ – ᐃᓱᒪᒥᒃ ᐊᕐᖁᑎᒋᔭᐅᓲᖅ ᐱᐅᓯᒋᔭᑦᑎᓂᒃ ᑯᑮᖓᓂᕆᓲᑦᑎᓂᓪᓗ ᐊᐅᓚᑦᓯᒍᑎᐅᔪᖅ). ᑕᒪᒃᑯᐊ ᓱᕐᕋᑕᐅᒪᓂᖏᑦ ᓱᕐᕃᒍᓐᓇᒥᔪᑦ ᐱᐅᓯᒋᔭᑦᑎᓂᒃ! ᐃᓕᑦᓯᒋᐊᓪᓛᕈᒪᒍᕕᑦ ᖃᓄᖅ ᓂᖀᑦ ᓂᕆᓲᑎᑦ ᓱᕐᕃᓚᕆᓲᖑᒻᒪᖔᑕ ᓱᓇᓂᒃ ᐊᔭᓪᓗᒍ ᐅᓇ.
ᓂᕆᖃᑦᑕᓗᑎᑦ ᐱᕈᕐᑐᔭᓂᒃ ᒪᒪᕐᑐᔭᓂᒃ ᐊᒻᒪᓗ ᐱᕈᕐᑐᔭᑐᐃᓐᓇᓂᒃ!
ᓄᓇᕕᒻᒥ ᓂᕿᑦᓯᐊᓂᒃ ᖃᐅᔨᒪᐅᑏᑦ ᐅᓐᓂᑑᑦᔨᔪᑦ ᓂᕆᖃᑦᑕᖁᔨᑦᓱᑎᒃ ᐊᑦᔨᒌᖕᖏᑐᓂᒃ ᐱᕈᕐᑐᔭᑐᐃᓐᓇᓂᒃ, ᓄᓂᕚᑦᓴᓂᒃ ᐊᒻᒪᓗ ᐱᕈᕐᑐᔭᓂᒃ ᒪᒪᕐᑐᔭᐅᑦᓱᑎᒃ ᖃᓄᐃᑦᑐᑐᐃᓐᓇᓂᒃ ᑕᐅᑦᑐᓕᓐᓂᒃ ᐊᑦᔨᒌᖕᖏᑐᓂᒃ ᓄᒃᑭᓴᐅᑎᕐᑕᖃᕐᒪᑕ ᐊᒻᒪᓗ ᑎᒥᒧᑦ ᐱᐅᔫᓂᖃᕐᑐᓂᒃ. ᓄᐃᕋᑖᕐᖃᒦᑦ, ᖁᐊᕐᑎᑕᐅᒪᔪᐃᓪᓗ, ᖁᒻᒧᔪᒦᑦᑐᐃᓗ ᐱᕈᕐᑐᔦᑦ ᒪᒪᕐᑐᔦᑦ ᐃᓘᓐᓇᑎᒃ ᖃᓄᐃᖕᖏᓯᐊᕐᓱᑎᒃ ᓂᕿᕆᔭᐅᒍᓐᓇᓲᖑᒻᒪᑕ.
ᐆᑦᑐᕋᕐᓗᒋᑦ ᐃᕕᐅᔭᑦᓴᔭᓖᑦ!
ᓄᓇᕕᒻᒥ ᓂᕿᑦᓯᐊᓂᒃ ᖃᐅᔨᒪᐅᑏᑦ ᐅᓐᓂᑑᑦᔨᔪᑦ ᓂᕆᖃᑦᑕᖁᔨᑦᓱᑎᒃ ᐃᕕᐅᔭᑦᓴᔭᓕᓐᓂᒃ ᓂᕿᓂᒃ ᖃᐅᑕᒫᒃ ᐃᓗᓕᖃᕐᒪᑕ fiber-ᓚᔭᐅᔪᓂᒃ. ᓴᓇᐅᒐᓕᓐᓂᒃ ᖃᑯᕐᑕᓂᒃ ᐃᒐᓕᕈᕕᑦ ᕿᑎᕐᖃᖓᓂᒃ ᑲᔪᒻᒧᑦ ᐃᓇᖐᖔᕐᓗᒍ ᑕᒡᒐᓂ ᑕᕐᕿᒥ ᐆᑦᑐᕋᖁᔨᕗᒍᑦ. ᐅᓇ ᐃᒐᕈᓯᖅ ᑲᔪᒻᒧᑦ ᓴᓇᐅᒐᕐᒧᑦ ᐃᖑᑦᓯᒍᓯᖅ ᐆᑦᑐᑕᐅᖁᔭᕗᑦ.
ᐃᒥᓕᐅᒥᔮᕐᑕᒋᑦ!
ᐃᓅᑉ ᑎᒥᖓ ᐃᒪᕐᑕᓕᒃ 60%-ᒥᒃ! ᖃᓄᐃᓪᓗᐊᑐᒥᒃ ᐃᒪᑐᐃᓐᓇᑐᕆᐊᖃᕐᓂᕗᑦ ᐃᓄᓐᓄᑦ ᐊᑐᓂ ᐊᑦᔨᒌᑦᔭᖏᑦᑐᖅ, ᖃᓄᓪᓗᐊᑎᒋ ᑎᒥᒥᒃ ᓂᒪᑦᑎᓯᓐᓂᕗᓐᓄᑦ, ᓇᓂᓪᓗ ᓄᓇᖃᕐᒪᖔᑕ. ᐅᓐᓂᑑᑎᐅᕙᓪᓗᓲᖅ 6-8-ᓂᒃ ᐃᒥᕈᑎᓂᒃ ᐅᓪᓗᑕᒫᑦ ᐃᒪᕐᑐᕆᐊᓕᒃ ᐃᓄᒃ, ᒪᓕᒐᓕᐊᕕᓂᑎᒍᑦ. ᑖᓐᓇ ᐃᓂᓪᓚᖓᑎᑦᓯᒍᑎ ᖁᐊᖃᐅᑏᓐᓂ ᓄᐃᑕᑎᓪᓗᒍ ᓵᓐᓂᓘᓐᓃᑦ ᐃᑲᔪᕐᓯᒍᑎᐅᑎᓪᓗᒍ ᖃᓄᓪᓗᐊᑎᒋ ᐃᒪᑐᐃᓐᓇᑐᕐᒪᖔᑉᐱᑦ ᑕᒡᒐᓂ ᐱᓇᓱᐊᕈᓯᕐᒥ! ᓱᓀᓪᓗ ᐃᒪᕐᑑᒪᕆᐊᖃᓲᖑᒻᒥᔪᑦ? ᐃᓱᒪᒋᓗᒋᑦ ᐅᕕᓃᓪᓗ ᕿᖓᑉᐱᓗ ᓱᕐᓗᖏᑦ ᐸᓂᕐᓂᖏᑦ. ᐱᕈᕐᑐᐃᓗ ᖃᕆᐊᑉ ᐃᓗᐊᓃᑦᑐᑦ ᐊᓂᕐᕋᒥᓪᓘᓃᑦ? ᐱᕈᕐᑐᐃᑦ ᐆᒪᔪᐃᓪᓗ ᐃᒪᕐᑑᒪᕆᐊᖃᕐᒥᔪᑦ!
ᓂᕿᑐᐃᓐᓇᑑᒪᑦᓯᐊᓂᖅ!
ᓂᕿᑐᐃᓐᓀᑦ ᐱᐅᔫᕗᑦ ᑎᒥᑦᑎᓄᑦ ᐊᑦᔨᒌᖕᖏᑐᓂᒃ ᓄᒃᑭᓴᐅᑎᖃᕐᒪᑕ ᑎᒥᐅᑉ ᑭᖕᖒᒪᒋᔭᖏᓐᓂᓗ ᐃᓗᓕᖃᕐᒪᑕ. Iron-ᓚᔭᐅᔪᖅ ᑎᕐᑑᑉ ᐃᓚᑦᓴᔭᖓᓂᒃ ᑎᒥᒨᔦᓲᖑᕗᖅ, ᐃᑲᔪᕐᓯᓲᖅ ᐃᒻᒪᑌᓕᒪᓂᕐᒥᒃ ᐊᒻᒪᓗ ᑭᖕᖒᒪᒋᔭᐅᑦᓱᓂ ᖃᕆᑕᑦᑎᓄᑦ. Iron-ᑖᕈᓐᓇᖁᒍᑦ ᓂᕿᑑᒪᓂᒃᑯᑦ ᐳᐃᔨᕕᓂᕐᓂᒃ, ᑐᑦᑐᕕᓂᕐᓂᒃ, ᐊᒻᒨᒪᔪᓂᒃ ᐅᕕᓗᓐᓂᓗ. Vitamin D-ᓚᔭᐅᔪᖅ ᐃᑲᔪᕐᓯᓲᖑᒻᒥᔪᖅ ᐃᒻᒪᑌᓕᒪᑎᑦᓯᓱᑎᒃ ᓄᕙᓐᓇᒥᒃ, ᖃᓂᒻᒪᓇᕐᒥᒃ ᐳᕙᓪᓗᓂᕐᒥᓗ. Vitamin D-ᓚᔭᐅᔪᒥᒃ ᐱᑖᒍᓐᓇᖁᒍᑦ ᒪᑯᓂᖓ ᓂᕿᑐᐃᓐᓇᓂᒃ: ᐃᖃᓗᒃ (ᐋᓇᒃ, ᑲᕕᓯᓕᒃ, ᐃᖃᓗᑉᐱᒃ, ᐊᓯᖏᓪᓗ.), ᓱᕙᓐᓂᒃ, ᐃᒪᕐᐱᒥᐅᑕᓂᒃ ᐆᒪᔪᓂᒃ ᐆᑦᑑᑎᒋᓗᒍ ᕿᓚᓗᒐᓐᓂᒃ ᐳᐃᔨᓂᓪᓗ, ᒪᑦᑕᓂᒃ ᑎᒻᒥᐊᓗ ᒪᓐᓂᖏᓐᓂᒃ. ᐃᓕᑦᓯᒋᐊᓪᓛᕈᒪᒍᕕᒃ ᓂᕿᑐᐃᓐᓇᑐᕐᓂᐅᑉ ᐱᕚᓪᓕᕈᑎᑦᓴᖏᓐᓂᒃ, ᐊᔭᓪᓗᒍ ᐅᓇ.
ᐃᒻᒥᓂᒃ ᑲᒪᒋᔭᖃᑦᓯᐊᕋᓱᐊᕐᓂᖅ
ᓄᓂᕚᑦᓭᑦ ᑎᒥᒧᑦ ᐱᐅᔫᕗᑦ ᓄᓇᕕᒻᒥ ᐊᑐᐃᓐᓇᐅᓯᐊᕐᓱᑎᒃ ᐅᑭᐊᑦᓴᐅᓕᑐᐊᕐᒪᑦ! ᐊᑦᔨᖑᐊᓂᒃ ᐊᐅᓪᓚᑎᑦᓯᕕᒋᑎᒍ ᓄᓂᕙᑦᑎᓗᑎᑦ ᐊᑦᔨᓕᐊᕕᓂᕐᒥᒃ! ᐃᓚᖏᑦ ᓄᓂᕚᑦᓭᑦ ᓇᓂᔭᐅᒍᓐᓇᑐᑦ ᑕᕐᕋᒥ ᒪᑯᐊ: ᐊᕐᐱᒃ, ᐸᐅᕐᖓᖁᑎᒃ, ᐅᕐᐱᒃ, ᐊᐅᐹᓗᒃᑐᒃ, ᒥᕐᖁᐊᓚᖃᐅᑎᒃ, ᑭᒻᒥᓇᖁᑎᒃ, ᒥᕐᖁᐊᓕᖃᐅᑎᒃ ᐊᒥᓱᒐᓭᓪᓗ! ᐸᓂᕐᑎᓯᐊᕕᓂᕐᓂ ᓴᓇᐅᒐᕐᒧᑦ ᑲᔪᒻᒧᑦ ᑕᖁᐊᕐᓯᒪᑦᓴᓂᐊᕆᑦ ᑕᒧᓗᓂᐊᕐᑌᓂᒃ! ᓄᓂᕙᑦᓯᒪᓕᕈᕕᑦ ᐆᑦᑐᕋᑦᓴᓂᐊᕈᒃ ᐅᓇ ᓱᕙᓪᓕᕈᓯᖅ.
ᐊᑦᔨᖑᐊᑎᓐᓂᒃ ᑕᑯᑦᓴᐅᑎᑦᓯᒋᑦ ᓄᓂᕙᕆᐊᕐᓯᒪᔪᕕᓂᐅᑦᓱᑎᑦ ᑕᒡᒐᓂ ᑕᕐᕿᒥ!
Blueberries in Kuujjuaq 
